Փաստ ինֆո

ԶՈւ ԳՇ պետը օրենքի խախտումով սահմանված ժամկետում չի պատասխանում իմ գրությանը, սա խորքային պատճառներ ունի: Այս մասին այսօր լրագրողների հետ զրույցում հայտարարեց «Պատիվ ունեմ» խմբակցության պատգամավոր Տիգրան Աբրահամյանը:

Նշենք, որ պատգամավորն ավելի վաղ դիմել էր ԳՇ պետ Արտակ Դավթյանին՝ տեղեկացնելով, որ որպես ԱԺ Պաշտպանության և անվտանգության հանձնաժողովի մշտական անդամ, ցանկանում է այցելել սահմանագծի Սոթք-Խոզնավար հատված և ծանոթանալ տիրող իրավիճակին։ 

Պատգամավորի խոսքով՝ այս հատվածներում արդեն իսկ ձմեռային սեզոնը սկսված է, ուստի իր համար կարևոր է հասկանալ, թե այդ հատվածներում ինչպիսի՞ պաշտպանական համակարգեր են ստեղծված, արդյոք ԶՈՒ-ն հնարավորություն ունի իրականացնելու ինչպես էֆեկտիվ մարտական հերթապահություն, այնպես էլ պաշտպանական գործողություններ.

«Փաստացի մայիս ամսին թույլատրվել է ադրբեջանցիների ներխուժում ՀՀ տարածք, և մինչև այժմ ռազմաքաղաքական ղեկավարությունից որևէ մեկը դրա համար պատասխանատվություն չի կրել: Այս բացը բերում է նոր եզրահանգումների, որ կա՛մ պայմանավորվածություն կար այդ տարածքները հանձնել, կա՛մ հանցագործություն է տեղի ունեցել և սահմանային մեծ հատված ուղղակի պաշտպանության տակ չի առնվել»,- ասաց Աբրահամյանը։

Պատգամավորը հիշեցրեց, որ Նիկոլ Փաշինյանն առաջարկում էր Սոթք-Խոզնավար հատվածում հայկական ու ադրբեջանական զորքերը հայելային եղանակով հետ քաշվեն, միևնույն ժամանակ նկատեց, որ, չնայած Փաշինյանի առաջարկին, ադրբեջանցիները ոչ միայ հետ չեն քաշվում, այլ ամրանում են այդ հատվածում.

«Ադրբեջանական կողմը ոչ միայն հետքաշումներ չի իրականացնում, այլև այդ հատվածներում բավականին ամրանում է, ինչը ցույց է տալիս, որ Ադրբեջանը որևէ մտադրություն չունի այդ հատվածներից հետքայլ կատարել», -ասաց Տիգրան Աբրահամյանը:

Պատգամավորը նաև հայտնեց, որ սահմանային իրավիճակի մասին բազմաթիվ տեղեկություններ ունի, որոնք հրապարակելն անվտանգային տեսանկյունից նպատակահարար չի համարում.

«Ես խոսում եմ իմ տիրապետած տեղեկությունների 5%-ի ծավալով, անվտանգության տեսանկյունից նպատակահարմար չեմ համարում հրապարակել, բայց հույս ունեմ, որ իշխանություններն իմ պարկեշտությունից չեն օգտվի և իրենց այսպես լկտի ձևով չեն պահի»,-ասաց նա:

Չնայած տարբեր փաստերին՝ Գեղարքունիքի մարզպետ Կարեն Սարգսյանը հայտարարել է, որ Գեղարքունիքի սահմանային հատվածներում, որտեղ ադրբեջանցիներն առաջ են եկել, ամրաշինական աշխատանքներ չեն կատարում այդտեղ:
Արձագանքելով մարզպետին՝ ընդդիմադիր պատգամավորն ասաց.

«Իսկ ո՞վ է Գեղարքունիքի մարզպետը, որ ԶՈՒ ամրաշինական աշխատանքների հետ կապված՝ կարողանա տեղեկություն տրամադրել, որը կբավարարի կամ դրա հիման վրա ես կկառուցեմ իմ գնահատականները։ Դրա հասցեատերը ՊՆ է, ԶՈՒ ԳՇ-ն, քաղաքական ղեկավարությունը»:

Պատգամավորի արձանագրմամբ՝ սահմանամերձ դարձած հատվածներում մինչ օրս շինարարական որևէ աշխատանք չի իրականացվել.
«Դեռևս մայիսի 12-ի ադրբեջանական ներխուժումից առաջ՝ Նիկոլ Փաշինյանը պնդում էր, իսկ իրականում ստում էր, թե մեծ աշխատանքներ են իրականացվում սահմանային հատվածումներում, բայց այդ ներխուժումը ցույց տվեց, որ նվազագույնը Սյունիքի և Գեղարքունիքի ուղղությամբ պատշաճ աշխատանք իրականացված չէ, ինչը նվեր էր ադրբեջանցիների համար՝ ներխուժելու և դիրքավորվելու, մարտավարական բարձունքներ գրավելու համար»,-ասաց նա:

Աղբյուր` Փաստինֆո