Փաստ ինֆո

2022թ-ի պետական բյուջեի նախագիծը բացարձակապես չի համապատասխանում Հայաստանի առջև ծառացած մարտահրավերներին: ԱԺ-ում բյուջեի քննարկման ժամանակ ասաց «Հայաստան» խմբակցության պատգամավոր Անդրանիկ Թևանյանը:

Պատգամավորի արձանագրմամբ՝ պաշտպանության ոլորտին հատկացված գումարները հուշում են, որ սահմանները շարունակելու են մնալ խոցելի, իսկ բանակում արդիականացում չի լինելու.

«2020թ-ից հետո կառավարությունը խոստացել էր բանակի վերակառուցում, ինչը ենթադրում էր համապատասխան բարեփոխումներ և դրա իրականացման համար համապատասխան գումարներ, սակայն դրանք չկան: Փոխարենը, պատերազմից հետո մոտ 5 անգամ ավելացվել են ծախսերը՝ արտասահմանայան ծառայողական գործուղումների համար, կրկնակի ավելացվել են նաև ներկայացուցչական, գրասենյակային և հագուստի համար հատկացվող գումարները»,-ասաց Թևանյանը:

Ըստ նրա՝ եթե այս ծախսերը կրճատվեին, ապա կտնտեսվեին հսկայական միջոցներ և հնարավոր կլիներ մեր հանրության խոցելի շերտերից մեկի՝ շուրջ կես միլիոն թոշակառուների թոշակն ավելացնել գոնե 5000 դրամի չափով.

«Թոշակառուների 3%-ի համար ընդամենը 2100 դրամով թոշակ բարձրացրեցին և ասացին՝ այլևս միջոցներ չունենք, իրենց «պադավատի», արտասահմանյան գործուղումների և այլ անիմաստ բաների համար բյուջեում փող գտնվում է, իսկ երբ հերթը հասնում է թոշակառուներին, փող չկա»,-ասաց նա:

Աղբյուր` Փաստինֆո