Փաստ ինֆո

Ազգային ժողովն այսօրվա արտահերթ նիստում ընդունելով նախօրեին քննարկված օրինագծերը՝ ավարտեց սեպտեմբերի 26-ից գումարված արտահերթ նիստի աշխատանքը:

Այդ թվում, 79 «կողմ», 24 «դեմ» և 1 «ձեռնպահ» ձայներով երկրորդ ընթերցմամբ ընդունվեց վիճահարույց ՀՀ հարկային օրենսգրքի նախագիծը:

Կողմ քվեարկեցին հիմնականում ՀՀԿ և ՀՅԴ խմբակցությունները, «Բարգավաճ Հայաստան» խմբակցության ոչ ԲՀԿ-ական պատգամավորներից մոտ մեկ տասնյակը:

Մինչև քվեարկությունը «Օրինաց երկիր» խմբակցության ղեկավար Հեղինե Բիշարյանը հայտարարեց, թե խմբակցությունը դեմ է քվեարկելու, և կոչ արեց մյուսներին ևս դեմ արտահայտվել:

Ըստ նրա՝ նախօրեին «դատարկ դահլիճում քննարկվել է նախագիծը, որը հաստափոր է և բավականին նոր փոփոխություններով», որը պետք է լայն քննարկման առարկա դառնար, այդ թվում՝ նաև նոր կառավարության կողմից: «Ստացվում է այնպես, որ ձևավորվել է նոր կառավարություն, բայց մենք աշխատում ենք հին ոճով և կանգնած ենք կոտրած հին տաշտակի առջև»,-ասաց նա:

«Բարգավաճ Հայաստան» խմբակցության ղեկավար Նաիրա Զոհրաբյանն էլ հորդորեց նախագիծը չդնել քվեարկության: «Պատահական չէ, որ նույնիսկ խորհրդարանական մեծամասնության պատգամավորները, ովքեր, վստահաբար, կողմ են քվեարկելու, որովհետև այդպես է իրենց հանձնարարված, դեմ են այս օրենսգրքին: Չի կարելի նման խաղի կանոն սահմանել, որն ուղղակիորեն կործանելու է փոքր և միջին ձեռներեցությունը»,-հայտարարեց նա:

Մի շարք ընդդիմախոսներ ևս պնդեցին, որ կարևորագույն նախագիծը թեև որոշակի փոփոխությունների է ենթարկվել, այդուհանդերձ ՓՄՁ-երին կգցի վատ վիճակի մեջ:

Այս պնդումներին հակադարձեց ԱԺ տնտեսական հարցերի մշտական հանձնաժողովի նախագահ, հանրապետական Վարդան Այվազյանը՝ նշելով, թե վերջին ժամանակահատվածում՝ մոտ երկու ամսվա ընթացքում, նախագիծը քննարկվել է 25 անգամ, պատգամավորների կողմից արված 300 առաջարկությունների գերակշիռ մասն ընդունված է: «Առաջին ընթերցմամբ ներկայացված Հարկային օրենսգիրքը հիմնարար փոխվել է»,-վստահեցրեց նա՝ ընդգծելով, թե երկրորդ ընթերցմամբ ներկայացված նախագիծը՝ ի համեմատ առաջին ընթերցմամբ ընդունվածի, «բացարձակապես այլ որակի փաստաթուղթ է»:

Աղբյուր` Փաստինֆո