Փաստ ինֆո

Սիրիայի հարցով Մոսկվայի հետ համագործակցելուց ամերիկյան իշխանությունների հրաժարումը նվեր կլինի ահաբեկիչների համար: Ըստ «ՌԻԱ Նովոստի»-ի, այս մասին հայտարարել է ռուսաստանյան ԱԳՆ-ի ներկայացուցիչ Մարիա Զախարովան:

Անցյալ շաբաթ ԱՄՆ պետքարտուղար Ջոն Քերրին հայտարարել էր, որ Վաշինգտոնը գտնվում է Սիրիայի հակամարտության կարգավորման հարցով Մոսկվայի հետ քննարկումների դադարեցման սահմանին: Դրանից հետո Սպիտակ տան մամուլի քարտուղար Ջոշ Էռնեստը հայտարարել էր, որ երկու երկրների համագործակցությունը «ակնկալվող արդյունքներ չի տվել»:

Զախարովան հիշեցրել է, որ Վաշինգտոնը երկար ժամանակ հերքում էր անգամ Սիրիայում ահաբեկիչների գոյություն ունենալը:

«Եթե Վաշինգտոնից հնչող սպառնալիքները փոխգործակցության դադարեցման մասին վերածվեն ձևակերպված որոշումների, ապա այլևս կասկածներ չեն լինի՝ Սպիտակ տունը գրոհայիններին իր թևի տակ է վերցրել, և ահաբեկչական փողոցում մեծ տոն է »,- գրել է դիվանագետը Facebook-ում:

ԱԳՆ ներկայացուցիչը նշել է, որ ԱՄՆ-ն մեկ անգամ չէ, որ «նվերներ» է արել ահաբեկիչներին: Մասնավորապես, նա հիշատակել է Վաշինգտոնի անկարողությունը սահմանազատել Ջեբհաթ ան-Նուսրի խմբավորումը չափավոր ընդդիմությունից:

Զախարովայի խոսքերը դարձել են ՄԱԿ-ում ԱՄՆ մշտական ներկայացուցիչ Սամանթա Փաուերի հայտարարության պատասխանը, վերջինս նույնպես հիշատակել է ահաբեկիչների համար «նվերների» մասին: Ճիշտ է, նշում է ռուսաստանյան լրատվամիջոցը, ամերիկյան դիվանագետի կարծիքով, գրոհայիններին սատարում են հենց Դամասկոսի ու Մոսկվայի գործողությունները, որոնք, իբրև «սադրում են փախստականների մեծ հոսքի առաջացումն ու ավելի շատ ռադիկալացումը»:

«Նրանք (Ռուսաստանը) չեն սատարում ռեժիմին՝ դա պայքար է ռեժիմի կողմում, ռմբակոծումներ ռեժիմի կողմից, որոնք դաժանությամբ գերազանցում են այն, ինչ մենք տեսել ենք ռեժիմի կողմից այս պատերազմի ընթացքում»,- ասել է Փաուերը:

Ամերիկացիները բազմիցս մեղադրել են Մոսկվային Սիրիայում քաղաքացիական թիրախներին հարվածելու համար, ճիշտ է, Վաշինգտոնն իր խոսքերը հաստաող որևէ ապացույց այդպես էլ չի ներկայացրել, գրում է գործակալությունը:
Մոսկվայում, իր հերթին, մշտապես խոսում են այն մասին, որ բոլոր հարվածները հասցվում են հետախուզական տեղեկատվության մանրակրկիտ ստուգումից հետո միայն:

Դիվանագետների վեճերը Սիրիայում իրավիճակի հերթական սրումն են հարուցել. կառավարական բանակը հայտարարել է Հալեպում ռազմական գործողություն սկսելու մասին: Այժմ կառավարական զորքերը վերահսկում են քաղաքի կեսը, սակայն արևելյան շրջանները նախկինի պես ահաբեկիչների ձեռքերում են:
Զինվորականները խաղաղ բնակիչներին կոչ են արել չմոտենալ ահաբեկիչների կուտակման վայրերին:
Սեպտեմբերի 19-ից Սիրիայում հրադադարի ռեժիմի ժամկետը սպառվել է: Ռուսաստանյան կողմը նշել է, որ այն պահպանվում էր միայն Դամասկոսի կողմից, իսկ ընդդիմությունն ու ահաբեկիչները օգտագործում էին այն ուժերը վերախմբավորելու համար:

Ի դեպ, ԱՄՆ-ում Ռուսաստանի դեսպանատունը ուժեղացրել է անվտանգության միջոցները՝ Հալեպում ռազմական գործողությունների նոր շրջափուլի դեմ «զայրույթի ու բողոքի համաշխարհային օր անցկացնելու» ծայրահեղականների սպառնալիքների պատճառով:

Մի շարք կազմակերպություններ կոչ են արել սեպտեմբերի 30-ին անցկացնել բողոքի ակցիաներ՝ համատեղելով դրանք մահմեդականների համար ավանդական ուրբաթօրյա աղոթքների հետ:
Վաշինգտոնում ռուսաստանյան դիվանագիտական առաքելության մամուլի քարտուղար Յուրի Մելնիկը պատմել է «ՌԻԱ Նովոստի»-ին, որ դեսպանատունն արդեն զգուշացրել է ԱՄՆ-ում բնակվող ռուսաստանցիներին հնարավոր սպառնալիքների մասին:

«Խորհուրդ ենք տալիս ռուսաստանյան քաղաքացիներին հեռու մնալ մարդկանց զանգվածային կուտակումների վայրերից, զգոնություն դրսևորել ու հետևել ԱԳՆ խորհուրդներին»,- նշել է Մելնիկը:

Աղբյուր` Փաստինֆո