Փաստ ինֆո

Բանդիտիզմի, սպանության, ավազակության, հափշտակությունների գործով այսօրվա դատական նիստում  պաշտպանական կողմը հանդես եկավ մի շարք միջնորդություններով, այդ թվում՝ դատարանի ինքնաբացարկի վերաբերյալ:

Դատարանի դահլիճից  տասը ժամով հեռացված ամբաստանյալներ Կարեն Վարդանյանի, Ռաֆայել Հարոյանի և Հայկ Կոջոյանի պաշտպանները բարձրացրեցին   իրենց  «աքսորված» պաշտպանյալներին դատական դահլիճ վերադարձնելու հարցը:

Այսպես, ամբաստանյալ Կարեն Վարդանյանի պաշտպան Թամարա Բաղդասարյանը հայտարարեց, որ իր պաշտպանյալի հանդեպ դատարանը երկու սանկցիա՝  նախազգուշացում ու տասը ժամով դատական նիստերի դահլիճից հեռացում,  է կիրառել նույն արարքի համար: Ուստի երկրորդ սանկցիան, այսինքն՝ դատական նիստերի դահլիճից հեռացնելն անօրինական է եղել: Պաշտպանը վիճարկեց նաև տասը ժամվա դատարանի կատարած հաշվարկը, այսինքն՝ պետք է լինի ոչ թե դատավարական տասը ժամ, այլ առհասարակ տասը ժամ, իսկ այդ ժամանակն արդեն սպառվել է: Պաշտպանը միջնորդեց իր փաստարկները հաշվի առնելով վերադարձնել իր պաշտպանյալին դատական նիստերի դահլիճ:

Մեղադրողն առարկեց միջնորդության դեմ՝ հայտարարելով, որ դատարանը ճիշտ է վարվել, ամբաստանյալը նախազգուշավել է, նրան հորդորվել է վերադառնալ դատական նիստերի դահլիճ, նա չի վերադարձել, ուստի կիրառվել է  երկրորդ, ավելի խիստ սանկցիան: Մեղադրողը նաև նշեց, որ տասն օրվա հաշվարկը վերաբերվում է միայն դատական պրոցեսին:  «Աքսորյալ» մյուս երկու ամբաստանյալների՝     Ռաֆայել Հարոյանի ու Հայկ Կոջոյանի պաշտպաններ Լիպարիտ Սիմոնյանն ու Արմեն Ֆերոյանն ևս հայտարարեցին, որ իրենք ևս ունեն նմանատիպ միջնորդություններ:

Դատարանը մերժեց Թ.Բաղդասարյանի միջնորդությունը՝  պատճառաբանելով, որ դատական սանկցիաները համաչափ են եղել կատարածին՝  ամբաստանյալը նախ նախազգուշացվել է, որ կրկին անգամ դատարանի կարգադրություններին չենթարկվելու դեպքում  կկիրառվի ավելի խիստ դատական սանկցիա: Դատարանը նշեց, որ իր կողմից ամեն կերպ ապահովվում  է արդար դատաքննության իրավունքի իրացումը, իսկ դատական սանկցիան վերանայեու հիմքեր չկան:

Միջնորդության մերժմանը հետևեց պաշտպան Լիպարիտ Սիմոնյանի միջնորդությունը դատարանի ինքնաբացարկի վերաբերյալ: Ըստ պաշտպանի, դատարանը կանխակալ մոտեցում ունի  իր պաշտպանյալի նկատմամբ՝ նախ  կիրառվել է տասը ժամով  դատական նիստերի դահլիճից հեռացվելու վերաբերյալ դատական սանկցիա, ապա անհիմն մերժվել է իր պաշտպանյալին դատական նիստերի դահլիճ վերադարձնելու իր միջնորդությունը: Լ.Սիմոնյանն ընդգծեց, որ  Ռ.Հարոյանի վարքագիծը մեղադրողի անգործության հետևանք է, վերջինս չի պարզում իր պաշտպանյալին արդարացնող հանգամանքները: Ամբաստանյալի վարքագիծն «ոչ թե ուղղված էր դատական նիստի բնականոն ընթացքը խոչընդոտելուն, այլ ըստ էության անելանելի միջոց էր իր անմեղությունն ապացուցելու առումով»: Բոլոր դեպքերում անձի կողմից արդարության հասնելու ձգտումը չի կարող լինել դատապարտելի և իր նկատմամբ իրականացվող արդարադատությանը մասնակցելուց զրկելու հիմք, ասաց Լ.Սիմոնյանը:

Պաշտպանը նշեց նաև, որ իր պաշտպանյալը մեղադրվում է երեք առանձնապես ծանր հոդվածներով, նա ցանկություն ունի մասնակցել նիստերին և հարցաքննել անձանց, որոնց ցուցմունքները դրվել են իր մեղադրանքի հիմքում, հանդես գալ միջնորդություններով ու հայտարարություններով:

Պաշտպանը հայտարարեց, որ ինքը կօգտվի բացարկներ ու ինքնաբացարկներ հայտնելու իրավունքից այնքան ժամանակ «մինչև տասը ժամը լրանա»:

Վկայակոչելով Մարդու իրավունքների եվրոպական դատարանի դիրքորոշումը՝ պաշտպանը նշեց. «Դատարանը պետք է  ոչ միայն անաչառ լինի, այլև դրսևորի իր անաչառությունը: Այս իմաստով արդարադատությունը պետք է ոչ միայն իրականացվի, այլև  տեսանելի լինի»:

Դատարանը մերժեց միջնորդությունը՝ ակնհայտ անհիմն լինելու պատճառով.  ներկայացված հիմնավորումներն անհիմն են ու յուրովի մեկնաբանության հետևանք:

Դատարանին ինքնաբացարկի միջնորդություն ներկայացրեց  նաև ամբաստանյալ Էդիտայի պաշտպան Սիմոն Ամիրխանյանը: Նա նշեց, որ դատարանում անօրինական կերպով հրապարակվել  են  իր պաշտպանյալին ակնհայտ մեղադրող  վկա Պետրոսյանի նախաքննական ցուցմունքները՝ դրանով իսկ վկան զրկվել է դատարանում ցուցմունքներ տալու հնարավորությունից, իսկ իր պաշտպանյալը՝  Մարդու իրավունքների եվրոպական կոնվենցիայով երաշխավորված՝   իր դեմ ցուցմունքներ տված անձին հարցաքննելու իրավունքից: Պաշտպանը նշեց, որ ապացույցն անթույլատրելի ճանաչելու իր միջնորդության վերաբերյալ որոշում կայացնելը  դատարանը հետաձգել է, իսկ դատակոչի  ցուցակից  վկային հանելու իր կողմից բարձրացված հարցին  դատարանն ընդհանրապես չի անդրադարձել:  Ըստ պաշտպանի, դատարանը կանխակալ վերաբերմունք է դրսևորել, դարձել պաշտպանական կողմի դատավարական հակառակորդ:

Մեղադրողն առարկեց միջնորդության դեմ՝ նշելով, որ վկայի ցուցմունքը հրապարակվել է թյուրիմացաբար՝ այլ վկայի ցուցմունքի փոխարեն, և այդ մասին պարզաբանում արդեն իսկ տրվել է:

Դատարանը մերժեց ինքնաբացարկի միջնորդությունը՝ ակնհայտ անհիմն լինելու հիմքով: Դատարանն ընդգծեց, որ ինքը պաշտպանում է իրավունքի շահերն ու ապահովում մրցակցային դատավարության անցկացումը: 

Հաջորդ դատական նիստում ինքնաբացարկի միջնորդությամբ հանդես կգա նաև Հայկ Կոջոյանի պաշտպան Արմեն Ֆերոյանը: