Փաստ ինֆո

Ազգային ժողովի պետաիրավական հարցերի մշտական հանձնաժողովի նախագահ Հովհաննես Սահակյանը պատգամավորներին ներկայացրեց ԱԺ նոր կանոնակարգ-օրենքի նախագիծը:

Պետաիրավական հարցերի մշտական հանձնաժողովում կազմակերպված աշխատանքային քննարկման ընթացքում Հովհաննես Սահակյանը նախ նշեց, որ սահմանադրական բարեփոխումների արդյունքում Հայաստանն անցնելու է խորհրդարանական կառավարման համակարգի:

«Մենք 2016թ հունվարին ձևավորել ենք աշխատանքային խումբ, որը մշակել է Ազգային ժողովի նոր կանոնակարգ-օրենքը: Կանոնակարգ-օրենքը սահմանադրական օրենք է, և մենք փորձել ենք վեր հանել հին կանոնակարգում առկա հիմնական խնդիրները և խորհրդարանին տալ այն մեխանիզմներն ու գործիքները, որոնք հնարավորություն կտան իրականացնել նոր Սահմանադրությամբ իր վրա դրված լիազորություններն ու պարտականությունները»,- «Արմենպրես»-ի հաղորդմամբ՝ ասաց Հովհաննես Սահակյանը:

Պատգամավորը հավելեց, որ Ազգային ժողովի գործող կանոնակարգ-օրենքը մի քանի անգամ փոփոխությունների է ենթարկվել և այս ընթացքում, կարծես թե, իր առջև դրված հիմնական խնդիրները լուծել է:

«Բայց, այնուամենայնիվ, կային որոշակի խնդիրներ, որոնք մենք փորձել ենք բարձրացնել և լուծումներ տալ նոր կանոնակարգ-օրենքով: Օրինակ, դրանցից մեկը Ազգային ժողովում օրակարգային հարցերի կուտակումն է, երբ մենք ականատես ենք լինում, որ նստաշրջանի և քառօրյա նիստերի օրակարգում կան հարցեր, որոնց խորհրդարանն այդպես էլ չի անդրադառնում: Մյուսը մշտական հանձնաժողովներում հարցերի քննարկման ընթացքում քվեարկությամբ նախագծերում փոփոխություններ կատարելու ընթացակարգերի բացակայությունն է:

Սա նույնպես շատ կարևոր դրույթ է, որին մենք փորձել ենք լուծում տալ նոր կանոնակարգով: Ազգային ժողովի նիստերում որոշ դեպքերում հարցերի երկարատև քննարկումը, կառավարությանը հարցապնդումներով դիﬔլու կարգը գործնականում չկիրառելը նույնպես կարևոր հարցեր են, որոնց հետ կապված մենք նոր մեխանիզմներ ենք դրել»,- մանրամասնեց Հովհաննես Սահակյանը:

Նա հիշեցրեց, որ ընդդիմադիր պատգամավորները շատ են բարձրաձայնել այն մասին, որ Ազգային ժողովի արտահերթ նիստերի օրակարգում ընդգրկվում են հարցեր, որոնք չեն քննարկվել մշտական հանձնաժողոﬖերում:

«Մենք այստեղ գնացել ենք լուծումների և սահմանել ենք, որ նախագիծը չի կարող ընդգրկվել արտահերթ նստաշրջանի օրակարգում, քանի դեռ քննարկման չի ենթարկվել մշտական հանձնաժողովներում: Թողել ենք մի փոքր բացառություն, եթե կառավարությունը, օրինակ, մեկ նախագծի դեպքում կներկայացնի հիմնավորում և կասի, որ դա պետք է արտահերթ քննարկման առարկա դառնա, քանի որ շատ կարևոր է օրհասական խնդիրների լուծման առումով»,- նշեց Սահակյանը:

Պատգամավորը հիշեցրեց, որ նոր Սահմանադրությամբ Ազգային ժողովը ստացել է մի շարք վերահսկողական ֆունկցիաներ, այդ թվում՝ վերահսկողություն գործադիր իշխանության նկատմամբ:

«Որպեսզի մենք կարողանանք իրականացնել այս սահմանադրական նորմը, մի քանի գործուն մեխանիզմներ ենք առաջարկել: Յուրաքանչյուր եռամսյակի ավարտից հետո 40 օրվա ընթացքում կառավարությունն Ազգային ժողով տեղեկանք է ներկայացնում պետական բյուջեի կատարման ընթացքի մասին, որը քննարկման է դրվում իրավասու մշտական հանձնաժողոﬖերում: Այսինքն, մենք ոչ թե հանդիպելու ենք տարին ﬔկ անգամ կամ տարվա վերջին, այլ յուրաքանչյուր եռամսյակից հետո մենք կառավարության կատարած աշխատանքը մանրամասն քննարկելու ենք»,- հավելեց պետաիրավական հարցերի մշտական հանձնաժողովի նախագահը:

Նա հիշեցրեց, որ նոր Սահմանադրությամբ բարձրացել է նաև խմբակցությունների դերը: Մասնավորապես, խմբակցությունները պետք է մշտապես նիստեր գումարեն: Սահակյանը նշեց, որ մշտական հանձնաժողովների նիստերի համար ներկայում առանձացված շաբաթ կա: Նոր կանոնակարգով խմբակցությունների նիստերի համար ևս առանձնացված շաբաթ կլինի, քանի որ խմբակցությունները պետք է պարբերաբար նիստեր գումարեն, իսկ որոշումները պետք է կայացվեն ձայների մեծամասնությամբ: Խմբակցությունների նիստերը կարող են լեգիտիմ համարվել, եթե դրան ներկա է խմբակցության անդամների կեսից ավելին: Խմբակցությունները կառավարությանը հարցապնդմամբ դիմելու իրավունք ունեն:

Նոր Սահմանադրությամբ և կանոնակարգով մեծացվում է նաև ԱԺ մշտական հանձնաժողովների դերը, որոնք նույնպես իրականացնելու են խորհրդարանական վերահսկողություն: Խորհրդարանական վերահսկողության իրականացման առումով մշտական հանձնաժողովները իրենց լիազորությունների շրջանակներում իրավասու են իրականացնել մի քանի այդպիսի գործառույթներ: Օրինակ` հանձնաժողովները կարող են վերահսկել պետական բյուջեի կատարման, օտարերկրյա պետություններից և միջազգային կազմակերպություններից ստացած վարկերի ու փոխառությունների իրականացման ընթացքը: Հանձնաժողովները վերահսկողություն են իրականացնելու նաև օրենքի և դրա հիման վրա ընդունված իրավական ակտերի արդյունավետության, ինչպես նաև դրան խոչընդոտող գործընթացների նկատմամբ:

Նոր կանոնակարգի նախագծի համաձայն՝ հերթական նստաշրջանի ընթացքում գումարվող նիստերից մեկում պատգամավորների ընդհանուր թվի առնվազն ¼ թվի պահանջով կարող է իրականացվել հասարակական հետաքրքրություն ներկայացնող թեմայով հրատապ քննարկում: Հովհաննես Սահակյանի գնահատմամբ՝ սա ընդդիմության և ընդհանրապես Ազգային ժողովի համար լուրջ գործիք կկարողանա հանդիսանալ, որպեսզի քննարկվեն կարևոր հարցեր, որոնք խորհրդարանում քննարկման առարկա չեն դառնում ընդդիմության քիչ ձայների պատճառով:

Աղբյուր` Փաստինֆո