Փաստ ինֆո

«Տնտեսագիտական համալսարանում նախկինում մրցութային կարգ չկար, եւ դրա փոխարեն ամբիոնի վարիչներն իրենք են որոշել՝ ով ինչքան դասաժամ պետք է ստանա, իսկ մենք սահմանեցինք մրցութային կարգ, որը, ինչպես գիտեք, քննարկումների եւ քննադատությունների առիթ դարձավ»,- «Փաստինֆո»-ի հաղորդմամբ՝ այս մասին այսօր հրավիրված ասուլիսին հայտարարեց ՀՊՏՀ ռեկտորի ժամանակավոր պաշտոնակատար Ռուբեն Հայրապետյանը. «Համատեղել չափելի օբյեկտիվ գործոնները հանձնաժողովի սուբյեկտիվ որոշման հետ. սա է բանալին, որով կարող ենք կատարել օպտիմալ որոշում»,-ասաց ռեկտորի պաշտոնակատարը։

Վերջինս սա կարեւորագույն փոփոխություն համարեց. «Օրենքի համաձայն՝ մրցութային կարգը հաստատվել է մեր գիտական խորհրդի կողմից։ Նիստը, որի ընթացքում քննարկվում էր այդ կարգը, տեւել է 3-4 ժամ, եղել են բազմաթիվ առաջարկներ, քննարկումներ»։

Ռուբեն Հայրապետյանն ընդգծեց, որ յուրաքանչյուր մրցութային կարգ ենթադրում է ոչ միայն հանձնաժողովների առկայություն, այլեւ չափելի, հստակ մեխանիզմներ. «Մենք ունենք 13 չափանիշներ, դրանից մեկը, օրինակ, անգլերենի իմացությունն է, մյուսը՝ ռուսերենի, երրորդը վերաբերում է մաթեմատիկական բազային հմտություններին, վերապատրաստմանը, մասնագիտական աշխատանքներին, գիտական աստիճանին եւ այլն։ Ուզում եմ ասել, որ հարգելով իրենց դժգոհություններն արտահայտող մեր բոլոր դասախոսներին՝ ես տեսնում եմ, որ մամուլով իրենց բողոքն արտահայտելիս այս 13 չափանիշներից ընտրում են միայն նրանք, որոնք կարող են քննարկումների առիթ դառնալ։ Չափանիշներից մեկը, այո, անգլերենի իմացությունն է, բայց դա տալիս է մեկ միավոր, դրան զուգահեռ կան այլ չափանիշներ եւս»։

Պատասխանելով լրագրողների հարցրերին՝ նա անդրադարձավ նաեւ իր ատենախոսության շուրջ ծավալված քննարկումներին՝ ասելով, որ մեկնաբանություններից շատերը իրականությանը չեն համապատասխանում. «Շատ են խոսում գրագողության մասին, բայց պետք է նշեմ, որ դաշտը կարգավորող օրենսդրությամբ գրագողություն հասկացություն չկա, իսկ այն շահարկումները, որ կատարվում են, վերաբերում են իմ ատենախոսության այն հատվածին, որտեղ կան հղումներ կամ հղումները բացակայել են»։

Ռեկտորի պաշտոնակատարը նշեց, որ որոշ մարդիկ, սեփական ատենախոսության հեղինակը չլինելով, քննադատում են, որ իր ատենախոսության մեջ կան խնդիրներ՝ կապված հղումների հետ։

Ամփոփելով իր պաշտոնավարման մի քանի ամիսները՝ Ռուբեն Հայրապետյանը խոսեց նաեւ միջնորդությունների մասին. «Ես կարող եմ երաշխավորել, որ Տնտեսագիտական համալսարանում այս ամիսների ընթացքում համենայն դեպս մասսայական միջնորդություններ չեն եղել, եւ իմ կողմից էլ չի եղել գեթ մեկ դեպք, երբ որեւէ ուսանողի համար վերեւից միջնորդություն իջնի, մինչդեռ ես օրական 30-40 զանգ կարող եմ ստանալ՝ բոլորին տալով «ոչ» պատասխանը»,-հայտարարեց ՀՊՏՀ ռեկտորի ժամանակավոր պաշտոնակատար Ռուբեն Հայրապետյանը. «Որպես այս ամենի հետեւանք՝ ասեմ, որ հունվարի քննաշրջանի  արդնունքերով 125 ուսանող ստիպված էր լքել մեր համալսարանը»։

Ռուբեն Հայրապետյանը նշեց, որ լուծել են թելադրության ընդունված պրակտիկայի հարցը. «21-րդ դարում դասախոսի կողմից դասախոսությունը թելադրությամբ ներկայացնելը անթուկատրելի է, դա նույն բանն է, ինչ դասախոսը չգա, չմտնի լսարան կամ նույն տեքսը ընթերցվի ինչ-որ համակարգի, ուսանողի կողմից»,-ասաց Հայրապետյանը՝ նշելով, որ անհասկանալի էր, թե տեխնիկական զարգացվածության առկա պայմաններում ինչու էին  80 րոպեները այդքան անարդյունավետ ծախսվում»։

Ռուբեն Հայրապետյանը հայտնեց նաեւ, որ ներդրել են ուսանողների աշխատանքի համակարգ. «Արդեն ակտիվացրել ենք այս համակարգը, ժամանակավոր հաստիքների համար մրցույթներ ենք հայտարարել, որպեսզի ուսանողները գան, համալսարանում աշխատեն, միաժամանակ կապ ենք հաստատել այլ գործատուների հետ, որպեսզի հետագայում եւս նրանք խնդիրներ չունենան»։

Հեղինակ` Միլենա Խաչիկյան