Փաստ ինֆո

Հայաստանի ավիաընկերություններն անժամկետ չեն կարողանա թռչել Եվրոպա։ «Փաստինֆո»-ի հետ զրույցում ավիացիոն փորձագետ Նավիկ Խաչատրյանն ասաց, որ Եվրոպա չենք կարողանա թռչել այնքան ժամանակ, մինչև Քաղավիացիայի կոմիտեն կհայտարարի, որ պատրաստ են և կդիմի EASA-ին՝ կրկին աուդիտ անցնելու նպատակով։ 

Սակայն փորձագետի կարծիքով սա չի լինի ավելի շուտ, քան երեք տարին է. «Այնպես չէ, որ Հայաստանից հենց դիմեն, EASA-ից անմիջապես գալու են։ Հնարավոր է օրինակ դիմելու պահից վեց ամիս հետո միայն հայտն ընդունեն։ Ընդ որում՝ դա դեռ չի նշանակում, որ նախնական աուդիտն է։ Այսինքն պետք է ներկայացնեն թղթերը, նրանք դրանք ուսումնասիրեն, տեսնեն նախորդ աուդիտի համեմատ ինչ փոփոխություններ են եղել և հետո միայն գան ու տեղում ստուգեն՝ արդյոք այն, ինչ ուղարկել են համապատասխանում է իրականությանը, թե ոչ։ Երբ փոխվարչապետ Տիգրան Ավինյանը մեկ ամիս առաջ ասում էր բան էլ չկա, Եվրոպա միայն «Արմենիա» ավիաընկերությունն է թռնում, ոչ մի բան չունեինք, այնպես ո ոչինչ չի կորել, դա սխալ է։ EASA-ի կողմից ցանկացած սև թուղթ գնում է բոլոր վարձակալներին։

Վերջիններս ունեն հատուկ բաժին, որտեղ ռիսկերն են գնահատվում։ Այդ սև թուղթը գնում է այնտեղ, նայում են այն և իրենց ղեկավարությանն ահազանգում, որ Հայաստանի հետ գործ չունեք։ Ճիշտ է ընդամենը EASA-ի աուդիտ չեն անցել, բայց չեն կարողանում իրենց երկրում վերահսկեն թռիչքային անվտանգությունը, ինչը նշանակում է, որ մեր օդանավը, գույքը տանք, հետագայում դա հետ բերելու մեծ ռիսկ կունենանք։ Հնարավոր է չվերահսկեն, գնա ուրիշ երկրի քիմիական գործարանի վրա ընկնի այդ օդանավը և մեծ խնդիրների առջև կանգնենք։ Հենց այսկերպ էլ կմտածեն վարձակալները»,-ասաց Նավիկ Խաչատրյանը։

Խնդիրն այստեղ ոչ միայն Եվրոպա թռնել, չթռնելն է, այլ այն, որ Հայաստանին օդանավ չեն տալու, ինչը նշանակում է, որ ոլորտը կմեռնի։ Մասնագետը գտնում է, որ ամենաքիչը երեք տարի այսպես կլինի, մինչև նոր կադրերին ուղարկեն Բրյուսել, Փարիզ, Մոսկվա՝ դասընթացների։ Կամ էլ պետք է հին կադրերին բերեն, որոնք Նավիկ Խաչատրյանի խոսքով կարող են անցնել աուդիտը. «Եվրահանձնաժողովի որոշումը շառաչուն ապտակ է EASA-ի, ավիացիոն հանրության կողմից Հայաստանի պետությանը ի դեմս ՔԱԿ-ի առ այն, որ ունակ չեք վերահսկել ձեր իսկ տված լիցենզիաները։ Նշանակում է՝ արդեն ավիացիոն բոլոր մեծ խաղացողները գիտեն, որ Հայաստանն այն երկիրն է, որտեղ վարչությունը զրո է»,-ամփոփեց Նավիկ Խաչատրյանը։

Ավելի վաղ հայտնել էինք, որ Եվրահանձնաժողովը թարմացրել է ԵՄ օդային անվտանգության ցուցակը, այն ավիաընկերությունների ցանկը, որոնց արգելվել է թռչել Եվրոպա, քանի որ չեն բավարարում անվտանգության միջազգային չափանիշներին։ Հայաստանը նույնպես հայտնվել է այդ «սև ցուցակում»։

Աղբյուր` Փաստինֆո