Փաստ ինֆո

14 տարի առաջ Մաքսային կոմիտեի նախկին ղեկավար Արմեն Ավետիսյանի առանձնատան վրա կատարված ավազակային հարձակումը պատվիրելու գործը դատական շրջապտույտի մեջ է։

ՀՀ գլխավոր դատախազ Աննա Վարդապետյանը վճռաբեկ բողոք է ներկայացրել՝ պահանջելով բեկանել «Ալրաղացի Լյովիկ» մականունով հայտնի ԱԺ նախկին պատգամավոր Լևոն Սարգսյանի դատավճիռը բեկանելու և գործը նոր քննության ուղարկելու մասին։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Տաթևիկ Գրիգորյանի նախագահությամբ, մեղավոր էր ճանաչել Լևոն Սարգսյանին և Ղազարյանին՝ դատապարտելով ազատազրկման՝ համապատասխանաբար 9 և 8 տարի ժամկետներով։ Պաշտպանները վերաքննիչ բողոքներ են ներկայացրել՝ պահանջելով բեկանել առաջին ատյանի դատարանի վճիռը։ Լևոն Սարգսյանի պաշտպանը պահանջել էր արդարացնել նրան, կամ գործն ուղարկել առաջին ատյանի դատարան՝ նոր քննության, իսկ դրա անհնարինության դեպքում՝ Լևոն Սարգսյանի նկատմամբ նշանակել առավել մեղմ պատիժ։ Սուրեն Ղազարյանի պաշտպանը եւս վերաքննիչ դատարանից պահանջել էր արդարացնել իր պաշտպանյալին՝ մեղավորությունն ապացուցված չլինելու հիմքով ու դադարեցնել Ղազարյանի և Սարգսյանի նկատմամբ քրեական հետապնդումը, կարճել վարույթը, կամ՝ գործն ուղարկել նոր քննության։

Վերաքննիչ քրեական դատարանը՝ դատավոր Արսեն Նիկողոսյանի նախագահությամբ, կազմով դատավորներ Արմեն Բեկթաշյանի, Արշակ Վարդանյանի, բավարարել է բողոքները՝ բեկանելով առաջին ատյանի դատական ակտը և գործն ուղարկել նույն դատարան՝ նոր քննության։ Դատական ակտի բեկանման պատճառ դարձել է պաշտպանության կողմի մատնանշած այն հանգամանքը, որ գործն առաջին ատյանի դատարանում քննած դատավոր Տաթևիկ Գրիգորյանը նախկինում՝ 2011թ մասնակցել է բովանդակային առումով նույն դեպքին առնչվող՝ Արա Կարապետյանի և մյուսների գործի քննությանը՝ այդ ժամանակ լինելով գործը քննող դատավոր Մնացական Մարտիրոսյանի նիստերի քարտուղարը, մինչդեռ, օրենսդրությունը, ի թիվս այլ հիմքերի, նախատեսում է, որ դատավորը պետք է ինքնաբացարկ հայտնի, եթե նախկինում մասնակցել է տվյալ գործի քննությանն այլ դատարանում, հետևաբար, Լևոն Սարգսյանի և Ղազարյանի գործը քննելիս պետք է քննարկման առարկա դարձվեր դատավոր Տաթևիկ Գրիգորյանի ինքնաբացարկի հարցը։ Խնդիրն այն է, որ Լևոն Սարգսյանի և Սուրեն Ղազարյանի գործով դատական ակտում որպես հաստատված հանգամանք են ընդունվել Արա Կարապետյանի և մյուսների գործով դատավճռում արձանագրված հանգամանքները, մինչդեռ, պաշտպանության կողմի դիտարկմամբ՝ Լ․ Սարգսյանի և Ս․ Ղազարյանի գործով քննությունը պետք է լիարժեք իրականացվեր։

«Վերաքննիչ դատարանը փաստում է, որ սույն քրեական գործով դատավճռի կայացման հիմքում բացի քրեական գործով ձեռք բերված ապացույցներից դրվել է նաև Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի թիվ ԵԿԴ/0012/01/10 քրեական գործով 2011 թվականի մայիսի 24-ին կայացված դատավճիռը: Վերաքննիչ դատարանը հարկ է համարում փաստել, որ նշված դատավճիռը սույն քրեական գործի լուծման համար ունեցել է կոնկրետ նշանակություն՝ հաշվի առնելով նաև դատական նիստի ընթացքում մեղադրողի արտահայտած դիրքորոշումն առ այն, որ ավազակության փաստը սույն գործով ապացուցելու անհրաժեշտություն չկար, քանի որ այն հաստատված էր թիվ ԵԿԴ/0012/01/10 քրեական գործով օրինական ուժի մեջ մտած 2011 թվականի մայիսի 24-ի դատավճռով:

Վերաքննիչ դատարանը գտնում է, որ հատկապես թիվ ԵԿԴ/0012/01/10 քրեական գործով 2011 թվականի մայիսի 24-ին կայացված դատավճռի նման նշանակություն տալու պայմաններում բողոքաբերի պնդումներն առ այն, որ այդ գործով դատական նիստերի քարտուղար հանդիսանալու հանգամանքը կարող էր էական ազդեցություն ունենալ այլևս որպես նախագահող դատավոր ապացույցները գնահատելու և ներքին համոզմունքի ձևավորման գործընթացի վրա, ողջամիտ դիտորդի տեսանկյունից ձևավորելով անկողմնակալ չերևալու տպավորություն, հիմնավորված են:
Վերաքննիչ դատարանն արձանագրում է, որ թեև սույն քրեական գործով նախագահող դատավորի կողմնակալ լինելը կասկածի տակ դնող որևէ փաստական տվյալ առկա չէ, այնուամենայնիվ, նախագահող դատավոր Տ.Գրիգորյանը, չբացահայտելով թիվ ԵԿԴ/0012/01/10 քրեական գործով դատական նիստի քարտուղար հանդիսանալու հանգամանքը, կողմերին չի տրամադրել բավարար երաշխիքներ՝ բացառելու սույն քրեական գործով իր՝ կողմնակալ երևալու վերաբերյալ կասկածները:

Այսպիսով, հաշվի առնելով այն հանգամանքը, որ սույն դատավճիռը կայացվել է առանց վարույթին նախագահող դատավորի մասնակցությունը ենթադրաբար բացառող հանգամանքի առկայությունը մինչև դատաքննության սկիզբը կողմերի համար բացահայտելու՝ Վերաքննիչ դատարանը գտնում է, որ դատավճիռն անաչառ երևացող (ընկալվող) դատարանի կողմից կայացված լինելու հանգամանքը կասկած է հարուցում, ուստի այն պետք է բեկանել և գործն ուղարկել նույն դատարան՝ այլ կազմով նոր քննության։ Հաշվի առնելով, որ դատավճիռը բեկանվում է քննարկվող հիմքով՝ նոր քննությունը կարող է և պետք է իրականացվի ողջ ծավալով»,- նշված է Վերաքննիչ դատարանի դատական ակտում:

Վերաքննիչ դատարանը նաև անփոփոխ է թողել ամբաստանյալների նկատմամբ ընտրված խափանման միջոցները։ Հոկտեմբեր ամսին ՀՀ գլխավոր դատախազը վճռաբեկ բողոք է ներկայացրել՝ պահանջելով բեկանել վերաքննիչ դատարանի որոշումը։ Զեկուցող դատավոր է Համլետ Ասատրյանը։

Հիշեցնենք, որ Լևոն Սարգսյանը մեղադրվում է մոտ 14 տարի առաջ Մաքսային կոմիտեի նախկին ղեկավար Արմեն Ավետիսյանի առանձնատան վրա կատարված ավազակային հարձակումը պատվիրելու մեջ։ Ավազակային հարձակումը տեղի է ունեցել 2008 թվականի հոկտեմբերին։ Այն ժամանակ հայտարարվեց, որ «Կոշիկի քաղաք» ՍՊԸ հիմնադիր Արա Կարապետյանը և Նոր Նորքի ոստիկանության բաժնի պետի նախկին տեղակալ Արմեն Նիկողոսյանը ստեղծել են հանցավոր համագործակցություն, որի անդամների կողմից կատարվել են մի շարք աղմկահարույց, առանձնապես ծանր հանցագործություններ կատարելու դեպքեր, այդ թվում` ՀՀ մաքսային պետական կոմիտեի նախկին պետ Արմեն Ավետիսյանի առանձնատան վրա ավազակային հարձակման դեպքը։ 2011թ. մայիսին կայացված դատավճռով հանցավոր համագործակցության 10 անդամները դատապարտվել էին երկարատև՝ մինչև 15 տարի ժամկետով ազատազրկման։

2018 թվականին ԱԱԾ-ն հայտարարեց, որ Արմեն Ավետիսյանի առանձնատան վրա ավազակային հարձակման իրական պատվիրատուն, նախնական տվյալների համաձայն, հանդիսացել է ՀՀ ԱԺ նախկին պատգամավոր, հանրությանը «Ալրաղացի Լյովիկ» մականունով հայտնի Լևոն Սարգսյանը, որը, լարված հարաբերությունների մեջ գտնվելով Արմեն Ավետիսյանի հետ, արդեն իսկ ձևավորված և ավազակային մի շարք հարձակումներ գործած հանցավոր խմբի անդամներին պատվիրել է վերոնշյալ հանցագործության կատարումը: Գործով մյուս մեղադրյալը՝ Սուրեն Ղազարյանը մեղադրվում է Լևոն Սարգսյանին օժանդակելու մեջ։

Լեւոն Սարգսյանը հայտնաբերվել եւ ձերբակալվել է ՌԴ Մոսկվայի մարզի Զելենոգրադ քաղաքում՝ 2019 թվականի նոյեմբերի 21-ին։

2020 թվականի մարտին հայտնի դարձավ, որ Ռուսաստանի Դաշնության գլխավոր դատախազությունը բավարարել է Լևոն Սարգսյանին քրեական հետապնդման ենթարկելու նպատակով Հայաստանի իրավապահ մարմիններին հանձնելու մասին ՀՀ գլխավոր դատախազության միջնորդությունը։

Նա Հայաստան է տեղափոխվել օգոստոսի 6-ին, գտնվում է «Երևան-Կենտրոն» ՔԿՀ-ում։ Երևանի ընդհանուր իրավասության դատարանը վերահաստատել է «Ալրաղացի Լյովիկի» նկատմամբ ընտրված խափանման միջոց կալանավորումը։

Հեղինակ՝ Իզաբել Սահակյան

Աղբյուր` Փաստինֆո