Փաստ ինֆո

Արցախի՝ սահմանամերձ դարձած Խրամորթ գյուղում աշխատանքային եռուզեռ է. բնակիչները որոշել են՝ տնամերձ հողատարածքներում ազատ սանտիմետր չպիտի մնա։ Շրջափակումով արցախցուն խեղճացնելու թշնամու ծրագրերին կուլ գնալ չեն պատրաստվում այստեղ։

Տիկին Զարինեն արդեն լոլիկի սածիլներն է պատրաստվում դնել, կարտոֆիլի սերմն էլ մի քանի օրից հողում կդնի։

«Ջերմոց էին բերել բաժանել ցանկացողներին։ Տարբեր տեսակի կանաչեղեն էի ցանել՝ համեմ, սամիթ, սպանախ։ Ամբողջ ձմեռ կանաչի ենք ունեցել։ Ճիշտ է, չեմ վաճառել, բայց մեզ լիովին բավարարել է, անգամ հարևաններիս եմ տվել։ Հիմա ջերմոցի մի մասը մաքրել եմ, որ լոլիկի սածիլները դնեմ»,- «Փաստինֆո»-ի հետ զրույցում ասում է տիկին Զարինեն։

36 քառ. մետր մակերեսով ջերմոցը տիկին Զարինեն նպատակ ունի ամբողջ տարին մշակել։ Ասում է՝ տնամերձ հողատարածքում տարբեր պտղատու ծառեր ունեն, բայց քանի դեռ չեն տերևակալել ծառերը, այդ ազատ տարածքներն էլ կօգտագործեն։

«Կարտոֆիլի տեղն արդեն բացել ենք, պատրաստել, լոբին էլ շուտով կցանենք։ Շրջափակման պատճառով շատ ենք զգացել կարտոֆիլի, կաղամբի, գազարի կարիք։ Դրա համար էլ այս տարի, անցած տարիների համեմատ, ամեն ինչից էլ շատ ենք ցանելու։ Ամեն տարի, եթե լոբին միայն թարմ ուտելու համար էինք ցանում, այս անգամ շատ ենք անելու կարտոֆիլը, կաղամբը նույնպես»,-ասում է տիկին Զարինեն։

Մեր զրուցակիցը ցավով նկատում է՝ նախքան պատերազմը ու հատկապես մինչև ադրբեջանցիների ներխուժումը Փառուխ ու Քարագլուխ, թե՛ իր ընտանիքը, թե՛ մյուս խրամորթցիները բավականին լավ էին ապրում. անասուն էին պահում, ցորեն ու գարի ցանում, հողից ստացած բերքով լիովին բավարարում էին իրենց կարիքները և որ ամենակարևորն է՝ ապահով ու անվտանգ էին ապրում սեփական հողում։

«10 հա վարելահող ունեինք վարձակալած, ցորեն էինք ցանում։ Անասուններ ունեինք ահագին, քանի որ խոտի խնդիր չկար, իսկ հիմա թշնամին զավթել է թե՛ վարելահողերը, թե՛ խոտհարքերն ու արոտավայրերը։ Ընդամենը 1 հա վարելահող է մնացել, էն էլ թշնամու ուղիղ նշանառության տակ է։ Այնքան մոտ են ադրբեջանցիների դիրքերը, որ իրար հետ կռվում են, հայհոյում, ձենները մեր տանը լսվում է։ Էլ ինչպե՞ս կարող ենք մշակել էդ դիրքերին կպած մեր հողերը։ Որոշել էինք գարի ցանել, բայց քանի նոր շատ վտանգավոր է, չցանեցինք»,-նշում է խրամորթցի մեր զրուցակիցը։

Այդուհանդերձ, տիկին Զարինեն վստահեցնում է՝ թեկուզ ոռոգման խնդիր ունեն, բայց և այնպես՝ աշխատելու են գոնե տնամերձ հողատարածքում ազատ կտոր չթողնել, որպեսզի շրջափակումով Ադրբեջանը չկարողանա ճնշել իրենց։

Աղբյուր` Փաստինֆո