Փաստ ինֆո

Ազգային ժողովը հերթական նիստի օրակարգում չընդգրկեց հանձնաժողովների կողմից բացասական եզրակացություն ստացած նախագծերը։ Նախ՝ չընդունվեց «Լուսավոր Հայաստան» խմբակցության կողմից ներկայացված ՀՀ քրեական օրենսգրքում փոփոխություններ և լրացումներ կատարելու մասին օրենքի նախագիծը, որով առաջարկվում էր բավարար երաշխիքներ սահմանել փաստաբանների գործունեության պաշտպանության համար և փաստաբաններին վիրավորելն ու զրպարտելը քրեականացնել։

ԱԺ-ն օրակարգումը չընդգրկեց նաև «Փաստաբանության մասին » ՀՀ օրենքում փոփոխություններ և լրացումներ կատարելու մասին նախագիծը, որի համահեղինակն է ԱԺ «Բարգավաճ Հայաստան» խմբակցության պատգամավոր Շաքե Իսայանը։ Այս նախագծով առաջարկվում է հանրային պաշտպանի գործունեության հետ կապված ծախսերը փոխհատուցել պետական բյուջեից, այդ ծախսերը ներառում են լրացուցիչ աշխատավարձերի գումարներն ու հանրային պաշտպանի գրասենյակի գործունեության ապահովման ու օժանդակ աշխատակազմի վարձատրության, ճանապարհային, հեռախոսային խոսակցությունների ծախսերի փոխհատուցումը։

Օրակարգում չընդգրկվեցին նաև ԱԺ խոսնակ, ԲՀԿ խմբակցության պատգամավոր Վահե Էնֆիաջյանի հեղինակած երկու նախագծերը՝ «Հայրենական մեծ վետերանների մասին» ՀՀ օրենքում փոփոխություն կատարելու մասին նախագիծը և ԱԺ կանոնակարգ սահմանադրական օրենքում փոփոխություն կատարելու մասին օրենքի նախագիծը։ «Հայրենական մեծ վետերանների մասին» ՀՀ օրենքում փոփոխություն կատարելու մասին նախագծով առաջարկվում է կրկնապատկել պատվովճարը, իսկ ԱԺ կանոնակարգ օրենքում փոփոխություն կատարելու նախագծով առաջարկվում է խմբակցություններին նստաշրջանի ընթացքում մեկից ավելի անգամներ լսումներ իրականացնել։

ԱԺ-ն օրակարգ չընդգրկեց նաև ՀՀ քրեական օրենսգրքում փոփոխություններ կատարելու մասին նախագիծը, որի հեղինակն է ԱԺ ԲՀԿ խմբակցության պատգամավոր Գևորգ Պետրոսյանը։ Այս նախագծով էլ առաջարկվում է ավելացնել «Սահմանադրական կարգի տապալում» հոդվածն ավելացնել այն հոդվածների կողքին, որոնց համար քրեական պատասխանատվության վաղեմություն չի կիրառվում։

Աղբյուր` Փաստինֆո