Փաստ ինֆո

Մալաթիայի նախկին թաղապետի որդու՝ Սեդրակ Զատիկյանի, սպանության պատվերի վերաբերյալ գործով այսօրվա դատական նիստում ամբաստանյալ Նարեկ Խաչատրյանի պաշտպան Վարդուհի Էլբակյանը պնդեց իր պաշտպանյալի նկատմամբ ստացիոնար դատահոգեբուժական փորձաքննություն նշանակելու իր միջնորդությունը:

Պաշտպանը գտնում է, որ իր պաշտպանյալի նկատմամբ կատարված ամբուլատոր փորձաքննությունը թերի է, քանի որ որոշ հարցեր անպատասխան են մնացել:

Մեղադրողն առարկեց միջնորդության դեմ:

Դատարանը խորհրդակցական սենյակ կհեռանա ու միջնորդության վերաբերյալ որոշում կկայացնի արդեն հաջորդ նիստում:

Սեդրակ Զատիկյանի սպանության պատվերի գործով պաշտպանական կողմը միջնորդեց հարցաքննել դատապարտյալ Ստեփան Հակոբյանին

Այս  միջնորդության քննարկումը դատարանի կողմից հետաձգվել էր, որոշվել էր մինչև այդ դատարան հրավիրել ու հարցաքննել հիշյալ դատահոգեբուժական ամբուլատոր փորձաքննություն իրականացրած փորձագետներին, որոնք հարցաքննվեցին այսօրվա դատական նիստում:

Փորձաքննությունն իրականացվել էր 2015թ.՝  Նարեկ Խաչատրյանի 2003-2006թթ. ամբուլատոր քարտի ու քրեական գործերի տվյալների, ինչպես նաև նրան ուղղված հարցերի պատասխանների հիման վրա: Ի պատասխան Վարդուհի Էլբակյանի հարցերի՝ փորձագետները նշեցին, որ իրենք Ն.Խաչատրյանի վիճակի վերաբերյալ նոր տվյալներ չեն ունեցել: Ըստ նրանց, ամբուլատոր փորձաքննությունը բավարար է եղել եզրակացության հանգելու համար և ստացիոնար պայմաններում փորձաքննություն իրականացնելու անհրաժեշտություն չի առաջացել:

Նարեկ Խաչատրյանը դժգոհություն հայտնեց անցկացված ամբուլատոր փորձաքննությունից՝  հայտարարելով. «Ստեղ թուղթ են նայում, ոչ թե մարդուն են նայում: 20 րոպեում թղթով որոշել չի լինի»:

Ամբաստանյալն ևս մեկ անգամ հերքեց իր մեղադրանքը. «9 տարի սպասել եմ, որ գամ արդարացվեմ: Իմ մասին որևէ մեկը ցուցմունք տվե՞լ է»:

Նշենք, որ Սեդրակ Զատիկյանի սպանության վերաբերյալ սա արդեն երրորդ գործն է՝ արդեն իսկ երկու մեղադրական դատավճիռ է կայացվել սպանությունն իրականացրած անձի ու նրան օժանդակած անձանց վերաբերյալ, ինչպես նաև սպանության պատվեր տալու վերաբերյալ ևս մեկ գործով:

Աղբյուր` Փաստինֆո