Փաստ ինֆո

ՀՀարդարադատության նախարար Արփինե Հովհաննիսյանը մեծ պատասխանատվություն է համարում Հայաստանի Հանրապետական կուսակցության գործադիր մարմնի անդամ դառնալը: Ազգային ժողովում լրագրողների հետ զրույցում Արփինե Հովհաննիսյանն ընդգծեց, որ դա ենթադրում է կուսակցության ընդունած որոշումների համար առավել բարձր պատասխանատվություն:

«Եթե ավելի կոնկրետ բաներ եք ուզում, թույլ տվեք գործադիր մարմնի առաջին նիստը կայանա, որից հետո ես խոստանում եմ առավել մանրամասն խոսել»,- «Արմենպրես»-ի հաղորդմամբ՝ նշեց Հովհաննիսյանը:

Հարցին՝ ՀՀԿ ղեկավարության կողմից իր հետագա պաշտոնավարման վերաբերյալ խոստումներ տրվե՞լ են, նախարարը պատասխանեց. «Իհարկե, ոչ: Ընդհանրապես, ես կարծում եմ, որ որևէ մեկին պաշտոնավարման վերաբերյալ խոստում տալը կոռեկտ ձևակերպում չէր:

Իսկ նախագահի հայտարարությունը, որ ՀՀԿ-ի հաջողության դեպքում Կարեն Կարապետյանը կշարունակի գլխավորել կառավարությունը, վստահության քվե էր կառավարությանը՝ նաև հետագայում շարունակել բարեփոխումների գիծը, որ ներկայիս կառավարությունը վերցրել է իր վրա»:

Արփինե Հովհաննիսյանը վստահություն հայտնեց, որ ՀՀ վարչապետ Կարեն Կարապետյանը բարեփոխումների իրականացման ճանապարհին չի կաշկանդվի ՀՀԿ-ական լինելու հանգամանքից:

«Իրականում ես վստահ եմ, որ չկա նման բան: Դուք ընդունում եք, որ կառավարությունը սկսել է մի ընթացք, որում քայլ առ քայլ փոփոխություններ են լինում: Դուք կտեսնեք այդ քայլերի հաջորդականությունը, գնահատականներն էլ հետո կտաք»,- եզրափակեց արդարադատության նախարարը:

Լուսանկարը՝ Armenpress-ի

Աղբյուր` Փաստինֆո