Փաստ ինֆո

Ի՞նչ է արել Գլխավոր դատախազությունը վերջին 20 տարիների ընտրական հանցագործությունների վերաբերյալ։ Այս հարցը խորհրդարանում բարձրացրեց ԱԺ անկախ պատգամավոր Արման Բաբաջանյանը։

«Կա շատ լուրջ համոզում, որ թաքցվել են կամ խախտումներով են տեղ գտել գոյություն չունեցող ձայներ, մոտավորապես 250-ից մինչև 400 հազար մարդու։ Ըստ էության Հայաստանում տեղի է ունեցել պետության բռնազավթում։ Ուզում եմ իմանալ գլխավոր դատախազության, Ձեր դիրքորոշումը։ Որևէ քայլ ձեռնարկե՞լ եք մինչ այս պահը, թե ոչ և պատրաստվում եք արդյոք ձեռնարկել քայլեր»,-Գլխավոր դատախազ Արթուր Դավթյանին հարցրեց Արման Բաբաջանյանը։

Արթուր Դավթյանն ասաց, որ 2012-2013 թթ. ընտրություններից սկսած համակարգման աշխատանքներ են իրականացվել։ Ձևավորվել է աշխատանքային խումբ, բայց օրենքով դատախազությանը վերապահված գործիքների շրջանակներում իրականացվել են միջոցառումներ, հարուցվել են գործեր. «Ունեցել ենք նաև իրավիճակներ, որ չեն հաստատվել Ձեր կողմից նշվածները։ Ունեցել ենք դեպքեր, որ չեն հաստատվել, բայց 2018 թվականին Հանրապետությունում տեղի ունեցած քաղաքական փոփոխությունից հետո նոր տվյալներ են ձեռք բերվել, նոր տվյալներով վերաբացվել է գործը, հաստատվել է ընտրակեղծարարության դեպքը։ Այսինքն` բազմապիսի պրակտիկա ունենք»,-ասաց Արթուր Դավթյանը։
Ինչ վերաբերում է առաջիկայում նման նախաձեռնություն ցուցաբերելուն, Արթուր Դավթյանն ասաց, որ դատախազությունն իրավասություն չունի իր նախաձեռնությամբ որոշակի ուղղությամբ ենթադրաբար ուսումնասիրություն իրականացնել. «Ձեր ասած փաստերի կամ դրա համակարգվածության վերաբերյալ պետք է ունենանք, օրինակ, քրեական վարույթ նախաձեռնելու համար բավարար հիմքեր, որի դեպքում կիրականացվի նախաքննություն»,-ասաց դատախազը։

Արման Բաբաջանյանը Գլխավոր դատախազից հետաքրքրվեց՝ արդյոք հեղափոխությունից հետո երբևէ միտք ծագել է 1998 թվականին գլխավոր դատախազ Հենրիկ Խաչատրյանի սպանությունը բացահայտելու ուղղությամբ։ Արթուր Դավթյանը նկատեց՝ այդ դեպքը ժամանակին ստացել է իր համապատասխան իրավական գնահատականը. «Ինչ վերաբերում է իմ որոշակի ուղղությամբ մտածելուն կամ քայլեր ձեռնարկելուն, ես նախանձախնդիր եմ ցանկացած իրավիճակում, երբ երբևէ սխալ իրավական գնահատական արժանացած դեպքով կստանամ այնպիսի տեղեկություններ, որոնք ինձ հնարավորություն կտան իրականությունը պարզելու և սխալ իրավական գնահատակններն ուղղելու»,-ասաց դատախազը։

Աղբյուր` Փաստինֆո