Փաստ ինֆո

Կազմակերպված խմբի կողմից ապօրինի զենք ռազմամթերք պահելու մեջ մեղադրվող Ժիրայր Սեֆիլյանի և մյուսների գործով այսօրվա դատական նիստը րոպեներ տևեց: Հաջորդ դատական նիստը նշանակվեց հունիսի 13-ին: Որոշվեց, որ այսուհետ դատական նիստերը տեղի են ունենանլու շաբաթական 2 անգամ՝ երեքշաբթի և ուրբաթ օրերին:

Մինչ դատական նիստն սկսվելը՝ ամբաստանյալներին դատական նիստերի դահլիճ ներկայացնելիս՝ դահլիճում ներկաների կողմից հնչում էին վանկարկումներ՝ «ազատություն», «մահ ռեժիմին», «Ժիրայր», «Գևորգ»:

Դատական նիստերի ապակեպատ դահլիճում նիստին ներկա հասարակայնության ներկայացուցիչները հնարավորություն չունեին լսելու, թե ինչ է տեղի ունենում նիստի ժամանակ, ձայնը առհասարակ չէր լսվում: Միայն երբ հայտարարվեց հաջորդ նիստի մասին, այդ ժամանակ բարձրախոսները միացված էին:

Այդ իսկ պատճառով պաշտպանական կողմից դժգոհություն և պահանջ հնչեց՝ ապահովել դատական նիստի հրապարակայնությունը:

Դատական նիստից հետո լրագրողները պաշտպանական կողմից ճշտեցին, թե ինչու է հետաձգվել դատական նիստը: 

Պարզվեց, որ ամբաստանյալ Գալուստ Գրիգորյանը պաշտպան չունի, իսկ ամբաստանյալ Սասունիկ Կիրակոսյանի պաշտպանը չէր ներկայացել՝ այլ զբաղվածության պատճառով:

Լրագրողների հետ զրույցում Ժիրայր Սեֆիլյանի պաշտպան, փաստաբան Տիգրան Հայրապետյանը հայտնեց, որ, ամենայն հավանականությամբ, մյուս դատական նիստին գործում կներգրավվի ամբաստանյալ Գալուստ Գրիգորյանի պաշտպանը , ով ժամանակ կխնդրի՝ գործի նյութերին ծանոթանալու համար:

Տ.Հայրապետյանը հայտնեց նաև, որ իրենք 38 հատոր գործին ծանոթացել են 4 ամսվա ընթացքում: 

Ավելի վաղ տեղեկացրել ենք， որ， ըստ նախաքննական մարմնի， 2015 թվականի ապրիլի 24-ին Երևան քաղաքում բռնություն գործադրելով, գույք ոչնչացնելով և վնասելով, ինչպես նաև իշխանության ներկայացուցչին զինված դիմադրություն ցույց տալով արտահայտված զանգվածային անկարգություններ հրահրելու ուղղակի դիտավորությամբ 2014 թվականի մայիսից Ժիրայր Սեֆիլյանը Պավել Մանուկյանի, Գարեգին Չուգասզյանի, Վարուժան Ավետիսյանի և Գևորգ Սաֆարյանի հետ նախնական համաձայնությամբ հավաքագրել են անձանց խմբեր, նախապատրաստել են զանգվածային անկարգությունների, ձեռք են բերել և իրենց բնակարաններում, գրասենյակներում, տրանսպորտային միջոցներում պահել են մարմնական վնասվածքներ հասցնելու համար հարմարեցված շուրջ չորս տասնյակ մետաղյա ձողեր և փայտե մահակներ, կռփազենք, էլեկտրապարպիչներ: Նշված հանցագործությունն ավարտին չի հասցվել հանցակիցների կամքից անկախ հանգամանքներով, քանի որ հանցագործության կատարմանն ուղղված գործողությունները բացահայտվել են իրավապահ մարմինների կողմից:

Ձեռք բերված փոխկապակցված ապացույցների բավարար համակցության հիման վրա զանգվածային անկարգություններ կազմակերպելու նախապատրաստության, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու և շենքեր, շինություններ զավթելու նախապատրաստության համար Ժիրայր Սեֆիլյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, 235-րդ հոդվածի 3-րդ մասով, 35-219-րդ հոդվածի 3-րդ մասի 1-ին կետով, զանգվածային անկարգություններ կազմակերպելու նախապատրաստության համար Գևորգ Սաֆարյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու համար Հրայր Թոփչյանին, Սասունիկ Կիրակոսյանին, Հովհաննես Պետրոսյանին, Գալուստ Գրիգորյանին և Ներսես Պողոսյանին մեղադրանքներ են ռաջադրվել ՀՀ քրեական օրենսգրքի 235-րդ հոդվածի 3-րդ մասով:

Լուսանկարը՝ Ֆոտոլուրի

Աղբյուր` Փաստինֆո