Փաստ ինֆո

Հայ-վրացական դիվանագիտական հարաբերությունների հաստատման 25-ամյակի կապակցությամբ Վանաձորում տեղի է ունեցել «Կովկասյան Գործընկերության» հերթական նախաձեռնությունը – կլոր սեղան-քննարկումը «Հայաստանն ու Վրաստանը 21 դարում․ ընդհանուր մարտահրավերներն ու համագործակցության հետագա խորացման հեռանկարները» խորագրով: Միջոցառման հիմնական նպատակներից մեկը երկու երկրների փորձագիտական և հասարակական հանրության միջև համագործակցության ամրապնդմանը նպաստելն է:

Ինչպես «Փաստինֆո»-ին տեղեկացրեցին «Կովկասյան գործունեություն» գրասենյակից, միջոցառումը բացել է «Կովկասյան Գործընկերության» հիմադիր նախագահ, 2011-14թթ. Վրաստանում Հայաստանի դեսպան Հովհաննես Մանուկյանն, ով կարևորել է նման ձևաչափի հարթակի ստեղծումն, ինչը նպաստավոր է հարևան երկրների հարաբերությունների վերաբերյալ անկաշկանդ երկխոսություն իրականացնելու համար: Ըստ Հովհաննես Մանուկյանի, երկու պետությունների հարաբերություններին առնչվող խնդիրներ գրեթե չկան, որոնք այսօր լուծելի չեն որևէ մակարդակում: Սակայն ժամանակակից մարտահրավերները այսօր բավականին շատ են, և երկխոսությունը մեր հարևանների հետ պետք է լինի մշտական, որպեսզի կարողանանք միասին կարգավորել տարածաշրջանում առկա խնդիրները:

Կոնֆերանսի առաջին հատվածում՝ «Հայաստան-Վրաստան քաղաքացիական հասարակություն» խորագրի ներքո ելույթ է ունեցել Ժողովրդավարության զարգացման կենտրոնի տնօրեն Վլադիմիր Բոժաձեն, ով ներկայացրել է Վրաստանում քաղհասարակության ձևավորման նախապատմությունը, նպաստավոր և խոչընդոտող հանգամանքներն, արդի վիճակն ու զարգացման հնարավոր նախադրյալները: Այս համատեքստում նա կարևորել է Վրաստանում բնակվող տարբեր ազգությունների հետ համագործակցության անհրաժեշտությունը:

Հելսինկյան քաղաքացիական ասամբլեայի Վանաձորի գրասենյակի տնօրեն Արթուր Սաքունցը ներկայացրել է հայ-վրացական հարաբերություններում հասարակության կառույցների համագործակցության և դրա դերի վերաբերյալ: «Խոսքի ազատության պաշտպանության կոմիտեի» ղեկավար Աշոտ Մելիքյանը հանդես է եկել Հայաստանում զանգվածային լրատվամիջոցների զարգացման փուլերի և ներկայում առկա իրավիճակի վերաբերյալ զեկույցով:

Թբիլիսիում ԱԼԻՔ մեդիայի հիմնադիր Արսեն Խառատյանն էլ անդրադարձել է Վրաստանում քաղաքացիական հասարակության կարգավիճակի, Վրաստանում հայկական համայնքի և դրա լուսաբանման, Հայաստանում ԶԼՄ-ների ներկա վիճակի ու զարգացման ուղիների և հայ-վրացական համագործակցության զարգացման գործում քաղաքացիական հասարակության կարևորության խնդիրներին:
«Բազմազգ Վրաստան» շարժման ղեկավար Առնոլդ Ստեփանյանն էլ խոսել է քաղաքացիական հասարակության կարևոր դերից՝ որպես պետությանը սթափեցնող և հանրային հուզումներն առաջնորդող գործիքի՝ ՝նշելով երկու երկրների հարաբերություններում մինչ օրս առկա պատմական կնճռոտ հարցերի հանգուցալուծման կարևորության մասին:

«Եզդիների տուն» կազմակերպության տնօրեն Ագիտ Միրզոևը նշել է, որ քանի որ բարիդրացիական հարաբերությունները կարևոր են երկու կողմերի համար էլ, պիտի մի կողմին հուզող տարածաշրջանային որևէ կոնֆլիկտի վերաբերյալ մյուս կողմն էլ փորձի լուծումներ առաջարկել, քանի որ անտարբերություն ցուցաբերելով՝ խնդիրը կարող է հասնել ավելի լայն մասշտաբների:

Վրաստանում տարածաշրջանային անվտանգության Կովկասյան ինստիտուտի տնօրեն Ալեքսանդր Ռուսեցկին խոսել է վրաց-աբխազական հակամարտության կարգավորման հարցում Հայաստանի դերի մասին և ընդգծել, որ տարածաշրջանային բոլոր հակամարտությունների կարգավորման հարցում շատ կարևոր է նաև երրորդ երկրների ներգրավածությունը: «Հայաստանն ու Վրաստանը 21-րդ դարում. ընդհանուր սպառնալիքները և համագործակցության հետագա ամրապնդման հեռանկարները» կլոր սեղանի ընթացքում փորձագետները խոսել են նաև կրոնական գործոնի և տարածաշրջանային քաղաքականության, հայ-վրացական հարաբերությունների ներկա վիճակի և հեռանկարների մասին:

Ըստ Վրաստանի «Խաղաղության հինմնադրամի» նախագահ Գիորգի Թումասյանի, չնայած որ հայ-վրացական հարաբերությունները ու համագործակցությունը դարերի վաղեմություն ունեն, բայց 2 պետությունների հարաբերությունները դինամիկ կերպով զարգանում են և նոր փուլ են մտնում հատկապես վերջին տարիներին: Անկախ նրանից, որ տարածաշրջանի անվտանգությունն ապահովելու հարցում Հայաստանն ու Վրաստանը ունեն տարբեր մոտեցումներ, այնուամենայնիվ պաշտոնական Երևանի և Թբիլիսիի համագործակցությունը տարածաշրջանի անվտանգության հարցում ապահովում են Հարավային Կովկասի ստաբիլությունը:

Աղբյուր` Փաստինֆո