Փաստ ինֆո

Հայաստանի Հանրապետության վարչապետի պաշտոնակատար Նիկոլ Փաշինյանը վստահեցնում է, որ կառավարության հասցեին հնչող ցանկացած քննադատություն շատ ուղիղ ընկալվում է, վերլուծվում է, հետևություններ են արվում: Ինչպես հաղորդում է «Արմենպրես»-ը, ՀՀ վարչապետի պաշտոնակատարը նման հայտարարությամբ հանդես եկավ Ազգային ժողովում վարչապետի ընտրության հարցի քննարկման ժամանակ ունեցած ելույթում: «Մենք չենք մտածում, որ մենք պետք է լինենք այնպիսի կառավարություն, որին ընդհանրապես չքննադատեն:

Դա բնական պրոցես է: Շատ են խոսում այն մասին, թե ո՞վ փորձ ունի, ո՞վ փորձ չունի: Մեզ քննադատում են անփորձների նշանակելու համար, և փորձառուներին նշանակելու համար, որովհետև ամեն քայլ, իհարկե, արժանի է քննադատության: Լավ է, որ քննադատում են: Բայց ես ուզում եմ մի բան ասել՝ այն, ինչ հիմա անում ենք և այն, ինչ արել ենք, դրա փորձը ոչ մեկ չունի, որովհետև այն, ինչ հիմա տեղի է ունենում Հայաստանում, աշխարհի ոչ մի երկրում նախկինում երբեք տեղի չի ունեցել: Այսօր աշխարհում գոյություն ունեցող բոլոր համակարգերի ձևավորման համար կան գիտահետազոտական մանրամասն նկարագրված գրքեր, տեսություններ և այլն:

Այն, ինչ մենք արել ենք, դուրս է եղել բոլոր տեսություններից, այդ թվում, խոստովանենք, նաև մեր ընկալումներից: Եվ այն, ինչ մենք հիմա անում ենք դուրս է բոլոր ընկալումներից և ստանդարտներից: Սա է մեր հիմնական առաքելությունը, սա է, որ Հայաստանն ու հայ ժողովրդին առանձնահատուկ է դարձնում Երկիր մոլորակի վրա: Այնպես որ, թող որևէ մեկը չմտածի, որ ինքը ունի բավարար փորձ այն երկիրը, այն նոր Հայաստանը ստեղծելու համար, որը մենք պետք է ստեղծենք: Այն, ինչ մենք ուզում ենք անել, այն, ինչ արդեն արել ենք եզակի է, ունիկալ, և աշխարհոքւմ սրա փորձը չկա: Սա մի գործընթաց է, որի մեջով մենք պետք է անցնենք: Մենք առաջամարտիկ ենք այս հարցում և չպետք է վախենանք առաջամարտիկ լինել, որովհետև դա բարձրացնում է մեր ժողովրդի և պետության հեղինակությունն ամբողջ աշխարհում»,- ասաց նա:

Նիկոլ Փաշինյանը, դիմելով հայ ժողովրդին, վստահեցրեց, որ նրանց բոլոր մեսիջներն ընկալված են, բոլոր քննադատություններն ընդունված են: «Ես ողջունում եմ քաղաքացիական հասարակության այն ներկայացուցիչներին, այն  լրատվամիջոցներին, որոնք խոշորացույցի տակ են առնում բոլոր պաշտոնյաների կյանքը, կենսագրությունը, ունեցվածքը, եկամուտները: Մենք երբեք ճշմարտությունից չենք վախենալու: Մենք միշտ համագործակցելու ենք նրանց հետ, ովքեր պայքարում են հանուն ճշմարտության՝ անկախ նրանից, թե այդ ճշմարտությունը մեզ համար դրական կլինի, թե բացասական: Մյուս կողմից ես հույս ունեմ, որ որևէ մեկը չի ցանկանում Հայաստանում տեսնել անողնաշար, անդեմ, անկարծիք, որոշումներ կայացնելու անընդունակ, ամեն քննադատությունից ճկվող, ամեն հարվածից քանդվող և նոկաուտի ենթարկվող կառավարություն:

Ես հույս ունեմ, որ ոչ մեկ չի ուզում այդպիսի կառավարություն ունենալ: Ամբողջ աշխարհում կան լավ կառավարություններ, վատ կառավարություններ, արդյունավետ ու ոչ արդյունավետ կառավարություններ, բայց յուրաքանչյուր պետության համար ամենամեծ աղետը թույլ կառավարությունն է: Ցանկացած երկրի համար ամենամեծ աղետը թույլ ղեկավարն ու իշխանությունն է: Մեր իշխանությունը երբեք չի լինելու թույլ, մեր իշխանությունը լինելու է սկզբունքային, այնտեղ, որտեղ պետք է, հարվածելու է, այնտեղ, որտեղ պետք է հարվածներ ստանա, ստանալու է այդ հարվածները և ամուր կանգնելու է ոտքերի վրա և մի միլիմետր չի շեղվելու ճշմարտությունից,  ծառայությունից և առաքելությունից»,- ասաց ՀՀ վարչապետի պաշտոնակատարը:

Փաշինյանը նաև հավաստիացրեց, որ կոռուպցիայի հետ կոնկրետ առնչություններ ունեցած, կոռուպցիայի մեջ թաթախված որևէ պաշտոնյա չի կարող Հայաստանում իրենց իշխանության տարիներին որևէ պաշտոն զբաղեցնել: «Արյան հետ առնչություն ունեցած որևէ պաշտոնյա չի կարող տեղ զբաղեցնել իշխանության մեջ: Կառավարման անարդյունավետ օրինակ ցույց տված որևէ անձ չի կարող տեղ ունենալ իշխանության մեջ»,- ընդգծեց նա:

Աղբյուր` Փաստինֆո