Փաստ ինֆո

ՊԵԿ նախագահի տեղակալ Շուշանիկ Ներսիսյանը ներկայացրեց տնտեսվարողների հետ երկու ժամ տևած աշխատանքային քննարկման արդյունքները՝ տեղեկացնելով, որ երեկ պայմանավորվել էին ունենալ հանդիպում մաքսատանը, սակայն երեկոյան իմացել է, որ տնտեսվարողներն աշխատանքային հանդիպում չեն ուզում ունենալ, որոշել են ցույց անել։ Այսօր էլ հնչում են նույն հարցերը, ինչ երեկ քննարկել են։ Տնտեսվարողների հիմնական խնդիրը գնային քաղաքականությունն էր։ Մաքսային մարմիններն աշխատում են տնտեսվարողների հետ, ուսումնասիրում տեղական շուկան, նաև այն երկրի շուկան, որտեղից ապրանքները ներմուծվում են։

«Տնտեսվարողները՝ Թուրքիայից ապրանք ներմուծողներն են, մենք երեկ ևս առաջարկել էինք, որ եթե այս պահի դրությամբ, մաքսայինի կատարած հաշվարկների հետ համաձայն չեն, խնդրել ենք ներկայացնել, այն գները, որով իրականում Թուրքիայում ձեռք են բերել այդ ապրանքները և նստենք աշխատանքային քննարկում ունենանք՝ հասկանանք մեր հաշվարկներն ի՞նչի հիման վրա են, համեմատենք իրենց գների հետ։ Նաև մի քանի այլ ընթացակարգի փոփոխության հետ կապված անհարմարություն էին բարձրաձայնում»,- ասաց Ներսիսյանը։

Բոլոր հարցերը քննարկեց և ներկայացվել է, թե մոտավորապես մաքսային մարմինների հաշվարկով ապրանքների համար ինչ գներ են նախատեսում։

«Բոլորը խելամիտ սահմաններում էին, որն ընդունվեց նաև տնտեսվարողների կողմից։ Այն գները, որ սահմանված էին մինչև ընթացակարգի փոփոխությունը և դրա հետ միասին մաքսային մարմինները վերանայել են գնային քաղաքականությունը՝ հօգուտ տնտեսվարողերի։ Օրինակ, Ջինսե տաբատը մաքսային մարմինները հաշվարկել են, որ մեկի համար միջինով մոտավորապես 7 դոլարի մուծում է արվում Թուրքիայում։ Ամեն դեպքում բաժանվեցինք տնտեսվարողների հետ այն նոտայի վրա, որ ոնց որ թե իրենց բարձրացրած խնդիրը չի լուծվում, որովհետև իրենց բարձրացրած խնդիրն այն է, որ որևէ բան չփոխվի, աշխատեն այնպես ինչպես նախկինում։ Մենք անցում ենք կատարում ամբողջությամբ հայտարարագրի ճշգրիտ մեխանիզմին, որն ապահովելու է հավասարություն ամբողջ հագուստի շուկայում»։

ՊԵԿ նախագահի տեղակալը նշեց, որ քաղաքականությունը վերանայելու արդյունքում գներն էլ են վերանայել։ Իսկ տնտեսվարողները հայտարարում են, թե իրենք ստիպված են լինելու ապրանքի համար վեց անգամ շատ գումար վճարել։ Ներսիսյանը տեղեկացրել է նրանց, որ գուցե մոտեցել են այն աշխատակցին, որը նոր գնին չի տիրապետել։ Մաքսայինի աշխատակիցներն էլ առաջադրանք են ստացել այսօր ծանոթանալ սահմանված գներին՝ հետագայում թյուրիմացություններից խուսափելու համար։

«Հաշվարկածները մոտավոր գներ են։ Թիվը վեց անգամ բարձր չէ, մոտավորապես մինչև մեկ ու կեսից երկու անգամ է լինելու։ Եթե դրամի վերածեմ, այսօր մենք ասում ենք, որ ջինսե տաբատը 3500 դրամ է, որից 1200 դրամի հարկ է մուծվում։ Եթե գումարենք ինքնարժեքը, հարկը, որն արեց 4700 դրամ, և գնանք այն խանութներ, որտեղ ապրանքը վաճառվում է, միանշանակ 5000 դրամ չէ ջինսը»,- ասաց Ներսիսյանը։

Հիշեցնենք, որ առավոտյան Կառավարության դիմաց բողոքի ակցիա էին իրականացնում մանրածախ առևտրով զբաղվող ձեռնարկատերերը, որոնք նշում էին, թե ապրանքների մաքսազերծման փոփոխություններ են եղել, որոնց պատճառով իրենք ստիպված կլինեն ներկրվող ապրանքի դիմաց մի քանի անգամ ավելի շատ մաքս վճարել:

Ավելի ուշ բողոքի ակցիա իրականացնողները շարժվեցին ՊԵԿ, այնտեղից էլ՝ Արարատյան մաքսատուն:

Աղբյուր` Փաստինֆո