Փաստ ինֆո

Իմ խորին համոզմամբ՝այս ամենն ունի խիստ ժամանակավոր բնույթ, որովհետև Հայաստանի արտաքին սահմանների անխախտելիությունը միայն այսօրվա իշխանության որոշելու հարցը չէ,եթե լինում է սահմանային փոփոխություն, դա պետք է դրվի հանրաքվե, լինի իրավական գործընթաց, քանի որ վերաբերում է ՀՀ արտաքին սահմաններին:Այս մասին «Փաստինֆո»-ի հետ զրույցում ասաց «Մեկ Հայաստան» կուսակցության ղեկավար Արթուր Ղազինյանը:

Նրա խոսքով՝ ստեղծված իրավիճակը Հայաստանում տիրող անիշխանության հետևանք է.

«Պետության ղեկավարի աթոռը զավթած անձնավորությունը ընդհանրապես չի հետաքրքրվում Հայաստանի արտաքին և ներքին անվտանգության մարտահրավերներով, բացառապես զբաղված է իր իշխանությունը պահելու նպատակով իրականացվող գործողություններով, նա թքած ունի երկրի արտաքին և ներքին անվտանգության վրա, միայն հետաքրքրում է իր իշխանությունը, ուրիշ ոչինչ»,-ասաց Ղազինյանը՝ վստահեցնելով, որ Հայաստանում լեգիտիմ կառավարության ձևավորման արդյունքում կունենանք դրական տեղաշարժեր ՀՀ արտաքին անվտանգության ապահովման, ինչպես նաև մեր սահմանների անխախտելիության հարցում:
Գործչի խոսքով՝ երկրների արտաքին սահմանների դեմարկացիայի պրոցեսը բավական երկարատև և շատ դժվար աշխատանք է, այն չի ենթադրում, որ այս պահին ում զինվորը, որտեղ կանգնեց, համարվելու է տվյալ երկրի տարածքը.

«Երբ կսկսվի իրական քաղաքական պրոցես և կձևավորվի լեգիտիմ, ուժեղ, գործունակ կառավարություն այս հարցերը առաջ կգան, և կգործադրվի նոյեմբերի 9-ի ստորագրված փաստաթղթի առաջին կետը, որ յուրաքանչյուրը գտնվում է այն դիրքում, որտեղ այդ պահին կանգնած են, այսինքն՝ պետք է վերականգնենք նոյեմբերի 9-ի դրությամբ առկա ստատուս-քվոն, ինչը վերաբերվում է Հայաստանի և Արցախի արտաքին սահմաններին»,-ասաց Ղազինյանը՝ հավելելով, որ պետք է կիրառել բոլոր գործիքները՝ ՀՀ արտաքին անվտանգությունը և սահմանային անխախտելիությունը երաշխավորելու համար։

«Արցախի դեպքում մենք պետք է գործադրենք Արցախի կարգավիճակի հստակեցման այն դրույթը, որն առկա է եղել ԵԱՀԿ Մինսկի խմբի համանախագահների կողմից վերջին 25 տարիների ընթացքում հայտարարությունների մեջ սահմանված ձևաչափով, այսինքն՝ Ադրբեջանին պետք է հայտարարել ագրեսոր պետություն, որը, միակողմանիորեն դուրս գալով խաղաղ բանակցային գործընթացից, որոշել է հարցը լուծել ռազմական ճանապարհով՝ ի հեճուկս ԵԱՀԿ Մինսկի համանախագահ երկրների ղեկավարների բազմաթիվ հայտարարությունների, որ խնդիրը ռազմական լուծում չունի և ձեռնամուխ լինել Արցախի կարգավիճակի վերջնական հստակեցմանը, դա ենթադրում է ապառազմականացում՝ զորքերի դուրս բերում, որպեսզի ընթանա խաղաղ գործընթաց արդեն վերջնական կարգավիճակի հստակեցման, բայց սա ապագայի ազգային իշխանության ձևավորումից հետո, մինչ սա մենք որևէ բան ակնկալել չենք կարող և ամեն օր շարունակելու ենք կորցնել Հայաստանի սուվերեն տարածքը»,- «Փաստինֆո»-ին ասաց «Մեկ Հայաստան» կուսակցության ղեկավարը:

Ղազինյանի համոզմամբ՝ ստորագրված համաձայնագիրը գաղտնի հավելված չունի, կա Նիկոլ Փաշինյան-Ալիև ձեռք բերված գաղտնի համաձայնություն, որի ուժով Փաշինյանը մնում է իշխանություն, որպեսզի կատարի մնացած պարտավորությունները:

Չնայած երկրում ստեղծված իրավիճակին՝ երեկ «Ազատությանը» տված հարցազրույցի ժամանակ Նիկոլ Փաշինյանը ասել էր՝ ես ինձ համարում եմ թիվ մեկ պատասխանատուն, բայց չեմ համարում թիվ մեկ մեղավորը, այս առիթով Արթուր Ղազինյանն ասաց.

«Եթե դու համարում ես քեզ ինչ-որ հարցում պատասխանատու, ապա նույնիսկ քրեական օրենսգրքով պատասխանատվության հանգամանքը որոշում են մեղքի չափաբաժնով, չես կարող լինել պատասխանատու, բայց ոչ մեղավոր, սա էժանագին մանիպուլյացիա է, որևէ բովանդակություն, միտք և գաղափար չկա, ընդամենը փորձում է փախչել քրեական պատասխանատվությունից, եթե իրեն համարում է պատասխանատու, ապա պետք է ենթարկվի պատասխանատվության՝ իր կողմից գործած հանցագործությունների մեղքի բաժնով:Փաշինյանի ասածներին բժիշկները կտան գնահատական»,-ասաց Արթուր Ղազինյանը՝ արձանագրելով, որ Նիկոլ Փաշինյանը ձևավորում է իր ուզած իրականությունը և հարմարավետ տեղավորվում այդ իրականության մեջ, իրեն պետք է անընդհատ հուշել, որ այլևս չի տիրապետում իրավիճակին, իրեն սխալ են զեկուցում և Հայաստանում այլևս չունի իշխանություն.

«Ես, երկրի ապագայի շահից ելնելով, գտնում եմ, որ նա պետք է ձերբակալվի կառավարական աշխատասենյակում՝ որպես պետական դավաճան, դա հնարավոր է այն դեպքում, երբ դատախազությունը կատարի սահմանադրությամբ իրեն վերապահված օրենքները:Եթե Փաշինյանը չի հեռանում, ապա մենք կորցնում են Հայաստանի Հանրապետությունը»,-ասում է Արթուր Ղազինյանը:

Վերջինիս խոսքով՝ պատմական մասշտաբի պետական դավաճանություն կատարած անձն իրավունք չունի մտածել հետագա քաղաքական գործունեության մասին.
«Փաշինյանը պետք է ձերբակալվի և կանգնի դատարանի առջև, այլ տարբերակ չկա, եթե կլինի որևէ իշխանություն, որը կփորձի անվտանգության երաշխիքներ տալ, ապա ես կլինեմ առաջին ընդդիմադիր ուժը այդ իշխանության»,-ասաց քաղաքական գործիչը:

«Պատերազմի քննության իրավական գործընթացի մասին խոսելը դեռ վաղ է, եթե մենք խոսում ենք իրավական գործընթացի մասին, ապա մենք պետք է տանենք միջազգային քրեական դատարան՝ որպես պատերազմի հանցագործ իրեն ներկայացնելու, դրա համար ՄԻՊ-ն ունի հավաքագրած շատ լուրջ փաստական տվյալներ և ավելի քան հավանական եմ համարում, որ ապագա իշխանությունը պետք է սկսի միջազգային քրեաիրավական գործընթաց պատերազմի հանցագործներին՝ միջազգային քրեական պատասխանատվության ենթարկելու համար»,-մեզ հետ զրույցում նշեց Արթուր Ղազինյանը:

Աղբյուր` Փաստինֆո