Փաստ ինֆո

Իսրայելն, արդեն, ավարտում է առաջին փուլը, որը, նախ և առաջ, ներառում էր իր վերահսկողության տակ վերադարձնել ինչպես հյուսիսում, այնպես նաև՝ հարավում իր պարագծերը, այնուհետև նախապատրաստական աշխատանքներ կատարել՝ պատրաստվելու երկրորդ փուլի մեկնարկին։ Այլ կերպ ասած, Իսրայելը պատրաստվում է գրոհի երկրորդ փուլին, որի մասին տեղեկատվությունն այս պահին խիստ գաղտնի է պահվում։ Պաշտոնապես դեռևս որևէ հայտարարություն չկա, բայց, դատելով ամենաբարձր մակարդակներում առկա տեսանելի ինդիկատորներից, Իսրայելը լայնածավալ հարձակման է նախապատրատվում Գազայի՝ արդեն ցամաքային տարածքում,- «Փաստինֆո» լրատվականի հետ զրույցում ասում է Պատմական գիտությունների թեկնածու, վերլուծաբան Սերգեյ Մելքոնյանը։

Հիշեցնենք՝ռազմական ագրեսիվ գործողություններն իրայելա – պաղեստինյան հակամարտության գոտում չեն դադարում։ Իսրայելն ամբողջական շրջափակման մեջ է վերցրել Գազան։ Եգիպտոսը հրաժարվել է բնակիչների համար հումանիտար միջանցք տրամադրել՝ ասելով, որ հակամարտող երկու երկրները պետք է այդ հարցը կարգավորեն։

Սերգեյ Մելքոնյանը հավելում է՝ ՀԱՄԱՍ-ի ինֆրաստրուկտուրայի ընդհանուր հզորացումը, ինչպես նաև՝ կառույցի ղեկավարի գնդակահարումը կարելի է մեկնաբանել միայն և միայն առաջիկա սպասվելիք ցամաքային հարձակման օպերացիայով։

Անդրադառնալով Իսրայելի կողմից Սիրիայի հրթիռակոծմանը (այսօր հայտնի դարձավ,որ հարվածել է Դամասկոսի ու Հալեպի օդանավակայաններին-խմբ), բանախոսը նկատում է՝ իհարկե, Իսրայելը Սիրիան ռմբակոծում է՝ սկսած դեռևս 2012 – 14 թվականներից, նույնիսկ, ամենամսյա պարբերականությամբ, սակայն, վերջին հարձակումը՝ Դամասկոսի և Հալեպի օդանավակայանների ուղղությամբ, հստակ նպատակ էր հետապնդում. «Սա արվեց, որպեսզի Իրանի Իսլամական Հանրապետությունը զրկվի արագ կերպով զենք – զինամթերք տեղափոխելու հնարավորությունից, որը նա անում էր Սիրիայի տարածքում առկա աէրոդրոմների միջոցով, երկրորդ հերթին՝ սրանով լրջագույնս խոչընդոտվեց պատերազմական իրավիճակում Իրանի ռազմաքաղաքական ներկայացուցիչների շուտափույթ ներկայությունը Սիրիայում»։

Հարցին՝ հնարավո՞ր է արդյո՞ք Իսրայելը ընդլայնի ռազմական գործողությունների աշխարհագրություն՝ դրանք հասցնելով, ընդհուպ մինչև, Իրանի Իսլամական Հանրապետության ֆիզիկական սահմաններին, Սերգեյ Մելքոնյանն այս փուլում քիչ հավանական է համարում. «Այն էսկալացիան և կոնֆլիկտը, որ մենք հիմա տեսնում ենք, անուղղակի կերպով է առնչվում Իրանի Իսլամական Հանրապետությանը՝ առաջին հերթին թիրախավորելով, օրինակ, իրանական դիրքերն ու ռազմական հնարավորությունները, հենց, Սիրիայի տարածքում։ Մենք լսել են նաև կարմիր գծերի մասին, հնչած պրո -իրանական խմբավորումների անունից, որոնք գործում են Իրաքի տարածքում, որտեղ, եթե ԱՄՆ-ն միջամտի, իսկ Իսրայելը սկսի իր ցամաքային օպերացիան, ապա Իրաքն, անմիջապես, հարվածելու է իր տարածքում գործող ԱՄՆ – իսրայելական ենթակուցվածքներին։ Նույն բանը հայտարարել են նաև Սիրիայում գործող մի քանի խմբավորումներ, պատրաստ են աջակցել «ՀԶԲՈԼԱ»-ին, եթե նա որոշում կայացնի՝ միանալ։ Ասեմ, որ «ՀԶԲՈԼԱ»-ն անպայման կմիանա, եթե Իսրայելը ցամաքային օպերացիա սկսի Գազայի տարածքում»։

Անդրադառնալով ԱՄՆ նախկին նախագահ Դոնալդ Թրամփի՝ այսօր արված հայտարարությանը, թե Իսրայելը պետք է հարվածի Իրանին, Սերգեյ Մելքոնյանը նկատում է՝ Թրամփը միշտ է հակաիրանական դիսկուրսներ առաջ քաշել, սակայն հիմա՝ այս պահին, որևէ կողմ պատրաստ չէ պաղեստինա – իսրայելական հակամարտության աշխարհագրությունն ընդլայնել արաբա – իսրայելական տարածք։

Գնահատելով Գազայի՝ այս պահի հնարավորությունները, վերլուծաբանը նշում է՝ եթե Գազան միայնակ մնա հակամարտության այս փուլում, ապա, ՀԱՄԱՍ-ն, անկասկած, որևէ շանս չի ունենա.«Այստեղ շատ բան կախված է նաև Իրայելի քաղաքական կամքից։ Ինչո՞ւ է սա կարևոր, որովհետև իսրայելական վերջին ցամաքային օպերացիան, որ անցկացվում էր 2014 թ. ՀԱՄԱՍ-ի դեմ, որպես գլխավոր նպատակ, կրկին հայտարարվել էր՝ ՀԱՄԱՍ-ի ընդհանուր ինֆրաստրուկտուրայի ոչնչացումը։ Սակայն, մենք տեսնում ենք, որ 9 տարի անց, Իսրայելը, կրկին, նույն սպառնալիքի դեմ է հայտնվել։ Հիմա հարցերն այլ կերպ են դրված, առաջին՝ ունա՞կ է արդյո՞ք Իսրայելը շատ սեղմ ժամկետներում հասնել այդ նպատակին, իսկ ինձ թվում է, որ ոչ։ Երկրորդ՝ պատրա՞ստ է արդյո՞ք Իսրայելը երկարաժամկետ պատերազմի մեջ մտնել, թե՞ ոչ։ Իսկ, եթե հաշվի առնենք, որ սրան էլ միանում է Իսրայելի դեմ նոր ճակատների բացման վտանգը, ապա հնարավոր չէ հստակ պատասխաններ տալ, թե ի՞նչ արդյունքներով այս պատերազմից դուրս կգան Իսրայելն ու Գազան»,- ամփոփելով զրույցն ասում է վերլուծաբան Սերգեյ Մելքոնյանը։

Աղբյուր` Փաստինֆո