Փաստ ինֆո

Պետք է վերադառնանք մեր ով լինելուն և չմոռանանք, որ մենք առաջին հայ քրիստոնյա ազգն ենք. Հիսուս Քրիստոսի արձանի գաղափարն արվեստագետների ուշադրության կենտրոնում։

«Ես, լինելով հայ քրիստոնյա, իհարկե կողմ եմ այս Աստվածահաճո նախաձեռնությանը»,-ասել է երգչուհի Նունե Եսայանը՝ ողջունելով Հիսուս Քրիստոսի արձանը տեղադրելու Գագիկ Ծառուկյանի նախաձեռնությունը։ Միաժամանակ ժողովրդական արտիստը նկատում է՝ արձանը պետք է դրվի այնպիսի բարձունքում, որ այն միշտ ուղեկցի՝ քաղաքի ցանկացած անկյունում լինելու դեպքում։

«Աստծո կամքով թող ի կատար ածվի գաղափարը»,- նշել է երգչուհին և հավելել, որ Բեյրութում է տեսել Հիսուսի արձանը։ «Ամեն անգամ այդպիսի վայր այցելելիս՝ իսկապես լռում ես, սթափվում և ուզում ես հասկանալ անցյալը՝ որտեղից ենք գալիս, ով ենք մենք»,-ասում է երգչուհին՝ նկատելով, որ երբեք չպետք է մոռանանք, որ մենք առաջին հայ քրիստոնյա ազգն ենք։

Ժողովրդական արտիստ Ներսիկ Իսպիրյանը պատմել է, որ Քրիստոսի արձանը տեսել է Ռիո դե ժանեյրոյում, որտեղ այն տեղադրված է այնպիսի վայրում, որտեղից ամբողջ քաղաքը մի հայացքից երևում է։ Մարդիկ գնում են այնտեղ մեկն իր մեջ ուխտ ունենալով, մյուսը՝ հետաքրքրությունից։

Ողջունելով Քրիստոսի արձանը տեղադրելու նախաձեռնությունը՝ արտիստն ասում է, որ շատ կարևոր է վայրը, թե որտեղ է Հայաստանում տեղադրվելու Հիսուսի արձանը։ «Տուրիստները տարբեր երկրներից կգան՝ հետաքրքրվելու և այդ ամբողջ եկամուտը կծառայի մեր ժողովրդի տնտեսական վիճակը բարելավելուն։ Այդ ամբողջ տուրիզմի հասույթը պետք է ծառայեցնենք Հայոց բանակին, հայ զինվորին»։

Քանոնահարուհի Հասմիկ Լեյլոյանի կարծիքով՝ Հիսուս Քրիստոսի արձանը դեռ անկախությունից՝ 90-ական թվականներից պետք է տեղադրվեր ու ամբողջ աշխարհին տեղեկացվեր, որ մենք առաջին քրիստոնյա ազգն ենք, երկիրն ենք։ «Սա արդեն ուշացում է»,- ասում է քանոնահարուհին՝ նշելով, որ Քրիստոնեության ընդունման 1700 -ամյակն էլ նշվեց առանց Քրիստոսի արձանի։ Նրա կարծիքով՝ դա էլ 2-րդ ուշացումն է։ «Այդ ժամանակ ես դրա մասին շատ էի խոսում, նեղվում, որ այդ արձանի կարիքը շատ կա»,- ասում է Լեյլոյանը։

Մշակույթի, արվեստի գործիչները, շոու-բիզնեսի աստղերը համոզված են՝ Արարչի կոթողի կառուցումը եւս մեկ անգամ աշխարհի ուշադրությունը կսեւեռի բիբլիական Արարատ ունեցող երկրի վրա։

Մանրամասները՝ տեսանյութում

Աղբյուր` Փաստինֆո