Փաստ ինֆո

Քաղաքական հայացքների, ինձ հետ շփում ունենալու պատճառով այս ընթացքում 4-5 հոգու ազատել են իրենց զբաղեցրած պաշտոններից։ «Փաստինֆո»-ի հետ զրույցի ժամանակ ասաց «Մամիկոն Ասլանյան» դաշինքի ցուցակը գլխավորող Մամիկոն Ասլանյանը։

Նշենք, որ դեկտեմբերի 5-ին Վանաձորում տեղի են ունենալու ՏԻՄ ընտրություններ, որին մասնակցում է 10 քաղաքական ուժ։

Մամիկոն Ասլանյանը նշում է, որ գրեթե բոլոր քաղաքական ուժերը քարոզարշավի ժամանակ իրենց նորմալ, կոռեկտության սահմաններում են պահել, սակայն արձանագրվել է առանձին ուժերի կողմից քաղաքացիների նկատմամբ ճնշումներ կիրառել փորձեր։

«Աշխատանքից ազատել են արյունաբանական կենտրոնի տնօրենին, պոլիկլինիկայի տնօրենին, մանկապարտեզի տնօրենին, մարզադպրոցի տնօրենին։

Աշխատանքից ազատվածները նշում են, որ պատճառը զուտ քաղաքական հայացքներն են եղել, այդ թվում այս կամ այն մարդուն համակրելու, նկարը լայքելու, նրա հետ շփվելու համար։ Օրինակ՝ ինչ-որ նյութ է եղել, որտեղ մարզպետի նկարին են անդրադարձել և պոլիկլինիկայի աշխատակցուհիներից մեկը լայքել է այդ գրառումը, ինչի պատճառով պոլիկլինիկայի տնօրենին աշխատանքից հեռացրել են»,-ասաց Մամիկոն Ասլանյանը՝ հավելելով, որ աշխատանքից ազատվածների հիմնական մասն իր հետ շփումներ ունեցել է։

Հարցին՝ հնարավոր համարու՞մ է քվեարկության օրն էլ նմանատիպ երևույթներ լինեն, Մամիկոն Ասլանյանն ասաց. «Նման փնթի վարվելակերպի մարդկանցից ամեն ինչ էլ սպասում եմ, բայց վանաձորցին անդրդվելի է և չի հանդուրժի նման երևույթներ, հետևաբար ընտրությունը կատարելու է վանաձորցին գաղտնի քվեարկությամբ և որևէ մեկը չի կարող ճնշել, վերահսկել»։

Աղբյուր` Փաստինֆո