Փաստ ինֆո

Ծննդկան Մերի Մարգարյանի և նրա դստեր մահվան գործով այսօրվա դատական նիստում հարցաքննվեցին «Շենգավիթ» ԲԿ-ի 4 բժիշկներ:

Մասնավորապես, Շենգավիթ» բժշկական կենտրոնի մանկաբարձության և գինեկոլոգիայի բաժանմունքի վարիչ Աշոտ Սիրունյանը, որպես մանկաբարձ գինեկոլոգ, գտնում է, որ 37,8 և ավելի բարձր ջերմություն ունեցող հղիները պետք է հոսպիտալացվեն, եթե կա ջերմություն, հղիությունը հսկող բժիշկը պետք է հղին հոսպիտալացնի և հետազոտի:

Միևնույն ժամանակ բժիշկ գինեկոլոգը գտնում է, որ «Շենգավիթ» ԲԿ-ի բժիշկների գործողությունները իրավաչափ են եղել, ճիշտ է գնահատվել Մերի Մարգարյանի վիճակը:

Սա այն դեպքում, երբ Մերի Մարգարյանը հոսպիտալացվել է 2015թ հուլիսի 26-ին, երբ 3 օր շարունակ ջերմել է, ու նրա հղիությունը վարող բժշկուհի Շուշանիկ Բախշյանը նրան հեռախոսով է բուժում նշանակել, որպես ջերմիջեցնող՝ ցուցում տվել խմել «պարացետամոլ» դեղահաբ:

Ինչ վերաբերում է Մերի Մարգարյանի դատաբժշկական փորձաքննության եզրակացությանը, համաձայն որի՝ նրա մոտ եղել է HELLP համախտանիշի զարգացում, ապա այս մասին «Շենգավիթ» ԲԿ-ում ընդհանրապես կասկածներ չեն ունեցել, ավելին՝ բաժնի վարիչ Աշոտ Սիրունյանն իր պրակտիկայում HELLP չի տեսել, կարդացել է այդ մասին:

Ի վերջո հուլիսի 27-ին «Շենգավիթ» ԲԿ-ում կատարված հետազոտություններից հետո, ըստ բաժնի վարիչի, Մերի Մարգարյանի մոտ կասկածվել է սուբարախնոիդալ արյունազեղում և մի քանի բժիշկների մասնակցությամբ կոնսիլիում է կազմակերպվել, որոշվել, որ Մերիին պետք է տեղափոխել բազմապրոֆիլային հիվանդանոց, քանի որ հետծննդյան խնամքը իրենք չեն կարող ապահովել. «Հիվանդը էդ աստիճանի ծանր չէր, որ պահանջվում էր կեսարյան հատում կատարել»:

Բաժնի վարիչի պնդմամբ՝ իրենք կեսարյան հատման ցուցում չեն ունեցել, կրիտիկական վիճակ չի եղել Մերիի մոտ:

Մերիի վիճակը «Էրեբունի» ԲԿ տեղափոխվելիս բավարա՞ր է գնահատվել, ծա՞նր, թե՞ միջին ծանրության, այդպես էլ հստակ պատասխան չտրվեց, Բախշյանի պաշտպան Ալեքսանդր Սիրունյանը հայտարարեց, որ միջին ծանրության է եղել, տուժողի իրավահաջորդի ներկայացուցիչ Մարինե Թովմասյանը, հղում կատարելով հիվանդության պատմագրին, նշեց. «Բախշյանը գրառել է բավարար, իսկ հիվանդանոցի բաժնի վարիչ Աշոտ Սիրունյանը մեկ ասաց ծանր էր, իսկ քիչ անց ասաց միջին ծանրության»:

Տուժողի իրավահաջորդի ներկայացուցչի կողմից հնչած հարցադրումների և գործում եղած փաստաթղթերի հրապարակման արդյունքում պարզվեց, որ Շուշանիկ Բախշյանն ընդամենը 6 ամիս վերապատրաստման դասընթացների է հաճախել:

Նշենք նաև, որ «Շենգավիթ» ԲԿ-ի մանկաբարձության և գինեկոլոգիայի բաժանմունքի վարիչ Աշոտ Սիրունյանը հայտարարեց, որ 4 տարվա մասնագիտական կրթություն է հարկավոր մանկաբարձ-գինեկոլոգ աշխատելու համար, իսկ այս տվյալների մասին բաժնի վարիչը տեղյակ էլ չէր, ասաց որ իրենց հիվանդանոցի ղեկավարությունը ընդունել է Շուշանիկ Բախշյանին, ինքը ի՞նչ իմանար, ապա շտապեց հավելել, որ իր պարտականությունների մեջ չէ կարդալ ու տեղեկանալ:

Ինչ վերաբերում է գործով մյուս ամբաստանյալ Անի Բաբելյանին, ով, հուլիսի 25-ին լինելով հերթապահ բժիշկ, Մերի Մարգարյանին չի հոսպիտալացրել, ապա, ըստ վկաների ցուցմունքի և այսօր դատարանում տված բաժնի վարիչ Աշոտ Սիրունյանի ցուցմունքի, Անի Բաբելյանն այդ ժամանակ բաժնի վարիչի հետ միասին վիրահատության է եղել, ինչն ուղղակիորեն չէր կարող թողներ ու վիրահատարանից դուրս գար:

Աղբյուր` Փաստինֆո