Փաստ ինֆո

ՀՀ պաշտպանության նախարարի պաշտոնակատարի մամուլի քարտուղար Արծրուն Հովհաննիսյանը լրագրողների հետ զրույցում պատմել է ԶՈՒ ՍՈՒ 25 ինքնաթիռի վթարից զոհված 1-ին կարգի օդաչու, փոխգնդապետ Արմեն Սլավիկի Բաբայանի և 3-րդ կարգի օդաչու, մայոր Մովսես Գևորգի Մանուկյանի մասին, որոնք այսօր Եռաբլուր պանթեոնում զինվորական կարգով հուղարկավորվեցին:

Արմեն Բաբայանը հոր հետ ջոկատով մասնակցել է Արցախյան պատերազմին` լինելով անչափահաս, հետո ընդունվել է Ավիացիոն ինստիտուտ և ավարտել: Արծրուն Հովհաննիսյանն ասաց, որ նրա հորեղբայրը մահացել է Արցախում էլի ավիավթարից, ով  ավիացիայի վարչության պետի տեղակալն էր, Խորհրդային Միությունում շատ հայտնի ինստրուկտոր-օդաչու:

«Արմենը գնացել էր հորեղբոր ճանապարհով, ցավոք, ինչպես ավիացիոն կանոններն են ասում՝ վթարի ենթարկվում են կա´մ գերպրոսֆեսիոնալները, կա´մ սկսնակները»,-ասել է նա՝ նշելով, որ նրան կուրսանտները շատ էին սիրում ու լավ ինստրուկտոր համարում:

Մովսես Մանուկյանի մասին Արծրուն Հովհաննիսյանն ասել է, որ Մովսեսի հոր և հորեղբոր հետ ծառայել է, և իրենք իրեն հարևան են: ընտանիքի անդամները, այդ թվում՝ նաև մայրը, օդաչուներ էին և Զինված ուժերում են ծառայում:

Արծրուն Հովհաննիսյանը նշեց, որ չնայած ասում են, թե օդաչուները չեն մահանում, նրանք գնում ու հետ չեն գալիս, սակայն նրանց մահը մեծ կորուստ համարեց:

Անդրադառնալով ՍՈւ-25-ի կործանման պատճառներին՝ մամլո խոսնակը բացառել է անձնային հարաբերության խնդիրը՝ նշելով, որ քննություն է իրականացվում:

«Քննություն կա, ցանկացած ավիացիոն միջադեպ, անկախ քրեական գործից, ունի մասնագիտական քննության հանձնաժողով, ես հիմա չեմ ուզում որևէ բան ասել: Ցավոք, ավիացիան այսպես է, կորուստներ լինում են»:

Աղբյուր` Փաստինֆո