Փաստ ինֆո

Հայաստանում գործարար են համարվում փոքր կրպակ ունեցողից մինչև խոշոր ընկերություն ունեցողները, եւ  եթե այդ անձինք՝ անկախ բիզնեսի չափերից, քաղաքականությամբ զբաղվելու  հայտ են ներկայացնում, ապա ՀՀ օրենսդրությունը  նախատեսում է կարգավորումներ։ ԱԺ-ում նման հայտարարությամբ է հանդես եկել ԱԺ «Իմ քայլը» խմբակցության ղեկավար Լիլիթ Մակունցը՝ նշելով, թե  այդ մարդկանց արգելվում է ոչ թե քաղաքականությամբ զբաղվելը, այլ համատեղումը:

Ինչպես արդեն տեղեկացրել ենք՝ «Քաղաքացիական պայմանագիր» կուսակցության ցուցակում ներառվել են  գործարարներ  Խաչատուր Սուքիասյանը, Գուրգեն Արսենյանը,  մինչդեռ Նիկոլ Փաշինյանը պարբերաբար հայտարարում էր, թե գործարարները չպետք է քաղաքականությամբ զբաղվեն:

Լիլիթ Մակունցը վստահեցրեց, որ եթե այդ համատեղման արգելքի սկզբունքը խախտվի, ապա նման դեպքերի համար ԱԺ էթիկայի հանձնաժողովը կամ կոռուպցիայի կանխարգելման հանձնաժողովը կձեռնարկեն անհրաժեշտ գործողություններ՝ ընդհուպ մինչև մանդատից զրկելու գործընթաց սկսելը: «Իմ քայլը» խմբակցության ղեկավարը նաև հավելեց, որ տարբեր ցուցակներում տարբեր ծավալի գործունեություն ծավալող գործարարներ կլինեն:

«Այն, որ բիզնեսը պետք է քաղաքականությունից անջատված լինի, դա ոչ միայն խոսքեր են, այլ Հայաստանի օրենքներով սահմանված սկզբունք: Մենք նույնպես պնդում ենք, որ մարդիկ, որոնք զբաղվում են քաղաքականությամբ, չեն կարող բիզնեսի հետ դա համատեղել»,-պնդեց Մակունցն ու ավելացրեց, որ տարբեր արատավոր երևույթներ  եղել են  ՀՀ-ում, որոնք տեղի էին ունենում թե քաղաքական կամքի բացակայության պատճառով, թե կոռուպցիոն նպատակներով։ Ըստ նրա՝ երբ օրենքը չի գործում, տեղի են ունենում արատավոր երևույթներ, սակայն պատգամավորի հավաստմամբ՝ իրենք ձգտում են բոլոր գործողություններով համապատասխանել օրենքի պահանջներին։ 

Ինչ վերաբերում է մի քանի իմքայլական պատգամավորների հայտարարությանը, թե չեն մասնակցելու առաջիկա ընտրություններին, ԱԺ «Իմ քայլը» խմբակցության ղեկավարը հաստատեց, որ նրանք իրենց կամքով են դուրս եկել ցուցակից.

«Նիկոլայ Բաղդասարյանը և Արտակ Մանուկյանը իրենց ցանկությամբ չեն ներառվել ցուցակում: Ես հարգում եմ իրենց որոշումը: Պարոն Ավինյանը նույնպես չի լինելու ցուցակում, դա իր որոշումն է, ինչպես նաև Հայկ Մարությանը նույնպես չկա նախընտրական ցուցակում։ Էլի կլինեն այլ պատգամավորներ, որոնք նույնպես չեն ընդգրկվի ցուցակում»,-հայտնեց Մակունցը:

Դառնալով սահմանային ծանր վիճակին՝ Մակունցը նշեց, որ այս պահին ռազմական դրություն սահմանելու և ընտրությունները հետաձգելու մասին քննարկում չկա:

ԱՄՆ-ում իրեն Հայաստանի դեսպան նշանակելու լուրերի  մասին հարցին՝ Լիլիթ Մակունց պատասխանեց, որ ամերիկյան կողմից հաստատումը կա, բայց որոշում կկայացվի միայն ընտրություններից հետո:

Աղբյուր` Փաստինֆո