Փաստ ինֆո

Իրանի նախագահի ուղղաթիռի վթարի նախաքննության փուլերի վերաբերյալ դեռևս ոչ մի հայտարարություն չի եղել։ Հայտարարվել է, որ նախաքննություն է ընթանում և բավականին լուրջ քննություն պետք է ընթանա, քանի որ զոհերի պաշտոնական դիրքը հաշվի առնելով՝ սա իմիջային հարված էր Իրանին։ «ՓաստԻնֆոյի» եթերում ասել է իրանագետ, ԵՊՀ իրանագիտության ամբիոնի դասախոս Գարիկ Միսակյանը։

Բանախոսի դիտարկմամբ, պաշտոնական վարկած է եղանակային պայմանները, սակայն սոցիալական ցանցերի տիրությում և նույնիսկ Իրանի հեռուստաալիքներից մեկով հայտարարություն հնչեց, որ հնարավոր է արտաքին միջամտություն տեղի ունեցած լինի, հատկապես իսրայելական կողմից, հաշվի առնելով Իսրայելի ռազմական և ներազդելու հնարավորությունները նմանատիպ վթարների վրա։

Վարկածներ կային, որ հնարավոր է Ադրբեջանական Հանրապետության կողմից Արցախից բռնազավթված տարածքներից որոշակի գործողություններ եղած լինեն։ Եթե իսրայելական գործոն լինի, ապա դա հնարավոր էր միայն Ադրբեջանի տարածքից։

Իրանագետի խոսքերով, Իրանի քաղաքական համակարգը այնպես է կառուցված, որ հիմնական քաղաքականությունը որոշող ուժերի ղեկավարությունը չի գտնվում նախագահի լիազորություններում, այլ հոգևոր առաջնորդի գրասենյակի լիազորություններում է և «կարմիր գծերի» վերաբերյալ ցանկացած փոփոխություն արվում է հոգևոր առաջնորդի կողմից։ Մեզ վերաբերվող «կարմի գծերի» հայտարարությունները արվել են հոգևոր առաջնորդի կողմից և միայն նրա կողմից են փոփոխության ենթակա։

Փորձագետը նշում է, որ Ռաիսի քաղաքականությունը հարևանների հետ լավ հարաբերություններն էր և Ադրբեջան կատարած այցը այդ քաղաքականության շրջանակներում է իրականացվել։ Եղել է պլանավորված հանդիպում նաև հայ-իրանական սահմանին, որը չեղարկվել է կողմերից մեկի պահանջով։ Հարավային Կովկասը բավականին լուրջ կարևորություն ունեցող հատված է Իրանի համար։

«Շահերի համընկնամ փուլում Իրանին պետք են դաշնակիցներ։ Նույն «Զանգեզուրի միջանցք» ծրագիրը հստակ օրինակներից մեկն է, երբ և՛ Հայաստանի աշխարհաքաղաքական շահն է պահանջում որպեսզի այդ միջանցքը չլինի, և՛ Իրանինն է պահանջում։ Իրանական կողմը բավականին լուրջ աջակցություն է ցույց տալիս այս ոլորտում Հայաստանին»,- ասել է Գ․ Միսակյանը։

Մանրամասները՝ տեսանյութում։

Աղբյուր` Փաստինֆո