Փաստ ինֆո

Հայաստանի մարմնամարզության հավաքականի գլխավոր մարզիչ Հակոբ Սերոբյանը «armenpress»-ում անցկացված մամուլի ասուլիսի ընթացքում խոսել է 2016 թվականի ընթացքում հայ մարմնամարզիկների գրանցած արդյունքների, հետագա պլանների, մարմնամարզության ֆեդերացիային ուղղված բյուջեի ավելացման և մարզագույքի ու մարզադահլիճի հետ կապված խնդիրների մասին:

«Եվրոպայի առաջնությանը շատ լավ մասնակցեցինք: Մենք սպասում էինք մեդալի, բայց չորս մեդալ ունեցանք, միջազգային մրցումներին միշտ հաղթողներ ունեցել ենք, օլիմպիական խաղերին, ըստ արդյունքների ակնկալիքներ ունեինք մեդալի, չէինք գնում ուղղակի մասնակցելու: Ճիշտ է, շատ մեծ հաջողություն էր, որ Մերդինյան Հարությունը եզրափակիչին մասնակցեց, բայց մինչև այժմ վերլուծում ենք, թե ինչու այդպես եղավ, հուսով եմ դասեր կքաղենք մեր սխալներից: Ընդհանուր առմամբ շատ հաջող տարի էր:Միջազգային մրցումներից ունեցել ենք 15 ոսկե մեդալ,4 արծաթե և 3 բրոնզե մեդալ: 

Մեր բյուջեն ավելացել է 20 միլիոն դրամով, նախկինում 21 միլիոն էր և դարձավ 41: Արդեն կարող ենք Եվրոպայի և աշխարհի առաջնությանը մասնակցել թիմով: Հուռի Գեբեշյանը շատ օգնեց, որպեսզի մտածենք նաև աղջիկների մարմնամարզության վրա և Միխայիլ Վորոնինի մրցաշարին կմասնակցի նաև Գրիգորյան Աննան»:

Հակոբ Սերոբյանը խոսեց նաև վնասվածք ստացած մարմնամարզիկ Արթուր Թովմասյանի մասին, ով ոտքի վիրահատության է ենթարկվել:

«Արթուր Թովմասյանն իմ կարծիքով նոր է սկսել: Վիրահատությունը շատ լավ կատարվել է և այսօր նա մարզվում է դահլիճում, 90 տոկոսով վերականգնվել է ոտքը: Շատ շնորհակալ եմ լավ վիրահատության համար: Հուսով եմ նա Դոհայում կայանալիք աշխարհի Գավաթի խաղարկությունում և Հայաստանի առաջնության ժամանակ շատ լավ արդյունքներ ցույց կտա: Թովմասյան Արթուրը շատ բան ունի անելու, շատ բան ունի ապացուցելու: Վստահ եմ, որ դեռ կաշխատի, քանի որ դեռ 24 տարեկան է և մինչև 30 տարեկան մեկ գործիքով կարող է աշխատել:

Ինչպես նշեցի, բյուջեի ավելացման շնորհիվ մրցումների մասնակցելու հնարավորությունները մեծացել են և մարմնամարզության մեջ ամեն օլիմպիական ցիկլից հետո փոփոխություններ են տեղի ունենում, փոխվում է օլիմպիական վարկանիշ ձեռք բերելու ձև և կանոնադրությունը: Վերջնական կանոնադրություն դեռ չկա, այն կլինի 2017 թվականին: Մենք արդեն չորս տարին պլանավորել ենք, թե ինչպես պետք է մասնակցենք: Մենք ուզում ենք թիմային մրցումներին մասնակցել, պետք է 12 լավագույն թիմերի մեջ լինել օլիմպիական ուղեգիր ձեռք բերելու համար և այստեղ մենք կաղալու ենք, որովհետև մինչև այս հնարավորություն չէր եղել մասնակցելու  և կաղալու ենք այն իմաստով, որ մեր տղաները առանձին գործիքների վրա լավ են հանդես գալիս, բայց բազմամարտիկներ են պետք, պետք է բազմամարտով մասնակցենք մրցումներին: Այստեղ գործիքների խնդիրն է, մենք 6 գործիքները չունենք ժամանակակից: Պտտաձողը մեր «ամենաթույլ տեղն» է:

Վերջերս Արթուր Դավթյանը մասնակցում էր Գերմանիայի Բունդեսլիգային և ինքը իր կողմից զուգափայտի ձողեր է բերել Հայաստան, որը մեզ մոտ կոտրված էր: Օդանավով բերեց և ես էլ զարմացա: Պտտաձողի ձողը կարող ենք հայթայթել, բայց պտտաձողի վրա աշխատելու համար անհրաժեշտ է «փոս», քանի որ բարդ վարժություններ կատարելուց ընկնելու են, մտածում ենք վնասվածք չունենալու մասին: Փուրձելու ենք աշխատել, երիտասարդներ ունենք: Մեզ պետք է 2018 թվականի աշխարհի առաջնությունում թիմային գրավել մինչև 24-րդ տեղը, որ հետագա պայքարում՝ 2019 թվականի աշխարհի առաջնությանը պետք է մասնակցեն միայն 24 թիմ և այնտեղ պետք է 12 լավագույն թիմերի մեջ լինել, որպեսզի կարողանանք օլիմպիական վարկանիշ ձեռք բերել թիմային պայքարում: 

Հունվարին հավաք ունենք, որը կանցնի Ծաղկաձորում, փետրվարին կամ մարտի սկիզբում կլինի Հայաստանի առաջնությունը և ըստ դրա արդյունքների 4 հոգի կմեկնեն Դոհա:  

Բյուջեի ավելացման հաշվին իրավունք չունենք մարզագույք ձեռք բերել, այն միայն հավաքներին և մրցումներին մասնակցելու համար է: Բոլորս էլ հասկանում ենք, որ միանգամից շատ մեծ ծախսեր են: Դահլիճն էլ լավ վիճակում չէ (Ալբերտ Ազարյանի անվան մարմնամարզության օլիմպիական հերթափոխի մանկապատանեկան մարզադպրոց, - խմբ. ): Մեր դահլիճի հատակը ոչ մի ձևով չի համապատասխանում, այն փայտից և արդեն փտած է: Ունենք հին «սպունգներ» բայց պետք է նորացվի, որպեսզի ապահովություն լինի: Սա կարևոր հարց է: Ամեն օլիմպիական ցիկլից հետո մրցավարներ քննություն են հանձնում, մենք միշտ գնացել ենք, ես երեք անգամ եմ գնացել իմ հաշվին: Նոր բյուջեով իրավունք չունենք մրցավարական որակավորում ստանալու դասընթացի մասնակցել»:

Մարմնամարզության հավաքականի գլխավոր մարզիչը խոսեց նաև միջազգային ֆեդերացիայի հնարավոր աջակցության մասին: Մարզմամարզության միջազգային ֆեդերացիայի նախագահ Բրունո Գրանդին օլիմպիական խաղերից հետո խոստացել էր մարզագույքի հարցում աջակցել հայկական ֆեդերացիային:

«Մեր գլխավոր քարտուղարը «FIG»-ի կոնգրեսում էր և այնտեղ նորից այդ հարցը բարձրացրել է: Նրանք փուլերով են ուզում օգնել իմ տեղեկություններով: Խնդրեցին գրել, թե որ գործիքն է առաջնահերթ պետք և այդպես հերթականությամբ:Գրել ենք, դեռ կոնկրետ պատասխան չկա, հույս ունենք կլինի: Միջազգային ֆեդերացիայի նախագահը ցանկություն է հայտնել գալ Հայաստան և տեղում տեսնել իրավիճակը, ինձ թվում է, որ եթե ստեղծվի հնարավորություն, որ նա գա և տեսնի, արդեն վերջնական կորոշվի:

Նոր մասնագիտացված մարզադպրոցի անհրաժեշտություն կա: Երրորդ էլ, չորրորդ էլ, հինգերորդն էլ, ինչքան շատ լինեն մարզադահլիճները այնքան ավելի օգտակար կլինեն մարմնամարզության  և մյուս մարզաձևերի համար, որովհետև մեր բոլոր երեխաները մարմնամարզիկներ չեն դառնում: Մեր մոտից գնում են տարբեր մարզաձևերի: Ուշադրությունն ակնհայտ է: Մերդինյան Հարությունը ունեցել է արդյունք 2011 թվականին, Արթուր Դավթյանը 2010 թվականին Եվրոպայի երիտասարդական առաջնությունում չեմպիոն դարձավ, բայց էլի այդ ուշադրությունը չկար: Կամաց-կամաց, երևի չէին հավատում, կամ մտածում էին միամիտ ստացվեց: Լրագրողները այն ժամանակ չէին հետաքրքրվում մարմնամարզությամբ, հիմա հետաքրքրվում են, ձեզնից բոլորից շնորհակալ եմ: Կառավարությունը մեծ ուշադրություն է դարձնում: Ես մի օրինակ բերեմ. եթե օլիմպիական խաղերի եզրափակիչին ներկա են լինում երկրի նախագահը և օլիմպիական կոմիտեի նախագահը, ուրեմն մեզ հավատում են: Դա պարտավորեցնում է: 20 միլիոն ավելացրել են, դա ուշադրություն է: 

Հակոբյանը խոսեց նաև միջազգային ֆեդերացիայի նորընտիր նախագահ Մորինարի Վատանաբեի ընտրության մասին: 

«Բրունո Գրանդիի ժամանակ ամեն սխալ քայլը տուգանք էր: Երբ դեռ Վատանաբեն չէր ընտրվել, բայց մենք գիտեինք, որ ինքը կլինի, բոլորը կողմ էին: Ինձ թվում է ավելի լավ կլինի: Թող լինի ճապոնական, միայն լավ բաներ ենք տեսել ճապոնացիներից ու ես վստահ եմ, որ եթե նա գա ու տեսնի՝ կօգնի»:  

Աղբյուր` armsport.am