Փաստ ինֆո

Բելառուսից Ադրբեջան արտահանձնված բլոգեր Ալեքսանդր Լապշինի կինը` Եկատերինան, ահազանգում է, որ իր ամուսնուն չեն տրամադրում անհրաժեշտ իրավաբանական աջակցություն, իսկ նշանակված հանրային պաշտպանն ամենևին հավատ չի ներշնչում: Ինչպես հաղորդում է «Արմենպրես»-ը, այս մասին նա գրառում է կատարել ֆեյսբուքյան էջում:

Եկատերինան նշում է, որ թեպետ Ադրբեջանի դատախազությունը հայտարարել է Լապշինին անհրաժեշտ իրավական աջակցություն տրամադրելու մասին, սակայն դա արվել է նրա` Բաքու ժամանելուց միայն 10 ժամ անց:

«Ինչո՞ւ Լապշինին անմիջապես չեն տրամադրել փաստաբան և թարգմանիչ: Հենց օդանավակայանում կամ Ադրբեջանի պետական անվտանգության ծառայության մեկուսարանում, որտեղ էլ հենց ԶԼՄ-ների փոխանցմամբ նա տեղափոխվել էր ժամանելուց հետո: Չեն գտե՞լ, չեն հասցրե՞լ: Իսկ ինչո՞ւ են հասցրել լրագրողների մի մեծ բանակ ուղարկել օդանավակայան: Հետևաբար` զարմանալի չէ, որ հատուկ ծառայությունների հետ մի գիշեր անցկացնելուց հետո Լապշինը չուներ որևէ բողոք: Անգամ մի քանի ժամն է բավական, որ ցանկացած մարդու շատ բան բացատրվի…»,- գրում է Եկատերինան:

Նա իր բողոքն է հայտնում հանրային պաշտպան Սաֆար Հուսեյնովի հետ կապված և նշում, որ անհասկանալի պատճառներով Կարմիր խաչի ներկայացուցիչներին չեն թույլատրում տեսակցել Լապշինի հետ, իսկ Հուսեյնովը շարունակ կրկնում է, թե իր ամուսինը բողոք չունի:

«Խնդիրը հենց փաստաբանի մեջ է, ով մինչ օրս պնդում էր, որ ընտանիքի անդամներից ոչ ոք իրեն չի դիմել` այն դեպքում, երբ ես նրան զանգահարել եմ և խոսել հետը թե փետրվարի 13-ին, թե փետրվարի 14-ին, թե այսօր»,- հայտնում է Լապշինի կինը: Նա ուշադրություն է հրավիրում այն փաստի վրա, որ Լապշինի փաստաբանն անգամ լավ ռուսերեն չգիտի և տարրական կենցաղային հարցերը նրան փակուղու մեջ են դնում, ուստի կասկածից վեր է, որ նա չի կարող Ալեքսանդր Լապշինին ճշգրտորեն բացատրել գործի իրավական ասպեկտները:

Եկատերինան ուշադրություն է հրավիրում նաև այն փաստի վրա, որ տարբեր հրապարակումներում Լապշինի տարբեր ցուցմունքների մասին է խոսք գնում:

«Այլ խոսքով` փաստաբանի առաքելությունն է ստանալ Ալեքսանդրի խոստովանությունն այն մասին, ինչ նա երբեք չի արել: Բարեկամներին համոզել, որ Ալեքսանդրի կյանքը հիասքանչ է, իսկ այն, որ նա չի զանգահարում, պարզաբանել նրանով, որ «օրենքն արգելում է»,- նշել է Լապշինի կինը:

Նա հայտնել է, որ առաջիկա 1-2 օրերի ընթացքում ՌԴ և Իսրայելի քաղաքացի բլոգեր Լապշինը նոր փաստաբան կունենա, հետևաբար՝ կհայտնվի նրա վիճակի մասին ավելի օբյեկտիվ տեղեկություն:

«Սակայն եթե ԶԼՄ-ներում տեսնեք, որ Ալեքսանդրը հրաժարվում է իր հարազատների կողﬕց փաստաբան վարձելուց, կարծում եմ ինքներդ կհասկանաք, որ նրան իսկապես անհրաժեշտ է առնվազն Կարմիր խաչի օգնությունը և շտապ»,- եզրափակել է Լապշինի կինը:

Բելառուսի Գերագույն դատարանը փետրվարի 7-ին մերժել էր Ռուսաստանի և Իսրայելի քաղաքացի, բլոգեր Ալեքսանդր Լապշինի բողոքը՝ կապված Բելառուսի Գլխավոր դատախազության որոշման հետ, որով Լապշինը պետք է արտահանձնվեր Ադրբեջան: Լապշինը նույն օրը հատուկ չվերթով տեղափոխվել է Մինսկից Բաքու ` պետական անվտանգության ծառայության աշխատակիցների ուղեկցությամբ:

Ադրբեջանում ՌԴ և Իսրայելի քաղաքացի բլոգերին սպառնում է քրեական հետապնդում 281.2 (երկրի դեմ ուղղված հրապարակային կոչեր) և 318 (Ադրբեջանի Հանրապետության պետական սահմանի անօրինական հատում) հոդվածներով:

Երկու հոդվածներով Լապշինին սպառնում է մինչև 5 տարվա ազատազրկում:

Աղբյուր` Փաստինֆո