Փաստ ինֆո

«Ես դիմում եմ նախկին և ներկա բոլոր զինվորականներին, նախկին և ներկա բոլոր դիվանագետներին, նախկին և ներկա բոլոր մշակույթի գործիչներին՝ որևէ դիրքորոշում չհայտնելը, ինձ համար լինելու է պատճառ, որևէ ձևով իրենց հետ հարաբերություն չունենալու»,- Ոսկեպարում տեղի ունեցած հանրահավաքում հայտարարել է Տավուշի թեմի առաջնորդ Բագրատ Սրբազանը։

Ինչպես արդեն տեղեկացրել ենք՝ «Տավուշը հանուն հայրենիքի» քաղաքացիական նախաձեռնության կողմից այսօր հավաք էր նախաձեռնվել Ոսկեպարում։

«Այս ընթացքն ամենակարևոր ընթացքն է, որ յուրաքանչյուր իրեն հայ զգացող մարդ պետք է արտահայտի իր վերաբերմունքն այս ապօրինի եղելության, ապօրինի սահմանազատման ու սահմանագծման մասին։ Հստակ ասում եմ՝ չկա ժամանակ լավ մարդ լինելու կամ վատը լինելու։ Լավամարդի, վատամարդի ժամանակ չկա՛։ Կլինե՛ք, սիրո հարաբերությունները մեր բոլոր տեսակի կշարունակվեն, չե՛ք լինի, Դուք ընտրել եք Ձեր ճանապարհը։ Շատ մարդիկ են եղել, ովքեր մեծ -մեծ խոսել են, որ ո՛չ մեկ տարածքներ չի հանձնելու, Արցախն էլ չեմ ասում, մեր չքնաղ հայրենիքի մասին էլ չեմ ասում, ասում էին շատերը՝ «ի՞նչն եք խոսում, ի՞նչ հանձնել»։ Հիմա էլ ասում են՝ « չե՛նք հանձնում , վերադարձնում ենք, չենք հանձնում, զիջում ենք», ինչ ուզում ասում են»,- արձանագրեց Բագրատ արքեպիսկոպոս Գալստանյանն ու ավելացրեց.-«բժիշկնե՛ր, դիվանագետնե՛ր, զինվորականնե՛ր, ոստիկաննե՛ր, որոնց ընկերներն այս ճանապարհի վրա նահատակվել են, անվտանգության ծառայողնե՛ր, անհատապես թե հավաքականորեն, ձեր դիրքորոշումը հայտնե՛ք , այո-ն՝ «այո» թո՛ղ լինի, ոչը՝ «ո՛չ» թող լինի», -խիստ ձևակերպեց սրբազանը։

Աղբյուր` Փաստինֆո