Փաստ ինֆո

ՀՀ Ազգային անվտանգության ծառայության քննչական վարչությունում ավարտվել է Արթուր Վարդանյանի կողմից հանցավոր համագործակցություն ստեղծելու վերաբերյալ  2015թ. նոյեմբերի 24-ին հարուցված քրեական գործի քննությունը: Այս մասին հայտնում է ՀՀ ԱԱԾ մամուլի կենտրոնը:

Նախաքննության ընթացքում քրեական հետապնդում է իրականացվել թվով 33 անձանց նկատմամբ, որոնց մեղադրանքներ են առաջադրվել հանցավոր համագործակցություն ստեղծելու եւ ղեկավարելու (ՀՀ քրեական օրենսգրքի 223-րդ հոդվածի 1-ին մաս), հանցավոր համագործակցությանը մասնակցելու (ՀՀ քրեական օրենսգրքի 223-րդ հոդվածի 2-րդ մաս) և կազմակերպված խմբի կողմից  ապօրինի կերպով հրազեն, ռազմամթերք, պայթուցիկ նյութեր ձեռք բերելու, իրացնելու, պահելու, փոխադրելու եւ կրելու (ՀՀ քրեական օրենսգրքի 235-րդ հոդվածի 3-րդ մաս) համար:

2016 թ. հունիսի 8-ին 4 անձի մասով գործն անջատվել է, նրանց նկատմամբ  223-րդ հոդվածի  2-րդ մասով քրեական հետապնդումը  դադարեցվել է, իսկ  235-րդ հոդվածի  1-ին եւ 2-րդ  մասերի մեղադրանքներով  քրեական գործն ուղարկվել է դատարան:

Քրեական գործով անցնող 20 մեղադրյալների (Արթուր Վարդանյան, Արա Պողոսյան, Էդվարդ Ներսիսյան, Տիգրան Բոյաջյան, Վահագն Սալնազարյան, Ավետիս Բարեյան, Արթուր Եղիազարյան, Վաղինակ Ստեփանյան, Արման Հայրապետյան, Գևորգ Ջնդոյան, Ասյա Մկրտչյան, Մարինե Կաթանյան, Նելլի Մինասյան, Անտոն Դիկրան Թոթոնջյան, Խաչիկ Ավետիսյան, Արկադի Մարդոյան, Հարություն Սարիբեկյան, Վահան Շիրխանյան, Գառնիկ Մարգարյան, Վլադիմիր Առաքելյան) առաջադրված մեղադրանքները  լրացվել են իշխանությունը զավթելու նախապատրաստության մասով (ՀՀ քրեական օրենսգրքի  35-300-րդ հոդվածի 1-ին մաս), եւ գործը՝ դատախազի կողմից հաստատված մեղադրական եզրակացությամբ, ուղարկվել է Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարան: Եվս  9 մեղադրյալների նկատմամբ նախաքննությունը շարունակվում է:

Նախաքննության ընթացքում կատարված բազմաթիվ եւ մեծածավալ քննչական գործողությունների, այդ թվում՝ հարցաքննությունների, առերեսումների, խուզարկությունների, փորձաքննությունների արդյունքում  հավաքված ապացույցների, ինչպես նաեւ իրականացված օպերատիվ-հետախուզական միջոցառումների շրջանակներում ստացված տվյալների համակցությամբ պարզվել է, որ Արթուր Վարդանյանը, ունենալով զինված գործողությունների մասնակցության փորձ եւ ռազմական հմտություններ, իշխանությունը զավթելու նպատակով ստեղծել է հանցավոր համագործակցություն:

2015 թ. մայիսից  Ա.Վարդանյանը ձեռնամուխ է եղել  հանցավոր համագործակցությունը ձեւավորելու, այդ գործում ՀՀ քաղաքացիների ներգրավելու, զենք-զինամթերք հայթայթելու  եւ իշխանությունը  զավթելուն ուղղված այլ գործողություններ իրականացնելուն: 

2015 թ. նոյեմբերի 25-ին ՀՀ Ազգային անվտանգության ծառայության աշխատակիցների օպերատիվ-հետախուզական միջոցառումների արդյունքում հանցավոր խումբը բացահայտվել  եւ վնասազերծվել էր: Հայտնաբերվել էին մեծ քանակի  ռազմամթերք, պայթուցիկ եւ այլ նյութեր, զինվորական հանդերձանք, փաստաթղթեր եւ այլ իրեր:

Լուսանկարը՝ Shamshyan.com-ի

Աղբյուր` Փաստինֆո