Փաստ ինֆո

Կա՞ աշխարհում այնպիսի երկիր, որն ունի այնպիսի ղեկավար, որը վերահաս աղետից առաջ ամենայն լրջությամբ դպրոցի վատ ու լավ լուսամուտի, ծորակի, բռնակի, կախիչի հարցեր է քննարկում կառավարության նիստում: Եվ ի տես բոլորի էլ հաստատում, որ լուսամուտի, ծորակի, բռնակի, կախիչի լավուվատից ինքը բան չի հասկանում: Փաստորեն, ստացվում է, որ դրանցի՞ց էլ բան չի հասկանում: Իսկ մենք կարծում էինք՝ գոնե նման մանր-մունր դետալներից կուրսի է:

Այն, որ ընդհանրապես՝ էժան շոուների վարպետ է՝ բազմիցս համոզվել ենք։ Բայց պարզվում է՝ այս անձն իր կաշվից բացի այսօր ոչնչի մասին չի մտածում։ Ինձանից հետո՝ թեկուզ ջրհեղեղ տրամաբանությամբ նա ազգն ու պետությունն ուղղակի կործանման է տանում։ Ամեն վայրկյան բռնկման պատրաստ տարածաշրջանում՝ նա կարևոր երկրներին ձեռնոց է նետում։

Հայաստանը կիզակետում է, իսկ աշխարհաքաղաքական հարցերը թողած՝ նա ամեն օր մի թեմա է գտնում, որով, ըստ էության, ոչ թե երկրի ղեկավարը, կոնկրետ մասնագետներ պիտի զբաղվեն։ Ոչ՝ քպական և ոչ՝ԽԾԲ․․․
Բայց ասացեք խնդրեմ՝ ՀՀ ղեկավար ո՞նց կարող է 6 տարի շարունակ լինել մեկը, ով Արցախի հարցին մինչ օրս չտիրապետելով, տիրապետողների հետ խարհրդակցելու փոխարեն՝ գերադասեց ալիևին և ալիևյան հակահայ թեզիսները՝ թշնամուն հանձնելով Արցախը․․․ և պիղատոսաբար ձեռքերը լվանալով․․․

Կա՞ մեկ այլ պետություն աշխարհում, որ պատրաստ է ուրանալ ու մոռանալ ազգային խորհրդանիշերը և Արարատից հրաժարվելու, զինանշանից Արարատը հանելու թուրքական պահանջին հպատակ է, մարդ, որ երբևէ չի հասկացել ՀՀ անկախության գաղափարաբանությունը, Անկախության հռչակագրի նշանակությունն ու էությունը չի ընկալել։ Եւ դժվար թե ընկալի․․․որ ամեն օր Սահմանադրություն չեն փոխում, որ ՀՀ Սահմանադրության բուն գործառույթը երկրի ներքին անվտանգությունը ապահովելն է, ինչը Մայր օրենքը լիովին կատարել և կատարում է։ Այս հարցը նա այնքան չի ընկալում, որ կարծես, շփոթում է պարեկային ծառայության հետ։

Այն, որ աշխարհագրությունից հեռու է այնքան, որ միակ դաշնակից ՌԴ-ին թշնամի է ուզում դարձնել, իսկ դարավոր թշնամիների գիրկն է նետվում այն դեպքում, որ դրանց բաղձանքն առանց հայերի Հայաստանն է: Ավելին, չորս կողմից մեզ շրջապատող ինքնուրույն պետություն Իրանին վանում է շարունակ, որն, ըստ էության 4-ից միակն է, որ ՀՀ-ի հանդեպ լավ է տրամադրված, բնականաբար, նաև՝ իր պետական շահից ելնելով։

Բնականաբար, ՀՀ ներկա ղեկավարը երկրում հակառուսական մտայնությունները խտացնելով և կողմնորոշումը դեպի Արևմուտք ուղղելով՝ ժողովրդին բացահայտ չի ասում, թե՝ արևմտյան պետությունները ՀՀ-ի համար իրենց դեսպան որպես բացառապես Թուրքիային են տեսնում և արդեն իսկ կարգել են։ Ի դեպ, Արևմուտքը պարբերաբար սա հիշեցնում է, իսկ հիմա իր ներկայացուցիչների բերանով հայտարարում է՝ մեղքը նախապես բարդելով Հայաստանի ղեկավարության և հայերի վրա։
Իրենք ասել են, զգուշացրել են, բացատրել են․․․

Այս ճակատագրական, գոյաբանական գերխնդիրը թողած՝ Հայաստանի ղեկավարը ժողովրդին կենցաղային թեմաներով շեղելու ամենօրյա դոզա է բաց թողնում՝ ըստ ամենայնի՝ անկանխատեսելի հետևանքների հանգեցնող քայլերի պատրաստվելով հայության թիկունքում։

Սպառողական ապրանքների թանկացմանը զուգընթաց՝ նորանոր հարկեր և տուրքեր է մտածում իշխանությունը՝ կարմիր գծերին փոխարինելու են գալիս դեղին գծերը, արդեն թանկացած գույքահարկին զուգահեռ հարկման «մատերիալ» են դառնում նաև վարձակալությամբ բնակարաններ հանձնողները, սա չմարսած՝ մեկ օրվա մեջ տրանսպորտն է ահավոր թանկանում, ի հավելումն, վարկերն ու զանազան օնլայն խաղերը, որոնք ուղղակի աղետ են ժողովրդի և՝ հարստացման աղբյուր ներկաների համար։

Բայց ոչ միայն կենցաղային քաոտիկ վիճակի մեջ են հայտնվել մարդիկ։

Քաոսն ամենուր է, հարվածները արմատին են՝ ազգային ինքնության բնորոշիչ՝ հայագիտական, հոգևոր- մշակութային, գիտակրթական ինստիտուտներին՝ Հայ առաքելական Եկեղեցուն, Մատենադարանին, Ցեղասպանության թանգարան-ինստիտուտին, և այլն․․․

Հայաստանն աղետաբերը վերածում է բրոունյան քաոտիկ շարժման դատապարտված մի հանգրվանի, ուր ժամանակավորության զգացում է ցանկանում ներդնել վերջինս․․․
Եվ այս ամենի խորապատկերում՝ ռուսատյացություն, ՌԴ-ի հանդեպ ատելության քարոզ, որն ուղղակի իշխանությունն է հրահրում։ ՌԴ-ն բազմիցս կոչ է անում, հորդորում՝ շա՜տ լուրջ մտածել՝ քայլ անելուց առաջ․․․ Նախօրեին հարևան Իրանը խելամտության կոչ արեց․․․
Իսկ նրանց զուգահեռ փաշինյանալիևյան զույգը ակտիվ բանակցային փուլ է մտել․․․

Դեպի ու՞ր է տանում ՀՀ իշխանությունը Հայաստանը։ Մի բան են կարող միայն՝ թուրքին հանձնել, նվիրել, թշնամու շահը սպասարկել։

Իսկ դեպի ու՞ր են գնում հայերը՝ ցաքուցրիվ, անգաղափար․․․ Գիտակցու՞մ են։ Հասկանու՞մ են, որ մի նավի մեջ ենք, որը ոչ ղեկ ունի, ո՛չ նավավար․․․

Կամ՝ անդունդի եզրին ենք, մեկ քայլ ու․․․ մեր կործանումը մեր իսկ աչքի առաջ տեսնելու ենք։
Բայցևայնպես՝ այս քաոսից դուրս գալու ելքը, ճանապարհը, ճիշտ ուղղությունը ո՞վ է ցույց տալու։ Ժամանակ չկա։ Ինչ աղետ է հունցում աղետաբերը մեր դեմ՝ ներսուդրսում․․․
Աղետաբերի այլընտրանքը պի՛տի լինի․․․

Աղբյուր` Փաստինֆո