Փաստ ինֆո

Քանի որ մենք այսօր պարտվել ենք, բոլորիս համար շատ ծանր էմոցիոնալ վիճակ է, անպայման ուզում ենք մեր մեջ դավաճանների գտնել և շատ ցավում եմ, որ զինվորականների մեջ եք ուզում դավաճան գտնել։ Այս մասին լրագրողների հետ զրույցում ասաց ՊՆ ներկայացուցիչ Արծրուն Հովհաննիսյանը։

Անդրադառնալով Շուշիի շուրջ ստեղծված իրավիճակին՝ Հովհաննիսյանը նշեց, որ իր համար շատ բան անհասկանալի է Շուշիում, նոյեմբերի 6-ին ինքը եղել է Շուշիում, սակայն նոյեմբերի 6-ից հետո՝ 7-ին, 8-ին և 9-ին, ըստ ՊՆ տեղեկությունների, իրավիճակը մի քանի անգամ փոխվել է։ Հովհաննիսյանն ընգծեց, որ 44 օրվա ընթացքում տեղեկություններ ստացել է բացառապես ՊՆ-ից, ԳՇ օպերատիվից և ՊԲ-ից։

«Պատերազմից անցել է երեք-չորս ամիս, ես ամեն օր ուսումնասիրում եմ առանձին դրվագներ՝ դրվագ առ դրվագ, բայց կան բաներ, որ իմ ուղեղում էլ չեն տեղավորվում»,- նշեց Հովհաննիսյանը։

Հարցին՝ արդյոք բացառվում է, որ միտումնավոր պարտության ենք գնացել, Հովհաննիսյանը նշեց, որ զինվորականի ուղեղի մեջ նման բան չի կարող տեղավորվել։

Անդրադառնալով նաև այն լուրերին, որի համաձայն՝ ինքը գտնվել է Ստեփանակերտի մամուլի կենտրոնում, սակայն հայտարարել, որ Հադրութում է՝ Հովհաննիսյանը նշեց, որ հեռախոսն անջատած եղել է Հադրութում և Ֆիզուլիում, հասել Ստեփանակերտ և տեղեկություն հայտնել 20 րոպե հետո։

«Ինչ է. ասելու էի, որ ես հիմա Հադրութում եմ և արկը խփեր ինձ, որովհետև հեռախոսս միացրա՞ծ էի պահել։ Երբ ես հայտարարում էի, որ եկա Քարվաճառով անցա ու հայտարարեցի, որ անվտանգ է, գիտեի, որ անձամբ իմ նկատմամբ որս է կազմակերպված, հետախուզությունն ինձ տվյալներ տվեց, որ ինձ ուզում են խփել։ Երեք մեքենա եմ փոխել, հեռախոս եմ փոխել, հեռախոսս թողել եմ մեքենայի մեջ, ես այլ մեքենայով գնացել »,- նշեց Հովհաննիսյանը։

Նրա խոսքով՝ շատ են եղել իրավիճակներ, որ հակասական տեղեկություններ են եղել, օրինակ, տեղեկություններ են եղել ստացված քաղաքացիական բնակչությունից՝ զինվորականությունը չի հաստատել կամ ուշ է հաստատել, հակառակն էլ է եղել։
«Պատերազմի ընթացքում տեղեկատվության հոսքերը շատ մեծ են եղել, հաճախ՝ հակասող»,- նշեց նա։

Աղբյուր` Փաստինֆո