Փաստ ինֆո

«Հայաստան» խմբակցության ներսում տարաձայնություններ չեն եղել, պարզապես մանդատը վայր դրած պատգամավորները գտել են, որ խորհրդարանում նիստերին մասնակցելը նպատակահարմար չէ: «Փաստինֆո»-ի հետ զրույցում ասել է «Հայաստան» խմբակցության ղեկավար Սեյրան Օհանյանը:

Հիշեցնենք, որ երեկ «Վերածնվող Հայաստան» կուսակցությունը հայտարարեց ԱԺ-ում իր գործունեությունը դադարեցնելու մասին: «Վերածնվող Հայաստան» կուսակցության ղեկավար Վահե Հակոբյանը, անդամներ Հռիփսիմե Ստամբուլյանը և Ելենա Կիրակոսյանն էլ վայր դրեցին մանդատները:

Ըստ էության, «Վերածնվող Հայաստան»-ի դուրս գալուց հետո «Հայաստան» դաշինքը, կարելի է ասել, մասնատվեց:
Շատ են պնդումները, որ «Վերածնող Հայաստան» կուսակցության և «Հայաստան» դաշինքի մյուս անդամների միջև լուրջ տարաձայնություններ են եղել՝ ԱԺ վերադառնալ-չվերադառնալու հետ կապված:

«Փաստինֆո»-ի հետ զրույցում խմբակցության ղեկավար Սեյրան Օհանյանը, սակայն, վստահեցրեց, որ տարաձայնություններ չեն եղել, և մանդատները վայր դրած պատգամավորների հետ հարաբերությունները պահպանվել են.

«Ներդաշինքային քննարկումների ժամանակ բոլորս տեսակետներ ենք արտահայտել: Իրենք որոշել են, որ ԱԺ նիստերին մասնակցելն այլև նպատակահարմար չէ ու մանդատները վայր են դրել: Մենք հարգում ենք իրենց այս որոշումը: Իրենք մնում են մեր թիմակիցները, համագործակցությունը շարունակվելու է»,-ասաց Օհանյանը:

Հարցին՝ դաշինքի հաջորդ համարներն արդեն հայտնե՞լ են իրենց դիրքորոշումը՝ մանդատը վերցնելու մասին, պատգամավորն ասաց.

«Դեռ որոշում չկա այս մասով, երբ վերջնական որոշումը լինի, կտեղեկացնենք»,-ասաց Օհանյանը:

Աղբյուր` Փաստինֆո