Փաստ ինֆո

Աշոտ Փաշինյանին իբրև առևանգելու գործով ձերբակալված Գայանե Հակոբյանի՝ պատերազմում նահատակված Ժորա Մարտիրոսյանի մոր, և Աշոտ Փաշինյանի միջև առերես հարցաքննություն դեռևս չի իրականացվել, թեև պաշտպանները երեկվանից են պահանջում ապահովել Գայանե Հակոբյանի հակընդդեմ հարցման իրավունքը, ինչը փաստացի առ այս պահը չի իրականացվում։ Ավելին, քննիչի հետ անգամ կապ հաստատել չի հաջողվում։ Այս մասին «Փաստինֆո»-ն տեղեկանում է Գայանե Հակոբյանի պաշտպաններից։

Հիշեցնենք, որ երեկ Նիկոլ Փաշինյանի ընտանիքին պատկանող «Հայկական ժամանակ» օրաթերթը գրել էր՝ Աշոտ Փաշինյանին զոհված զինծառայողների ծնողների կողմից իբրև առևանգելու փորձի մասին՝ նշելով, թե իբրև Աշոտ Փաշինյանին նստեցրել են ավտոմեքենան, ապա ՀԺ-ի կողմից հրապարակվել է տեսանյութ, թե ինչպես է Աշոտ Փաշինյանն իրեն դուրս նետվում ավտոմեքենայից։ Հատկանշական է, որ ՀԺ հրապարակմամբ նշվում էր մի քանի ծնողի տվյալներ, նշվում կոնկրետ անուն՝ Գարիկ Գալեյան, սակայն հետագայում պարզվեց՝ ավտոմեքենայի ղեկին եղել է միայն Գայանե Հակոբյանը։ Իսկ «Որդիների կանչ» ՀԿ-ի կողմից տարածված տեսանյութից պարզ էր դառնում, որ Աշոտ Փաշինյանը սեփական կամքով է նստել մեքենան։

Ավելի ուշ արդեն պաշտոնապես հայտնի դարձավ, որ Աշոտ Փաշինյանը հանցագործության մասին հաղորդում է ներկայացրել, ինչի հիման վրա ՀՀ ՔԿ Երևան քաղաքի քննչական վարչության ծանր հանցագործությունների քննության բաժնում նախաձեռնվել է քրեական վարույթ՝ ՀՀ քրեական օրենսգրքի 191-րդ հոդվածի 2-րդ մասի 1-ին կետի հատկանիշներով։ Ոստիկանության ծառայողների կողմից բերման էին ենթարկվել զոհված զինծառայողի չորս ծնող, այդ թվում՝ տիկին Գայանեն, որն արդեն քրեական վարույթի շրջանակներում ձերբակալվել է։ Գայանե Հակոբյանի առողջական վիճակը կտրուկ վատացել էր, ինչի հետևանքով գիշերը նրան տեղափոխել են «Էրեբունի» ԲԿ, որտեղ կարճ ժամանակ բուժօգնություն ցուցաբերելուց հետո նրան կրկին տեղափոխել են ՁՊՎ։

Փաստաբան Վահան Հովհաննիսյանը տիկին Գայանեի հետ տեսակցելուց հետո «Փաստինֆո»-ի հետ զրույցում հայտնեց, որ նրա ինքնազգացողությունը շարունակում է վատ լինել, երեկվանից սնունդ չէր ընդունել, անգամ ԲԿ-ից ՁՊՎ է տեղափոխվել՝ դեռևս բուժումը չավարտած։ Պաշտպանները երեկվանից էին պահանջում տիկին Գայանեին առերես հարցաքննել Աշոտ Փաշինյանի հետ, քանի որ հենց նրա հաղորդման և ցուցմունքի հիման վրա է այժմ ձերբակալված Գայանե Հակոբյանը, սակայն քննիչը երեկ հրաժարվել է հարցաքննել նրանց, իսկ այսօր, ինչպես մեզ հետ զրույցում հայտնեց պաշտպան Գեորգի Մելիքյանը, առ այս պահը չեն կածողանում կապ հաստատել քննիչի հետ։ Պաշտպանները նաև միջնորդություն են ներկայացրել՝ պահանջելով, որ վարութային ապացուցողական գործողություններ իրականացվեն, պարզվի, թե ինչպես է Աշոտ Փաշինյանի՝ իբրև մեքենայից նետվելու տեսանյութը հայտնվել Նիկոլ Փաշինյանի ընտանիքին պատկանող «Հայկական ժամանակի» տրամադրության ներքո։ Պաշտպան Գեորգի Մելիքյանը մանրամասներ հայտնեց՝ նշելով, որ Գայանե Հակոբյանն ավտոմեքենայում մենակ էր, ապացույց է ներկայացվել, թե ինչպես է Աշոտ Փաշինյանը նստում ավտոմեքենան, այդ ընթացքում նա կաշկանդված չէր, որևէ ագրեսիվ վարքագիծ չի ցուցաբերել, առկա չէր նրա կամքին հակառակ ինչ-որ գործողություն իրականացնելու ռիսկեր, ավելին, տիկին Գայանեն մյուս ծնողներին խնդրել է հեռու գնալ, նշել, որ ցանկանում է միայնակ խոսել նրա հետ, երկուսով նստում են ավտոմեքենան, տիկին Գայանեն ասել է, որ ցանկանում է գնալ «Եռաբլուր», երեխաների աչքերին նայելով խոսել նրա հետ, ինչին էլ համաձայնել է Աշոտ Փաշինյանը։

«Այսինքն՝ այն հանգամանքները, որ թույլ չի տվել որևէ մեկին նստել ավտոմեքենան, որ ոչ մի սպառնալիք, բռնություն չկա, զարմանում եմ ինչպես կարելի է այս պայմաններում բնութագրել, թե առևանգման ռիսկեր են եղել»,- նշեց Մելիքյանը, ապա, անդրադառնալով Աշոտ Փաշինյանի կողմից իբրև ավտոմեքենայից դուրս նետվելու տեսանյութին, պաշտպանը տեղեկացրեց, որ ըստ տիկին Գայանեի՝ ինքն էլ է զարմացել, երբ Աշոտ Փաշինյանի հետ խոսելիս վերջինս բացել է դուռը և դուրս եկել։ Ընդ որում՝ մեքենան շատ դանդաղ է ընթացել այդ պահին, Աշոտ Փաշինյանն այդ ընթացքում իրեն ոչ թե նետել է, այլ դուրս է եկել և ընկել ։ Պաշտպանն ընդգծում է՝ ՔԿ տրված հաղորդման հիման վրա մանրամասն ցուցմունք է տրվել, բոլոր դրվագների վերաբերյալ Գայանե Հակոբյանը մանրամասն հերքող տեղեկություններ է հայտնել՝ նաև օբյեկտիվ իրականության մեջ դրանք տեղի ունենալու անհնարինության մասին։ Ըստ պաշտպանի՝ օբյեկտիվ քննությամբ կպարզվի, որ որևէ առևանգում տեղի չի ունեցել։ Գեորգի Մելիքյանը նաև արձանագրեց, որ երեկ դատական նիստ է եղել Վարչական դատարանում և, բոլոր ծնողները, ամեն դատական նիստից հետո մշտապես գնացել են «Եռաբլուր» և այնպես չէ, որ Աշոտ Փաշինյանին տեսել են և որոշել գնալ «Եռաբլուր»։

«Քանի որ տիկին Գայանեի համար եղել է սովորական դատական նիստ և ինքը պետք է գնար Եռաբլուր, ցանկացել է զրուցել նրա հետ և առաջարկել է իր հետ գնալ, խոսել, նա էլ՝ համաձայնել է։ Այնտեղ եղել է երկար ճանապարհ, դանդաղ ընթացք, ճանապարհին վթար է եղել, կանգնել է մեքենան։ Այսինքն՝ այդ ամբողջ ճանապարհին Աշոտ Փաշինյանը որևէ վտանգ չի զգացել իր կյանքին, թե ինչու է նման հաղորդում ներկայացրել՝ Աշոտ Փաշինյանին կլսենք առերեսման ժամանակ»,- նշեց պաշտպանը՝ հավելելով, որ Գայանե Հակոբյանի ցուցմունքով օբյեկտիվորեն հերքվել են հաղորդման մեջ առկա հանգամանքները. «Մեկ կին և մեկ տղամարդ, կինը մեքենայի ղեկին է և կաշկանդված՝ մեքենան վարելու ընթացքով, ինչպե՞ս կարող էր առևանգել։ Եթե առևանգելու միտում ունենար, մյուս ծնողները կնստեին մեքենայի հետեւում, որ Աշոտ Փաշինյանն իսկապես չկարողանար փախչեր։ Բացի այդ, մեքենան հնարավորություն ուներ կոճակով փակելու դռները և Աշոտ Փաշինյանը չէր կարողանա բացել և դուրս գալ։ Նման գործողություն չի եղել, նա հանգիստ բացել է դուռը։ Հետագայում ինչ-որ անձանց անբարեխիղճ միջամտությամբ, որ փորձել են առևանգման սցենար գծել, ընդամենը նման նկարագիր են ներկայացրել, ինչը հերքվում է հենց իմ կողմից մատնանշված հանգամանքներով »։

Հեղինակ՝ Իզաբել Սահակյան

Աղբյուր` Փաստինֆո