Փաստ ինֆո

«Եթե մեր երկրում կա մի այնպիսի ներուժ, որը կարող է միավորված կերպով  փորձել հեղինակազրկել և հարվածներ հասցնել եկեղեցուն,  ապա թող այդ ներուժն օգտագործվի՝ հարվածելու  մեր թշնամուն, ով ամենօրյա ռեժիմով ծաղրում է մեր  երկրի ղեկավարին: Չգիտեմ ովքեր են այդ ուժերը, ավելի ճիշտ կլինի պարզել հենց իրենցից, ինչպես նաև՝ պարզել եկեղեցուն հարվածելու իրենց մոտիվները։ Մեր երկրում հիմա մի մթնոլորտ է, որը չի միավորում մեզ, ընդհակառակը՝ ստեղծված ծանրագույն իրավիճակում, որում հայտնվել է մեր ժողովուրդը, այն պառակտության վտանգավոր սերմն է գցում:  Պառակտիչներն իրենք պետք է հասկանան, որ իրենց այդ վարքագծով նրանք երկիրն անվերադարձ կորստի ճանապարհով են տանում,-  «Փաստինֆո»-ի հետ զրույցում ասել է Մայր Աթոռ Սուրբ Էջմիածնի  ինտերնետային բաժնի տնօրեն  Տեր Համբարձում քահանա Դանիելյանը՝ անդրադառնալով  լուրերին, որ եկեղեցու դեմ տարվող վերջին շաբաթների անթույլատրելի արշավի ետևում կանգնած է վարչապետի տիկին Աննա Հակոբյանը։

«Ակնհայտ կերպով մամուլում՝ ուղղորդված քաղաքականությամբ փորձ է կատարվում անարգել եկեղեցին և հոգևորականությանը, բայց պետք է նորից հիշեցնենք այդ ուժերին, որ   մեր եկեղեցու գործունեության մեջ դավադրություններ չկան: Եկեղեցին հստակ և պարզ կատարում է իր առաքելությունը՝ պահպանելու մեր երկրի անվրդով, խաղաղ  կյանքը, զբաղվելով հավատացյալ զավակների  հոգեփրկչական գործունեությամբ: Հետևաբար, մեզ համար զարմանալի է այս անթույլատրելի վարքը: Նորից եմ կրկնում, այդ քարոզչական մեքենան, որ լծված է ներքին պառակտումներ հրահրելուն և եկեղեցուն՝ որպես պետականության պահպան ինստիտուտի հեղինակազրկելուն, թող ուղղեն և փրկեն երկրի ղեկավարի գահավիժած հեղինակությանը»,- ասաց նա:

Տեր Համբարձում քահանա Դանիելյանն ընդգծում է՝ եթե դեռ չի մարել ապագայի նկատմամբ մեր  ներսում եղած լավատեսության կրակը, ապա պետք է հասկանանք, որ  ներդաշնակության  հասնելու առաջին և միակ  ուղին մեր  միասնական ուժն է լինելու. «Ստեղծված իրավիճակում մեր բոլորի առաջին ցանկությունն է՝ միասնական ջանքերի ներդրմամբ, հաղթահարենք՝ նախ մեր ներսում առաջացած այս ընկճախտը, որ գլուխ բարձրացրեց արցախյան պատերազմի պարտությունից հետո և դա էլ հասկանալի է՝ մենք մեր հայրենիքի մի մասն ենք կորցրել, ինչ – որ տեղ, կարելի է ասել՝ մենք կորցրել ենք ինքներս մեզ: Եվ, ահա, հենց այսպիսի իրավիճակում ու այսպիսի բարոյահոգեբանական մթնոլորտում, հիմա, ավելի քան երբևէ, մենք պետք է առավել, քան միասնական լինենք: Իսկ ի՞նչ է անում եկեղեցին՝ անում է այն, ինչ միշտ է արել դարերի և տարիների ընթացքում՝ ծառայելով  իր հավատավոր ժողովրդին՝ հաճախ իր վրա ստանձնելով նաև պետականության պահպանման բեռը:  Շատ հեռու չգնալով,  նայենք՝ ի՞նչ արեց եկեղեցին վերջին տարվա ընթացքում մեր երկրում: Նա  իր հնարավորության  սահմաններում, ժողովրդի հետ միասին, զորավիգ եղավ ու պայքարեց ամիսներ շարունակ մոլեգնող համավարակի դեմ, ընդ որում, պայքարեց ինչպես հոգևոր իմաստով, այնպես նաև նյութական հնարավոր միջոցների ներդրմամբ: Նույնը նաև պատերազմի օրերին էր: Չէ՞ որ եկեղեցու սպասավորներից շատերը գնացին ու զինվորի կողքին  կանգնած՝ զենքը ձեռքին պայքարեցին մեր երկրի սահմանների անվտանգության պահպանման համար: Հետևաբար, սա ժողովրդին ուղղված միասնականության վառ օրինակ էր, որ ցույց տվեց եկեղեցին՝ օրինակ` ծառայելով, թե ինչպես մենք կարող ենք և պետք է հաղթահարենք  մեր առջև ծառացած այս ճգնաժամի պայմաններում», - ասում է տեր Համբարձում քահանա Դանիելյանը:

Ամփոփելով զրույցը հոգևորականը նկատում է՝ անկախ երկրի ներսում տիրող  իրավիճակներից,  ժամանակներից ու խնդիրներից,  եկեղեցին  ծառայել և ծառայում է միայն իր ժողովրդին: Երկրի առաջ ծառացած մտահոգություններն ու խնդիրներն են մղում հոգևորականներին, այդ թվում նաև առաջին հերթին հոգևոր մեր առաջնորդին՝ Ամենայն հայոց կաթողիկոսին, հորդորելու խաղաղեցնել ներքին անկայունությունը, չգնալ երկիրը նոր բախումների տանող ուղիով, ասում է տեր Համբարձումն ու հավելում՝ այս հորդորների մեջ նաև հայրապետական հեռատեսություն կա, դրանք կամայական արտահայտություններ կամ կամայական ցանկությունների բարձրաձայնում չեն: Չէ՞ որ երկրում ստեղծված իրավիճակը դիտարկվում ու  վերլուծության է ենթարկվում, և, որ  պառակտման այդ սերմերը կարող են ոչ միայն այժմեական քաղաքական հարցեր առաջացնել, այլ նաև ապագայում մեծ վնաս հասցնել,  այս անգամ արդեն՝ հարվածելով մեր պետականության հիմքերին և դրանց ամրությանը:  

Հեղինակ՝ Նվարդ Մանվելյան

Աղբյուր` Փաստինֆո