Փաստ ինֆո

Քննարկել ենք ԼՀԿ-ի մասնակցությունը Երևանի ավագանիում վերաիմաստավորելու հարց է առաջացել։ Լրագրողների հետ հանդիպման ժամանակ այս մասին հայտարարեց ԼՀԿ ղեկավար Էդմոն Մարուքյանը՝ անդրադառնալով այն տեղեկությանը, որ ԼՀԿ-ն քննարկում է Երևանի ավագանիում Դավիթ Խաժակյանին հետ կանչելու հարցը։ Ավելի վաղ հայտնել էինք, որ նման բովանդակությամբ գրառում կատարել է հենց Էդմոն Մարուքյանը։

Նրա խոսքով ԼՀԿ-ն մեկ ներկայացուցիչ ունի Երևանի ավագանու «Լույս» խմբակցությունում և եթե կուսակցության կառավարման խորհուրդը որոշի՝ Դավիթ Խաժակյանը պետք է դուրս գա ավագանուց, ապա ԼՀԿ-ն կդադարի ներկայացված լինել Երևանի ավագանիում, հետևաբար որևէ պատասխանատվություն չի շարունակի կրել Երևանի ավագանիում իրականացվող գործունեության համար։

Էդմոն Մարուքյանն ընդգծեց, որ ավելին քան գոհ են Դավիթ Խաժակյանի գործունեությունից. «Դավիթ Խաժակյանն իր գործունեությամբ ցույց տվեց, թե ինչպես պետք է ընդդիմադիր ավագանին աշխատի։ Դավիթ Խաժակյանը կարևոր օղակ է նաև երիտասարդների համար, որոնք ցանկանում են քաղաքականությամբ զբաղվել։ Բայց միևնույն ժամանակ իրավիճակներ կան, որ պարոն Խաժակյանի ազդեցությունից դուրս են, բայց պարոն Խաժակյանը դրա համար պատասխանատվություն է կրում որպես խմբակցության ղեկավար և այդ պատասխանատվությունը տարածվում է մեր կուսակցության վրա»,-նշեց Էդմոն Մարուքյանը։

Նա հավելեց, որ ԼՀԿ-ին մեղադրում են ոչ իրենց անդամների գործունեության համար, ինչը ԼՀԿ ղեկավարի խոսքով լուրջ խնդիր է. «Դավիթ Խաժակյանը երեկ ամբիոնից բացահայտել է քաղաքապետարանում տեղի ունեցած պաշտոնեական կեղծիք։ Կարո՞ղ եք ասել՝ ու՞ր է դրա լուսաբանումը։ Չկա, բայց կա ինչ-որ այլ լուսաբանում քաղաքապետի ծիծաղի և այլ հարցերի վերաբերյալ։ Եթե հանրային ընկալումն էդ ա, որ ավագանու անդամը պետք է պաշտոնական կեղծիքը ծամած դնի դատախազության բերանը ու դա չլուսաբանվի, որովհետև դա մարդկանց հետաքրքիր չէ, ուրեմն ավելի լավ է՝ չմասնակցենք»,-հավելեց Էդմոն Մարուքյանը՝ ընդգծելով, որ մեդիան ծածկում է սկանդալային երևույթներ, այդ թվում ծիծաղը, ծիծաղի ձեռ առնելը և դրա արձագանքը։

«Լուսավոր Հայաստան» խմբակցության պատգամավոր Մանե Թանդիլյանն էլ նշեց, որ ԼՀԿ-ն ունի իր օրակարգը, իր գաղափարախոսությունը, ինչպես Ազգային ժողովում, այնպես էլ Երևանի ավագանիում։ Հետևաբար, երբ կառավարման խորհուրդը և կուսակցությունը գնահատում են, որ «Լույս» խմբակցությունը պարբերաբար շեղվում է կուսակցության գծից, պետք է կարողանան հասկանալ՝ որքանով է նպատակահարմար մեր մասնակցությունը կամ ինչ ձևաչափով է նպատակահարմար շարունակել.« Մենք պետք է կարողանանք պատասխանատվություն կրել մի բանի համար, որի հետ ամբողջությամբ կուսակցությունը համաձայն է։ Այս առումով պետք է քննարկենք, թե ինչ պետք է արվի այն պարագայում, երբ տեսնում ենք՝ պատասխանատվություն ենք կրում մի բանի համար, որն, ըստ էության, կուսակցության օրակարգում ներառված չէ և կուսակցությունն ազդեցություն չունի այդ վարքագծի համար»,-ասաց Մանե Թանդիլյանը։

Նա ընդգծեց, որ կուսակցությունն ավագանիում ունի ընդամենը մեկ անդամ և նրա ձայնը, բովանդակային քննադատությունը լսելի չի լինում։

Մանրամասները՝ տեսանյութում

Հեղինակ՝ Հասմիկ Կոշկարյան

Աղբյուր` Փաստինֆո