Փաստ ինֆո

Այսօր՝ օգոստոսի 24-ին, Ռիո դը Ժանեյրոյում կայացած Օլիմպիական խաղերին մասնակցած Հայաստանի մարմնամարզության հավաքականը հանդիպել է լրագրողների հետ: Այս մասին հայտնում է Armsport.am-ը: Թիմի գլխավոր մարզիչ Հակոբ Սերոբյան ամփոփել է մեր մարզիկների ելույթները:

«Քաղաքը նույն ժամային գոտում էր, ադապտացվել էինք, նորմալ գնացել, մեկնել էինք: Ես տեսել եմ տղաներին միայն գլխավոր պարապմունքի ժամանակ և մրցումներին, որովհետև մրցավար էի, ինձ չէր թույլատրվում նրանց տեսնել»,- Սերոբյանի խոսքերն է մեջբերում tert.am-ը:

Մարզիչն ասաց, որ խաղերը նորմալ հունով էին ընթանում, միայն մարմնամարզիկ Հարություն Մերդինյանն էր, որ մրսածություն ուներ, ինչն իր համար զարմանալի էր: Ամեն դեպքում, Հակոբ Սերոբյանի խոսքով, առաջին օրը մարզիկը լավ կատարեց վարժությունը, բարձր գնահատական ստացավ:

«Պլանավորել էինք, որ ավելի բարդ վարժություն կատարեր, բայց Հարութը դաստակի խնդիր ուներ, չէր կարող անել վարժությունը, որովհետև ընկնելու հավանականությունը մեծ էր: Դրա համար որոշեցինք նույն վարժությունն անել մաքրության վրա, որ գնահատական ստանանք»,- նշեց նա:

Ինչ վերաբերում է մարզիկ Արթուր Դավթյանին, ապա մարզիչն ասաց, որ առաջին ցատկը նա լավ է կատարել՝ ստիպելով իրեն ծափահարել:

«Ես վեր թռա՝ ծափ տվեցի, չնայած չէր կարելի, որովհետև մրցավար էի: Իսկ երկրորդ ցատկը շատ բարձրացավ, բայց սպորտային բախտն էր՝ ընկավ»,- ասաց Սերոբյանը:

Ըստ նրա, եթե Արթուր Դավթյանը ընկնելուն զուգահեռ գրավել է 11-րդ տեղը, դա լավ արդյունք է:

Մարզիչը չթաքցրեց, որ սխալներ եղել են:

«Ինչ-որ բան սխալ արեցինք: Պետք է ման գանք, գտնենք, թե ինչն էր սխալը: Լարված էր, գիշերները չեմ կարողացել քնել, պարզ է, որ Օլիմպիական խաղերն էին, պետք է լարված լիներ: Մենք գնացել էինք մեդալի համար, չէինք գնացել հենց այնպես մասնակցելու համար: Օլիմպիական չեմպիոն չէինք կարող, բայց երրորդ տեղի համար պայքարել կարող էինք: Եթե մեկը մեղավորություն ունի՝ առաջինը ես եմ… Ես պետք է ման գամ, թե որն էր սխալը, ման ենք գալիս, դեռ չենք գտնում, ժամանակի ընթացքում կգտնենք»,- մանրամասնեց Սերոբյանը:

Աղբյուր` Փաստինֆո