Փաստ ինֆո

Միջազգային հանրությունն անհապաղ արձագանքել է Թուրքիայում ռազմական հեղաշրջման փորձի մասին հաղորդագրություններին:

Այսպես, ըստ BBC-ի ռուսական ծառայության, Սպիտակ տունը հայտարարել է, որ նախագահ Բարաք Օբաման Թուրքիայում իրադրությունը քննարկել է պետքարտուղար Ջոն Քերրիի հետ և որ նրանք երկուսն էլ համաձայնել են, որ Թուրքիայում բոլոր կողմերը պետք է պաշտպանեն ժողովրդավարական ճանապարհով ընտրված կառավարությանը:

Նրանք նաև Թուրքիայի բոլոր կողմերին կոչ են արել զսպվածություն հանդես բերել և խուսափել արյունահեղությունից:

Ջոն Քերրին, ով տվյալ պահին պաշտոնական այցով գտնվում է Ռուսաստանում, ասել է, որ նա արդեն քննարկել է իրադարձությունները Թուրքիայի արտաքին գործերի նախարարի հետ և հավաստիացրել, որ ԱՄՆ կառավարությունը լիովին սատարում է «ժողովրդավարական ճանապարհով ընտրված Թուրքիայի քաղաքացիական կառավարությանը»:

Միացյալ Նահանգները չափազանց անհանգստությամբ հետևում են Թուրքիայի իրադարձություններին, ասել է Քերրին:

ԱՄՆ պետդեպարտամենտը նույնպես Թուրքիայում բոլոր ամերիկացիներին կոչ է արել փողոց դուրս չգալ և հենց այս պահին չփորձել հասնել ամերիկյան դեսպանություն:

Ռուսաստանի արտաքին գործերի նախարար Սերգեյ Լավրովն ընդգծել է ցանկացած արյունահեղությունից խուսափելու անհրաժեշտության մասին՝ հավելելով, որ «Թուրքիայի խնդիրները պետք է լուծվեն սահմանադրությանը համապատասխան»:

ՌԴ նախագահի մամուլի քարտուղար Դմիտրի Պեսկովը ասել է, որ Մոսկվան խորապես մտահոգված է Թուրքիայից ստացված տեղեկություններից: Նա հավելել է, որ Ռուսաստանի համար գերակա հարցն այժմ մնում է Թուրքիայում ռուսաստանյան քաղաքացիների և կազմակերպությունների անվտանգության ապահովումը:

«Թուրքիան շատ կարևոր տարածաշրջանային տերություն է և, անկասկած, Թուրքիայում կայունությունն ու իրադրությունը անմիջական ազդեցություն է ունենում տարածաշրջանում իրավիճակի վրա»,- ասել է Պեսկովը:

«Մենք բոլորս շահագրգռված ենք, որպեսզի Թուրքիայում տեղի ունեցողը որքան հնարավոր է արագ ավարտվի լեգիտիմ ճանապարհով, և երկիրը վերադառնա կայունության, կանխատեսելիության, իրավակարգի ուղին»,- հավելել է Պեսկովը:

ՄԱԿ-ի գլխավոր քարտուղար Պան Գի Մունը հանդարտվելու կոչ է արել: Ըստ նրա մամուլի քարտուղարի, նա ուշադիր հետևում է, թե ինչ է տեղի ունենում Թուրքիայում:
ՆԱՏՕ-ի գլխավոր քարտուղար Յենս Ստոլտենբերգը Թուրքիային անվանել է «ՆԱՏՕ-ի կարևոր դաշնակից» և կոչ արել բոլոր կողմերին հարգել Թուրքիայի ժողովրդավարական ինստիտուտները:

Իրանը նույնպես հայտարարել է իր անհանգստության մասին հարևան երկրում տեղի ունեցող իրադարձությունների առնչությամբ: «Թուրքական ժողովրդի կայունությունը, ժողովրդավարությունը և անվտանգությունն ամենից վեր է: Անհրաժեշտ է միասնություն և խոհեմություն»,- Թվիթերում գրել է արտաքին գործերի նախարար Մոհամադ Ջավադ Զարիֆը:

Թուրքիայի մերձավոր դաշնակից Կատարի կառավարությունը դատապարտել է Թուրքիայում ռազմական հեղաշրջման փորձը:

Բուլղարիան Թուրքիայի հետ սահմանին ամրապնդել է իր սահմանապահ զորքերը, իսկ երկրի կառավարությունը իր քաղաքացիներին կոչ է արել ձեռնպահ մնալ Թուրքիա ուղևորություններից: Բուլղարիայի վարչապետ Բոյկո Բորիսովը հարևան երկրում իրավիճակը քննարկել է հետախուզության ծառայության և անվտանգության ուժերի ղեկավարների հետ:
Գերմանիայի կանցլեր Անգելա Մերկելի ներկայացուցիչ ասել է, որ Թուրքիայի բոլոր կողմերը պետք է հարգեն ժողովրդավարական կարգը:

Շտեֆֆեն Զեյբերտը գրել է Թվիթերում, որ «անհրաժեշտ է անել ամեն հնարավորը արյունահեղությունից խուսափելու համար»:

Բորիս Ջոնսոնը՝ Մեծ Բրիտանիայի նոր արտգործնախարարը, ասել է, որ ինքը «չափազանց մտահոգված է» իրադարձությունների զարգացմամբ, իսկ Անկարայում բրիտանական դեսպանությունը Մեծ Բրիտանիայի քաղաքացիներին զգուշացնում է փողոց դուրս չգալ:

Ֆեդերիկա Մոգերինին՝ արտաքին գործերով ԵՄ ներկայացուցիչը, Թուրքիայի բոլոր կողմերին կոչ է արել զսպվածություն հանդես բերել:

Աղբյուր` Փաստինֆո