Փաստ ինֆո

«Վանոյի Արտակին»՝ Արտակ Գալստյանին խոշտանգելու դեպքով ԱԱԾ-ում քրեական վարույթ չի նախաձեռնվել, իսկ պաշտպանի ներկայացրած հաղորդումը քննության առարկա կդարձվի ՔԿ-ում, այսինքն, հենց այն կառույցում, որտեղ էլ իրականացվել է խոշտանգումը։

«Այսինքն, ոնց որ՝ մեկի վրա հաղորդում տաս, հենց այդ մեկն էլ կքննի քո գործը»,- «Փաստինֆո»-ի հետ զրույցում ասաց փաստաբան Արսեն Մկրտչյանը՝ հավելելով, որ Արտակ Գալստյանի կողմից ներկայացված հաղորդումն ուղարկվել էր ԱԱԾ, իսկ իրենը՝ ՔԿ, թեև այդ հաղորդումը ևս պետք է ուղարկվեր ԱԱԾ: Առնվազն անհասկանալի է այդ ամենը, միևնույն ժամանակ, սպասելի էր, որ այսօր ՀՀ-ում չկա այնպիսի մարմին, որ կարողանար օբյեկտիվ քններ Արգիշտի Քյարամյանի կատարած խոշտանգումը։ Բացի այդ, պաշտպանը մեկ նրբություն ևս արձանագրեց՝ կապված ԱԱԾ-ի կողմից քրեական վարույթ չնախաձեռնելու ԱԱԾ որոշման հետ.« 2024թ.-ից ԱԱԾ քննչական դեպարտամենտն այլևս չի լինելու, դա ևս մտնելու է Արգիշտի Քյարամյանի ՍՊԸ-ի մեջ , հետևաբար, կանխատեսելի էր: Ո՞ր մի քննիչն իր ղեկավարի դեմ վարույթ կքննի։ Դա նորմալ բան չէ»։

Ինչ վերաբերում է Արտակ Գալստյանի մասնակցությամբ քննչական գործողություններին, պաշտպանը նշեց, որ տեղյակ է մեկ գործողության մասին. «Որ մեկ պաշտպանից հրաժարվելու և մյուս պաշտպանին ներգրավելու պատրվակով Արտակ Գալստյանին տեղափոխել են ՔԿ Երևան քաղաքի քննչական վարչություն և այդտեղ «ոչ վարույթային» խոսակցություն ունեցել»։ Թե ինչ խոսակցություն է եղել, պաշտպանը մանրամասներ չհայտնեց: Ըստ նրա` մեկ քննչական գործողություն եղել է, որը, ըստ պաշտպանի, բավարար էր պնդելու համար, որ Արտակ Գալստյանի հետապնդումն ավելի շատ իրավաբանության նկատմամբ ծաղր էր, կարող էր որևէ ԶԼՄ-ում տպագրվեր՝ որպես հումոր։
Անդրադառնալով Արտակ Գալստյանի նկատմամբ ՔԿՀ-ում իրականացվող օպերատիվ-հետախուզական միջոցառումներին՝ պաշտպանը նշեց, որ դրանք այն մակարդակով են իրականացվում, որ, եթե այդ ՕՀՄ-ները հանձնարարվեր իր թոռներին՝ ավելի բարձր մակարդակով կկատարվեին։ Արտակ Գալստյանի տեսակցությունները ևս սահմանափակված են, միևնույն ժամանակ, պաշտպանը նշում է, որ հարազատներին տեսակցելու անհրաժեշտությունն էլ իրականում չկա, քանի որ որևէ մեկը չի ցանկանում, որ իրականացվող ՕՀՄ-ների պայմաններում հարազատներին տեսակցեն։

«Առանց այն էլ մտել են մարդու անձնական կյանք։ Այսինքն՝ ընտանիքի անդամներին են բերման ենթարկել, սթրեսի մեջ պահել, նախքան ամուսնությունը, ամուսնությունից հետո առկա գույքերի վրա արգելանք դրել, առգրավել ապրուստի միջոցներն առ այն, որ չկարողանան իրենց հարցերը լուծել։ Այստեղ այնքան առերևույթ այնքան նենգ, մանրահոգի, սպային ոչ վայել, «խուժանական» հետապնդում է՝ թե՛ որակական, թե՛ մասնագիտական առումով, թե՛ արժանապատվության առումով։ Գիտեք, նույնիսկ վրեժ լուծելուց մարդն իրեն հարիր բարձունքում է գտնվում։ Այստեղ գործ ունենք այն իրավիճակի հետ, որ իրականացվող քայլերը ոչ միայն սպային, բարձրաստիճան պաշտոնյային, այլև՝ արժանի տղամարդուն հարիր չէ։ Ես իրեն միայն այդ պատճառով էլ պաշտպանում եմ, որովհետև իր նկատմամբ իրականացվողը տղամարդուն վայել չէ, ցածրություն է։ Այսինքն՝ Արտակ Գալստյանից հարցնում են մի բան, որի հասցեատերը ինքը չէ, մեղադրում են մի բանում, հետապնդում՝ այլ բանի համար, պահանջում են մեկ այլ բան»,- նշեց նա՝ հավելելով, որ պաշտոնատար անձանց կողմից նենգ խոսակցություններ են վարվում, քրեական հետապնդումը խայտառակ իրավիճակի մեջ դրեց հետապնդումն իրականացնողներին, այլ ազդեցություն ունեցավ, հասավ՝ ճիշտ հակառակ էֆեկտի։

Նշենք, որ Արտակ Գալստյանին կալանավորելու որոշման դեմ բողոք է ներկայացվել, որը մակագրված է Վերաքննիչ քրեական դատարանի դատավոր Արսեն Նիկողոսյանին։ Բողոքը քննվում է գրավոր ընթացակարգով, կողմը դեռևս տեղեկացված չէ որոշման մասին, սակայն հույսեր, դատավորի անձով պայմանավորված, ունեն։

Հիշեցնենք, որ Արտակ Գալստյանը՝ «Վանոյի Արտակը», ձերբակալվել, ապա՝ կալանավորվել է 2023թ. ապրիլի 17-ին՝ առանձնապես խոշոր չափերով շորթում կատարելու մեղադրանքով։ Քրեական գործի տվյալներով՝ «Հանրային ձայն» կուսակցության նախագահ Արտակ Գալստյանը և նույն կուսակցության պատվավոր նախագահ Վարդան Ղուկասյանը միմյանց հետ նախնական համաձայնություն են ձեռք բերել Տիգրան Արզաքանցյանից առանձնապես խոշոր չափերով շորթում կատարելու վերաբերյալ։ 2022թ. մարտի 23-ին Ա. Գալստյանը հեռախոսակապ է հաստատել Տիգրան Արզաքանցյանի հետ և պահանջել 53.806.500 ՀՀ դրամին համարժեք 110.000 ԱՄՆ դոլար գումար տրամադրել իրենց՝ հակառակ դեպքում նրա և նրա կնոջ վերաբերյալ Վ. Ղուկասյանի կողմից վարվող «Հանրային ձայն» հաղորդաշարի ընթացքում կհրապարակվեն նրանց պատիվն ու արժանապատվությունը նվաստացնող, բարի համբավն արատավորող տեղեկություններ։ Տ.Ա.-ն չի կատարել նրանց պահանջը, որի հետևանքով Վ.Ղ.-ն իր youtube.com տեսանյութերի հրապարակման կայքում բացված էջով 2022թ. հոկտեմբերից մինչև 2023թ. փետրվարն ընկած ժամանակահատվածում մի քանի անգամ հրապարակել է նման տեղեկություններ։ Քրեական վարույթով պարզվել է նաև Վարդան Ղուկասյանի կողմից քաղաքացիներից սպառնալիքով գումար շորթելու այլ դեպքեր ևս՝ շուրջ 46 դրվագ։

Հեղինակ՝ Իզաբել Սահակյան

Աղբյուր` Փաստինֆո