Փաստ ինֆո

Ախթալայի ենթակառուցվածքները վերականգնելու համար զգալի աշխատանք պետք է արվի, հատկապես ճանապարհաշինարարության ուղղությամբ։ «Փաստինֆո»-ի հետ զրույցում ասել է Ալավերդու բնակիչ Ռոբերտ Ղալայանը։

Տեղի ունեցած ջրհեղեղն ի ցույց է դրեց, թե որքան անորակ ու խնդրահարույց են մեր ենթակառուցվածքները. ոչ միայն միջպետական ճանապարհն է վնասվել մի քանի հատվածից՝ առաջացնելով լուրջ խնդիրներ, այլեւ ի ցույց դրել միջհամայնքային առկա ենթակառուցվածքների խոցելիությունը՝ ըստ էության պարալիզացնելով կյանքը։

Մի շարք խոշոր բնակավայրեր, փաստացի, այդ թվում՝ Ախթալան մեկուսացած են առ այսօր։

Մեր հարցին, թե ինչ իրավիճակ է այս պահին համայնքում՝ բնակիչը նախ մեկ բառով պատասխանեց՝ «տխուր»։

Ռ.Ղալայանի տունը չի տուժել, քանի որ իրենց շենքերը ավելի վերեւում են, բայց հիշում է՝ առաջին օրերին քաոս էր, հետո սկսեցին կազմակերպվել։ Նրա փոխանցմամբ՝ Ալավերդիի՝ գետին ավելի մոտ հատվածները չափազանց կեղտոտ են, գետի տիղմը դեռ մաքրել է պետք, տուժածներն էլ շատ են։

Նրա կարծիքով՝ Ալավերդի քաղաքում խնդիրները համեմատաբար ավելի արագ լուծելի են, սակայն հսկայական ճանապարհաշինարարական աշխատանքի անհրաժեշտություն կա։ Ամբողջությամբ վնասված է միջպետական ճանապարհին միացող հատվածը, որը դեպի գործարան էր գնում, չկա Ախթալա տանող ճանապարհը։

Շատ է անհանգստացնում դեպի Սանահին կայարան տանող հատվածի վերականգնումը՝ գետի մյուս կողմում մնացած մարդկանց մեկուսացումից դուրս բերելու համար։ Ըստ նրա՝ այդ հատվածում էլ ժամանակավոր՝ գոնե միայն հետիոտնի համար նախատեսված կամուրջի անհրաժեշտություն կա, ինչպես Ախթալայում, մինչև կկարողանան վերականգնել երթևեկելի կամուրջը։ Միաժամանակ բնակիչը նշեց, որ ժամանակավոր այդ կամուրջի կառուցումն ավելի բարդ կլինի, քանի որ տարածքն ավելի լայն է։

«Ես մասնագետ չեմ, բայց նման դեպքում, որքան գիտեմ, կամուրջը ճոճով են սարքում, ճոճանակի նման»,- ասաց նա։

Ինչ վերաբերում է Վանաձորի եւ Ալավերդու միջեւ հաղորդակցության վերականգնմանը, ապա, ինչպես նկատեց բնակիչը, կա մի ճանապարհ՝ նախատեսված միայն մարդատար փոքր մեքենաների համար, որն, ըստ էության, շրջանցում է միջպետական ճանապարհը։ Ջրհեղեղի առաջին օրերին դժվար էր գնահատել դրա անվտանգությունը, բացի այդ՝ անհրաժեշտ էր, որ իջներ ջրի մակարդակը։ Հիմա կարող են օգտագործել, բայց միայն մարդատար փոքր մեքենաները, ինչը հնարավորություն կտա գոնե ժամանակավորապես կապ ապահովել Վանաձորի եւ Ալավերդու միջեւ։

Աղբյուր` Փաստինֆո