Փաստ ինֆո

Քարվաճառից ու Քաշաթաղից բռնի տեղահանված արցախցիներն այսօր բողոքի ակցիա են իրականացնում կառավարության շենքի դիմաց՝ հանդիպում պահանջելով վարչապետ Նիկոլ Փաշինյանի հետ։ Նրանք պահանջում են լուծում տալ իրենց սոցիալական բազմաթիվ խնդիրներին։

Ակցիայի մասնակիցներից արցախցի մի կին լրագրողների հետ զրույցում պատմեց, որ որևէ աջակցություն որևէ մեկից չեն ստացել։ «Ոչ մեկ չի եկել, չի հարցրել՝ ոնց եք։ Ես 3 զինվորի մայր եմ։ 3-ն էլ մինչև պատերազմի վերջին օրը մասնակից են եղել, որից մեկը՝ վիրավոր է, բայց մենք անտեսված ենք և չենք կարողանում ապրել»։

Կինը պատմեց, որ ընտանիքում 6 հոգի են, բայց պետության տված սերտիֆիկատով բնակարան չեն կարողանում գնել։ «Ասում են՝ սերտիֆիկատ ստանալու համար էլ պետք է գումար մուծենք, բայց 280 հազար դրամ ենք ստանում, որից 200 հազար գնում է կոմունալին ու տան վարձին, ես հիմա որտեղից պիտի 500 հազարական դրամ հավաքեմ տամ, որ կարողանամ սերտիֆիկատ ստանալ; Մենք պահանջում ենք, որ մեզ հնարավորություն տան 2 սենյականոց բնակարան գնել, որ 6 հոգով կարողանանք ապրել։ Օր օրի տները թանկանում են, իսկ մենք մնում ենք առանց տուն։ Սերտիֆիկատների տրամադրման ժամկետը լրանում է 3 ամսից, բայց ոչ մեկս դեռ տուն չենք ստացել»։

Նա նշեց նաև, որ Արցախում վերցրած վարկերի պատճառով այսօր իր որդին չի կարողանում Երևանում ստացած սերտիֆիկատն իրացնել։

«Բանկն ասում է՝ դու «չոռնի» ես։ «Չոռնին» որն է, աշխատանք չունենք, չենք էլ կարողանա մարել, ոնց մարենք, եթե հազիվ հասցնում ենք աշխատել երեխա պահել։ Վաղը թոռներիս են կանչելու բանակ, չեմ թողնելու գնան, որովհետև 3 տղերքս առաջնագծում են եղել, բայց էսօր պետությունն ինձ համար ոչինչ չի անում։ Թող իրենց կարգավիճակն հանեն, կվերցնեմ երեխեքիս կգնամ Ռուսաստան, 9 ընտանիք էլ հետս կտանեմ, թող դատարկվի Հայաստանը»։

Աղբյուր` Փաստինֆո