Փաստ ինֆո

Ermenihaber.am-ը գրում է, որ Թուրքիայի սոցանվտանգության խորհրդի (SGK) դադարեցրել է ԱՄՆ-ի Փենսիլվանիա նահանգում բնակվող իսլամի քարոզիչ, միլիարդատեր Ֆեթուլլահ Գյուլենի թոշակը:

Ինչպես հաղորդում է թուրքական «NTV» հեռուստալիքի լրատվական կայքը խորհուրդը Գյուլենին զրկել է նաև սոցիալական և անվտանգության բոլոր իրավունքներից: Գյուլենի թոշակը 2014թ.–ի դրությամբ կազմում էր 1157 թուրքական լիրա (մոտ 350 դոլար):

Սպասվում է, որ SGK-ի վերոնշյալ որոշումը տարածվելու է Թուրքիայում հուլիսի 15 -ին անհաջող ռազմական հեղաշրջման փորձին մասնակցած այլ անձանց վրա ևս:

Նշենք, որ Գյուլենին մեղադրում են հուլիսի 15-ին տեղի ունեցածի կազմակերպման մեջ:

Թուրքիայում նախագահ Էրդողանի հետ թշնամությամբ հայտնի Գյուլենի հետևորդները ներգրավված են եղել հատկապես դատական համակարգում և ուժային կառույցներում:

2013թ. վերջում Թուրքիայում ծագած կոռուպցիոն սկանդալից հետո իշխանությունները սկսել են ամբողջ համակարգը գյուլենականներից «մաքրելու» գործընթաց: Երկրում պարբերաբար իրականացվում են ոստիկանական հատուկ գործողություններ «զուգահեռ կառույցի» դեմ:

Թուրքական իշխանական մամուլը «Գյուլենական համայնքն» անվանում է նաև «զուգահեռ կառույց» և ասոցացնում ահաբեկչության հետ:

Աղբյուր` Փաստինֆո