Փաստ ինֆո

Մեր կառավարությունն իր գործողություններում և հայտարարություններում հրապարակային է:Այն, ինչ փակ դռների հետևում է, նաև բաց դռների հետևում է: Այս մասին լրագրողների հետ զրույցում հայտարարել է ՀՀ վարչապետի աշխատակազմի ղեկավար Արայիկ Հարությունյանը:

Անդրադառնալով ընդդիմության ակցիաներին՝ նա նշել է, որ ընդդիմադիրները գործընկերային լինելու դեպքում գործընկերային վերաբերմունք կստանան, բայց եթե ընդդիմությունը ինչ-որ պահանջներ է ներկայացնում ու բարոյականության, քաղաքակրթության սահմաններից դուրս է գալիս, ապա իշխանությունն էլ իր բարձրությունից դրան պետք է պատասխանի, բայց եթե ընդդիմությունը շարունակում է նույն կերպ գործել, պարզապես մերժման կենթարկվի.

«Մի հատ նայեք՝ ընդդիմությունն  ինչպես է իրեն պահում.  ներխուժելով ԱԳՆ շենք, ինչպես էր իրեն պահում այն մարդկանց հետ, որոնք բանակցում են Արցախի խնդրի համար: Ընդդիմությունը, թեպետ թույլ է և նրանց ազդեցությունն էլ թույլ է, բայց խնդիրներ է ստեղծում արտաքին քաղաքական դաշտում՝ տվյալ անձանց գործունեության հետ կապված»,-ասաց նա:

Հարությունյանի խոսքով՝ ընդդիմությունը չէ, որ պետք է ստիպի, որպեսզի իշխանությունը շեղվի իր ծրագրերից.

«Ես ուզում եմ, որ բոլորն օգնեն այն իշխանությանը, որը նախորդ տարի ստացել է մեր ժողովրդի գերակշիռ մեծամասնության քվեն: Մեկ տարի առաջ մեր ժողովուրդը պատասխանը տվել է, հիմա ընկել են դռնեդուռ, հուսահատությունից փորձում են ինչ-որ օրակարգեր շեղել: Գործող իշխանությունը չի պատրաստվում մի փոքր խմբի ազդեցության տակ շեղվել իր ռազմավարությունից ու մարտավարությունից», -ասաց Փաշինյանի աշխատակազմի ղեկավարը:

Աղբյուր` Փաստինֆո