Փաստ ինֆո

«Ֆեռո» ընկերության նախկին սեփականատեր Ռոբերտ Ավետիսյանն ակնհայտորեն անհրաժեշտ պաշտպանության սահմաններում է գործել, սակայն նրան առաջադրվել է սպանության փորձի անհիմն ու ապօրինի մեղադրանք: «Փաստինֆո»-ի լրագրողի հետ զրույցում այսպիսի տեսակետ հայտնեց Ռ.Ավետիսյանի պաշտպան, փաստաբան Ինեսսա Պետրոսյանը:

Որոշակի գումարային հարցերի շուրջ խոսելու համար Ռոբերտ Ավետիսյանը Ռուբեն Կոստանյանի՝ Նորագյուղցի Բոգոյի, հրավերով հուլիսի 20-ին գնացել է ավտոկայանի շրջակայքում գտնվող «555» հացատուն: Կոստանյանի աշխատասենյակում, որտեղ առնվազն ևս երկու անձինք են եղել, խոսակցությունը չի ստացվել. Ռոբերտ Ավետիսյանից գումար էին պահանջում, ինքն էլ ասում էր, որ այս պահին գումարային խնդիրներ ունի և առաջիկայում կլուծի այդ հարցերը: Պատասխանը չի բավարարել հակառակ կողմին, և հյուրին՝ Ռոբերտ Ավետիսյանին, սաստիկ ծեծի են ենթարկել: Ծեծի ընթացքում Ռոբերտ Ավետիսյանն երկու ձեռքով բռնել է իր գլուխը, խնդրել, որ իրեն բաց թողնեն, հասկանալով, որ իր կյանքին վտանգ է սպառնում: Ապա իր մոտ եղած, տարիներ առաջ ԼՂՀ ոստիկանապետի կողմից ստացված օրինական ատրճանակը ներքև պահած լիցքավորել է, ասելով նրանց, որ հեռու գնան: Բայց նրանք չեն հեռացել և վեճն էլ չի դադարել:

Ռոբերտը՝ զենքը պահելով ներքև, արձակել է կրակոց, որը դիպել է Ռուբեն Կոստանյանի ոտքի ծնկից ներքև հատվածին, նրանք էլ փորձել են իրեն հարվածել: Տեսնելով զինված անձի՝ Ռոբերտ Ավետիսյանը շրջվել է դեպի պատը և պատի մոտից կրակել նորից դեպի ներքև՝ գնդակը ոչ մեկի չի դիպել: Այդ ընթացքում Ռոբերտի ոտքի վերին ազդրային շրջանում ոտքը թուլացել է, նա ուշագնաց ընկել է՝զենքը վայր գցելով:

Պաշտպանը նշեց, որ վեճի ժամանակ կողմերն իրարից շատ մոտ են գտնվել, հեռավորությունը առավելագույնը եղել է կես մետր: Ուստի եթե Ռոբերտ Ավետիսյանը ցանկություն ունենար որևէ մեկին սպանել, առանձնակի ջանքեր պետք չէր լինի գործադրել: Ռոբերտն իր բոլոր ցուցմունքներում միշտ պնդել է՝ «մի խնդիր ունեի՝ փրկել իմ կյանքը, դուրս գալ, փրկվել»:

Ռոբերտ Ավետիսյանին շատ ծանր վիճակում, արյունահոսելով, կոմայի մեջ հասցրել են «Աստղիկ» բժշկական կենտրոն: Այնտեղ նա գտնվել է շուրջ տասն օր, որից չորս օրը վերակենդանացման բաժանմունքում, քանի որ «հյուրընկալության» ընթացքում ստացել էր բավականին լուրջ վնասվածքներ՝ աջ ազդրի հրազենային գնդակային միջանցիկ վիրավորում, մակերասյին ազդրային զարկերակի՝ ազդրային երակի ճյուղերի վնասումով, ձախ ազդրի և սրունքի հրազենային, աջ ազդրի հրազենային գնդակային միջանցիկ վիրավորում, մակերեսային ազդրային զարկերակի և ազդրային երակի ճյուղերի վնասում, ձախ ազդրի և սրունքի հրազենային գնդակային շոշափող վիրավորում, վնասվածքները պատճառվել են հրազենից արձակված կրակոցով:

Ըստ Ինեսսա Պետրոսյանի, վերակենդանացման բաժանմունքից հիվանդասենյակ տեղափոխվելուց ի վեր իր պաշտպանյալը հարցաքննվել է, մանրամասն ցուցմունքներ տվել ծեծի հանգամանքների վերաբերյալ, որ ինքը ծեծված է եղել և թե ինչ պայմաններում է իր կողմից այդ կրակոցն արձակվել: Նա պարտաճանաչ ներկայացել է քննչական բոլոր գործողություններին՝ մասնակցելով մի շարք առերեսումների, անհրաժեշտ բոլոր քննչական գործողությունների:

Եվ հանկարծ, սեպտեմբերի 5-ին քննիչը հրավիրել է իրենց աշխատասենակ՝ ասելով, որ հրավիրում է հերթական քննչական գործողության, և ներկայացրել սպանության փորձ կատարելու մեղադրանք առաջադրելու որոշումը: (Ի դեպ, քրեական գործը հարուցվել դեպքի օրը՝ ՀՀ քրեական օրենսգրքի 112-րդ հոդվածի 2-րդ մասի 9-րդ կետի՝ խուլիգանական դրդումներով դիտավորությամբ առողջությանը ծանր վնաս պատճառելը, հատկանիշներով):

Մեղադրանք առաջադրելու օրը Ռոբերտ Ավետիսյանին ծանոթացրել են դատաբժշկական փորձաքննությունների եզրակացություններին, ըստ որոնց թե՛ Ռ. Ավետիսյանը, և թե՛ մյուս անձը ստացել են միջին ծանրության վնասվածքներ: Ընդ որում, ըստ պաշտպանական կողմի, փորձագետի կողմից չեն արձանագրվել Ռոբերտ Ավետիսյանի դեմքին ակնհայտորեն առկա կապտուկները, վնասվածքները: Ըստ կողմի տեղեկությունների, քննիչը նշանակել է դատաբժշկական կրկնակի փորձաքննություն:

Ավելին՝ Ռ.Ավետիսյանին կալանավորելու միջնորդություն է ներկայացվել դատարան, վերջինս այն քննել է, և թեպետ ակնհայտ է, որ հիմնավոր կասկածն ուղղակի բացակայում է, նա ներկայացել է բոլոր քննչական գործողություններին, այսինքն՝ քննությունից թաքնվելու որևէ նպատակ չի ունեցել, դատարանն որոշել է կալանավորել նրան:

Դատարանում պարզ է դարձել, որ այդ մեղադրանքն առաջադրվել է դատախազի ցուցումով: «Ակնհայտ է, որ վարույթ իրականացնող մարմինն այլ տեսակետ ուներ, բայց դատախազության կողմից այլ ցուցում էր տրվել: Իմ պաշտպանյալը երևի դարձավ Քննչական կոմիտե-դատախազություն հարաբերությունների զոհը: Այդ պատճառով էլ նրան առաջադրվեց այդ ապօրինի և անհիմն մեղադրանքը»,- ասաց Ինեսսա Պետրոսյանը:

Ըստ Ի.Պետրոսյանի, այս ամենը խոսում է այն մասին, որ երկրում գործում է ակնհայտ անօրինական վիճակ, երբ մարդուն կարող են տանել, ծեծել, կյանքը վտանգել և եթե անձը փորձում է պաշտպանվել, նրան ծանրագույն, ապօրինի մեղադրանք է առաջադրվում:

Ինեսսա Պետրոսյանը հայտնեց, որ այսօր Վերաքննիչ դատարան է բողոքարկելու իր պաշտպանյալին կալանավորելու դատարանի որոշումը:

«Փաստինֆո»-ն կանդրադառնա գործի հետագա զարգացումներին։

Աղբյուր` Փաստինֆո