Փաստ ինֆո

Վստահ էի՝ Նիկոլ Փաշինյանն այս փուլում չի գնա արտահերթ ընտրությունների, եթե իրեն չհաջողվի պայմանավորվել Գագիկ Ծառուկյանի և Էդմոն Մարուքյանի հետ։ «Փաստինֆո»-ի հետ զրույցում այս մասին ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը։

Պատգամավորի խոսքով թե՛ Գագիկ Ծառուկյանը, թե՛ Էդմոն Մարուքյանը կատեգորիկ մերժել են Նիկոլ Փաշինյանի բոլոր առաջարկները, այդ թվում հուշագիր ստորագրելը, որ հրաժարականի դեպքում խորհրդարանական ընդդիմադիրները վարչապետի այլընտրանքային թեկնածու չառաջադրեն․ «Հասկանալի է, որ Նիկոլ Փաշինյանն այս պահին նման ռիսկի չէր գնա։ Այստեղ նույնիսկ էթիկայի և բարոյականության հարց կա։ Որևէ կերպ չեմ պատկերացնում, որ մի քանի ամիս հետո հնարավոր է մտնել ՀՀ մարզեր, Երևանի տարբեր թաղամասեր, որտեղ տասնյակ զոհեր, անհետ կորածներ կան և բարձրախոսը ձեռքին խոսել նախկինների թալանից, կոռուպցիայից, դղյակներից, օլիգարխներից։ Պատկերացնո՞ւմ եք Նիկոլ Փաշինյանը մտնի որևէ բակ և խոսի նախկինների թալանից, կոռուպցիայից ու այդպես կարողանա նայել զինվորի մոր աչքերին, ով զավակ է կորցրել կամ իր որդու դին է փնտրում»,-նշեց պատգամավորը։

Նաիրա Զոհրաբյանը կարծում է՝ վարչապետն այժմ փորձում է ժամանակ ձգել և եթե ընդդիմությունն ու ժողովուրդը թույլ տան, Նիկոլ Փաշինյանն առնվազն մինչև այս խորհրդարանի լեգիտիմ ժամկետի ավարտը՝ 2023 թվական, ձգելու է այդ ժամանակը։

Հարցին՝ արդյոք Նիկոլ Փաշինյանը վախենում է, որ իշխանություն, վարչական ռեսուրսներ ունենալով հանդերձ հնարավոր է չհաղթի ընտրություններում, Նաիրա Զոհրաբյանը նկատեց՝ այդ մտավախությունը կա, քանի որ նման իրավիճակում երկիրն արտահերթ ընտրությունների տանել՝ չունենալով առնվազն կարևոր քաղաքական ուժերի աջակցությունը, պատգամավորի կարծիքով, բավական ռիսկային է․ «Նա շատ լավ հասկանում է, որ «թալանը կոպեկ առ կոպեկ վերադարձնելու ենք», ոչ մի «վնգստացող, ոչ մի թալանչի, ոչ մի ձուկ-մուկ չի պլստալու» իր այդ կոդերն այլևս չեն աշխատում, որովհետև հասարակությունն իրեն տալիս է մի քանի լեգիտիմ հարց՝ ինչու իրենց հետ չխոսեց, երբ հանձնում էր Արցախը, ինչու թալանված որևէ կոպեկ այդպես էլ չվերադարձավ բյուջե և մեր կենսամակարդակի վրա չարտացոլվեց»,-ասաց Նաիրա Զոհրաբյանը։

Պատգամավորը կարծում է՝ ժողովուրդը հասկացել է, որ նրա այդ հայտարարություններն արտաքին գործակալական ցանցի կոդային մեսիջներն են, հասկացել է, որ դրանք դատարկ խոսքեր են․ «Ինձ հայրենակիցներ են դիմում, ասում՝ կարող է ծանոթներ ունենաք ԵՄ դեսպանատներում ամեն ինչ պատրաստ ենք տալ․․․ 90-ականներին մարդիկ հատկապես գյուղական բնակավայրերում իրենց տունը փոխում էին ինքնաթիռի 5-6 տոմսի հետ։ Ես զարհուրում եմ, որ մենք գալիս հասնում ենք այդ սահմանագծին»,-նշեց Նաիրա Զոհրաբյանը։

Վերջինս վստահ է, որ Նիկոլ Փաշինյանը գնալու է, և ընդդիմությունը շատ գործիքներ ունի նրա հրաժարականին հասնելու․ «Մարդու իրավունքների եվրոպական հռչակագիրը բացարձակ լեգիտիմ է համարում ապստամբության իրավունքն այն դեպքում, երբ սահմանադրական բոլոր ճանապարհները սպառված են։ Հիշենք՝ ինչպես էին նիկոլականնեը ջարդում այնպիսի ռազմավարական նշանակության շենքեր, ինչպիսին ռադիոտունն է և այդ ամենն արդարացնում էին ապստամբության և հեղափոխության լեգիտիմ իրավունքով»,-նշեց պատգամավորը։

Աղբյուր` Փաստինֆո