Փաստ ինֆո

«Անընդհատ ասում են՝ Բաքվից ես, թուրք ես, գնա Թուրքիա։ Ինչու պետք է գնամ Թուրքիա, եթե ես հայ եմ, դա առաջին։ Այստեղ՝ Հայաստանում թուրք չկա՞։ Թուրքը թաթը որտեղ դնում է, տալիս են՝ հայտնի հեքիաթի նման՝ էս սարն իմն է, էս ծառն իմն է»։ Այս մասին ՀՀ-ում ՄԱԿ-ի գրասենյակի դիմաց ակցիայի ժամանակ ասաց արցախցի փախստական կինը։

«Հիմա մենք դատարկ նստած ենք։ Ոչ մի ակնկալիք չունենք։ Որոշել են 40-հազարական դրամ տալ, բայց դրանից էլ դեռ տեղեկություն չկա, սպասում ենք։ Իմ միակ երազանքը, որ ես գնամ իմ տուն»,- ասում էր  հադրութցի կինը՝ հավելելով, որ որեւէ աջակցություն չեն ստացել։ Բնակվում են վարձով, հիմա էլ տանտերը հանում է տնից՝ ասելով. «Եթե գումար ունեք՝ գնեք, այլապես դուրս եկեք»։

Արցախից բռնի տեղահանվածների ճակատագիրն անհայտ է։ Պետության հովանավությունն էլ՝ չնչին։ Նրանց խոսքով՝ Արցախից տկլոր փախած ժողովրդին 40 հազար դրամ աջակցություն է տրվում, որը օգտագործվել է կենցաղային ապրանքների, հագուստի, տան վարձի վրա։ Այս ամենի պատճառը, տիկնոջ խոսքով, իրենք չեն։ Այս իրավիճակում իրենք պարտադրված են հայտնվել։ 

«Մեր ցանկությունն է, որ մեզ տուն տան։ Այսինքն՝ հիպոթեք ձեւակերպեն, որ այսօր տանտերը չգա, ասի՝ գիտեք, ես տունս վաճառում եմ կամ վարձը թանկացնում եմ։ Կամ մեզ կարգավիճակ թող տան, կամ բնակեցնեն որևէ տեղ։ Կառավարությանը բազմիցս դիմել ենք, սակայն ոչ մի պատասխան։ Մենք գնանք Արցախ ինչ անենք, թուրքն արդեն Արցախում է։ Երրորդ տարին է արդեն այստեղ ենք, մի տնից տուն ենք տեղափոխվում ու ոչ մի բան։ Ստեփանակերտ չենք կարող գնալ, այնտեղ մնալու տեղ չունենք, հետո էլ այնտեղ պետք է վճարես օրավարձով։ Եվ հետո մենք, եթե գնանք, կգնանք միայն Հադրութ»,- ասաց կանանցից մեկը՝ ավելացնելով, որ հիմա շատ է փոխվել ղարաբաղցիների նկատմամբ վերաբերմունքը։

Մանւրմասները՝ տեսանյութում։

Աղբյուր` Փաստինֆո