Փաստ ինֆո

ՀՀԿ ԳՄ նիստում այսօր քննարկվել է ՀՀ նախագահի այցը Նյու Յորք և հայ-ադրբեջանական սահմանին տիրող իրավիճակը:

Այս մասին քիչ առաջ նիստի ավարտին լրագրողների հետ հանդիպմանը տեղեկացրեց ՀՀԿ խոսնակ Էդուարդ Շարմազանովը:

Անդրադառնալով Նախագահի այցին, ՀՀԿ խոսնակը նշեց, որ, ՀՀ նախագահը հանդես եկավ համահայկական առաջնորդի դերում և ի լուր աշխարհի հայտարարեց, որ ցեղասպանության ճանաչման պահանջը չի ավարտվելու 100-րդ տարելիցով, և Հայաստանը շարունակելու է հանդես գալ ճանաչման պահանջով:

ԼՂ հակամարտության կարգավորման խնդրի հարցում ՀՀ նախագահը նշել է, որ Ադրբեջանն է խաղաղ բանակցությունները փակուղի տանող երկիրը, որ Ադրբեջանն է իր տեռորիստական և ավանտյուրիստական գործունեությամբ փակուղի տանում և Ադրբեջանն է, որ չի ցանկանում մոնիթորինգ իրականացնել շփման գծում: «ՀՀ նախագահը նշեց, որ Ադրբեջանն ու դրա իշխանություններն են, որ արհամարհում են ԵԱՀԿ ՄԽ համանախագահների 5 հայտարարությունները, հայտարարելով, որ եթե ՄԽ համանախագահները, միջազգային հանրությունը չեն կարող սանձել Ադրբեջանին և ստիպել նրան վերադառնալ դեպի կառուցողական հուն, ապա ՀՀ –ը, որպես ՀՀ և ԼՂՀ քաղաքացիների անվտանգության երաշխավոր,  կստիպի հակառակորդին հարգել խաղաղությունը»,- ասաց Էդ. Շարմազանովը:

Մերձավոր Արևելքին անդրադառնալով՝ ՀՀ նախագահը, Շարմազանովի բնորոշմամբ, հայտարարել է, որ «ՀՀ-ը պատրաստ է բոլոր դաշնակիցների հետ պայքարել հանուն լույսի և ընդդեմ խավարի»:

«Սահմաններում այս վերջին 2 օրերին անդորր է տիրում»,- ասաց Շարմազանովը` հավելելով, որ անձամբ է եղել սահմաններում ու հիացած է սահմանամերձ համայնքների բնակչության տոկունությամբ ու ամուր ոգով: «Տավուշցիներն ամուր կանգնած են իրենց պատմական հողին, և այստեղ որևէ խնդիր չկա»,- ասաց նա:

 Պատասխանելով լրագրողների հարցին` ՀՀԿ խոսնակը նշեց, որ սահմանադրության փոփոխությունների նախագծից ԱԺ ընտրությունների երկրորդ փուլի պահանջը չի հանվել, այն ուղղակի որոշ փոփոխությունների է ենթարկվել: Թե ինչ փոփոխությունների, Շարմազանովը նշեց, որ դրանք երկուշաբթի օրն ԱԺ-ում կներկայացնի Նախագահի ներկայացուցիչ Վարդան Պողոսյանը:

Լրագրողները նաև հարց ուղղեցին, թե քննարկվել է արդյոք ՀՀԿ նիստում Սյունիքի մարզպետի որդու կալանքից ազատվելու հարցը:  Էդուարդ Շարմազանովն ասաց, որ այդ հարցը նիստի ընթացքում չի քննարկվել: «Քաղաքական կուսակցությունը երբեք չի խառնվում իրավական հարցերին»,- հավելեց ՀՀԿ խոսնակը: