Փաստ ինֆո

01:35 ցուցարարներն սկսեցին վանկարկել Ազատ, անկախ Հայաստան` պահանջելով, որ կրթության նախարարը հեռանա ցուցարարների մոտից:

Կենդանի պատ կազմելուն միանալու համար Բաղրամյան պողոտա է ժամանել նաեւ հանրապետական նախարար Արմեն Աշոտյանը, ում այդքան էլ լավ չդիմավորեցին ցուցարարները եւ ժամը 01:27 սկսեցին վանկարկե Աշոտյա հեռացիր:

01:12-ին Բաղրամյան պողոտայում «Վիտամին» ակումբի տղաներին միացան նաև նախկին եւ ներկայիս պատգամավորներ,  քաղաքական գործիչներ, դերասաններ, փաստաբաններ, ովքեր կազմեցին խոստացված կենդանի պատը ոստիկանների ու ցուցարարների միջև՝ կանխելու համար հնարավոր բախումները, երեկվա սցենարի կրկնությունը: «Կենդանի պատը կմնա այնքան ժամանակ, քանի դեռ կա բռնության վտանգ»,- հայտարարեց Նիկոլ Փաշինյանը:

01:08 Ոստիկանության զինված ուժերի փոփոխություն կատարվեց: Պատնեշ կազմած ոստիկանները փոխարինվեցին մետաղական վահաններով զինված ոստիկանական զորքով:  Այս փոփոխությունը խուճապ առաջացրեց նստացույցի մասնակիցների շարքերում:  Երևանի ոստիկանապետ Աշոտ Կարապետյանը վստահեցրեց, որ անհանգստության կարիք չկա, «ընդամենը վերակարգի փոփոխություն է»:

00:50 Ցուցարարները պահանջում են երկարատև քննարկումներից հետո, ըստ էության մերժեցին նախագահի հետ հանդիպելու առաջարկը՝ փոխարենը պահանջելով, որպեսզի ուղիղ եթերում պատասխանեն իրենց ներկայացրած պահանջին՝ չեղարկել էլեկտրաէներգիայի սակագնի բարձրացման մասին ՀԾԿՀ որոշումը:

00:45 մտավորականներն ու քաղաքական գործիչներն, ովքեր խոստացել էին միանալ քաղաքացիական պայքարին ու, կենդանի պատնեշ կազմելով, կանխել ոստիկանների ու քաղաքացիների միջև հնարավոր բախումները, սկսեցին ժամանել Բաղրամյան պողոտա: Առաջինն այստեղ են «Վիտամին» ակումբի անդամենը՝ Վաչե Թովմասյանը, Արամ MP3-ն, Գարիկ Պապոյանը, Արմուշը և մյուսները:

23:04 Նախաձեռնության անդամներից մեկը լրագրողներին տեղեկացրեց, որ նախնական համաձայնություն է ձեռք բերվել նախագահ Սերժ Սարգսյանի հետ հանդիպելու: Նա չբացառեց, որ հանդիպմանը կմասնակցեն նաև երեք լրատվամիջողների ներկայացուցիչներ, որոնք ունեն ուղիղ եթերի հնարավորություն: Րոպեներ անց հանդիպման այլ մանրամասներ ու պայմաններ կհրապարակվեն արդեն պաշտոնապես:

22:42 Հունան Պողոսյանի հետ զրույցից հետո հանրահավաքի համակարգող խմբի անդամը լրագրողներին տեղեկացրեց, որ քննարկվում է Նախագահի հետ հնարավոր հանդիպման տարբերակը, որի մասին, նրա խոսքով, քիչ ավելի ուշ կհայտարարվի: Ցուցարարների՝ Նախագահի հետ հանդիպման ուղիղ եթերի պահանջը ևս քննարկվում է:

22:38 Ոստիկաններից կազմված պատնեշը, ցուցարարների պահանջով, շուրջ երկու մետր հետ նահանջեց: Հիշեցնենք, այս պահանջը ցուցարարները բարձրացրել էին դեռևս երեկ երեկոյան: Ցուցարարներին է դարձյալ մոտեցել նաև ոստիկանապետի տեղակալ Հունան Պողոսյանը, ով, ըստ ամենայնի, պատրաստվում է նոր հայտարարություն անել:

21:58 Օսիպյանը հայտարարեց, որ ոստիկանությունը չի պատրաստվում դիմել որևէ գործողությունների, քանի որ հավաքը կրում է խաղաղ բնույթ, սակայն նրա հավաստմամբ ցուցարարների մեջ կան սադրիչներ, ովքեր զինված են քարերով և տարբեր իրերով: Երևանի փոխոստիկանապետը խնդրեց սադրիչներին հեռացնել, հակառակ դեպքում ողջ պատասխանատվությունը կկրի համակարգող խումբը:

21:53 Օսիպյանը հայտարարեց, որ բոլոր ձերբակալվածները գտնվում են ազատության մեջ՝ հերքելով տարածված ասեկոսները: «Դուք սադրիչներին փնտրեք ձեր մեջ, և դրա վկայությունն այն է, որ դուք բանուկ մասում տեղադրել եք աղբամաններ» ,- ասաց Օսիպյանը՝ հավելելով, որ ցուցարարներն անհապաղ հեռացնեն դրանք:

21:45 Ակցիայի մասնակիցները որշեցին գիշերել Բաղրամյան պողոտայում: Իսկ նախօրեի սադրիչ գործողությունների կրկնությունից խուսափելու համար աղբամաններից պատնեշ են կառուցել ու դրանով ցուցարարներին առանձնացրել ոստիկաններից: Եթե նկատեն սադրիչ գործողություններ իրենց շարքերից, այդ մարդուն հեռացնելու են հավաքից:

21:27 Ցուցարարները ոստիկանական ուժերի հետ շփման գիծը պատնեշել են փողոցում տեղադրված աղբամաններով՝ պատսպարվելով ոստիկանության հնարավոր հարձակումներից:

20:22 Ցուցարարները նստացին Բաղրամյան պողոտայում:

20:12 Երևանի փոխոստիկանապես Վալերի Օսիպյանը բողոքի ինքնաբուխ հավաքն անօրինական որակեց՝ պահանջելով դադարեցնել անօրինական գործողությունները:

20: 08 Հավաքի մասնակիցները հասան ոստիկանների կազմած պատնեշին:Երթը կանգ առավ նույնհատվածում, ինչ երեկ:

20:00 Հանրահավաքի մասնակիցները մաշտոցի պողոտայից թեքվեցին դեպի Բաղրամյան պողոտա, որտեղ երեկվապես նախօրոք դիրքավորված են զրահապատ ու ջրցան մեքենաները:Ոստիկանները պատ են կազմել ու սպասում են ցուցարարերին:

19:50 Ցուցարարները կուռ շարքեր կազմած, թև թևի տված շարժվում են դեպի բաղրամյան պողոտա:

19:30  Ազատության հրապարակում անցկացվող հանրահավաքի մասնակիցները մինչև 20:00-ն ժամանակ են տվել ոստիկանությանը՝ ազատ արձակելու դեռևս անցնող գիշերվանից ոստիկանության բաժիններ տարված ու  դեռ անազատության մեջ պահվող իրենց ընկերներին:

19:25 Հանրահավաքի կազմակերպիչները քաղաքացիական անհնազանդության կոչ են անում՝ որպես առաջին քայլ՝ չվճարել էլեկտրաէներգիայի ամսական վարձավճարները:

19:08 հանրահավաքի կազմակերպիչները վերահաստատեցին իրենց պահանջը՝ էլեկտրաէներգիայի սակագնի փոփոխության մասին որոշումը չեղարկելու վերաբերյալ, որին ավելացել է ևս մեկ պահանջ՝ պատասխանատվության ենթարկել 22-23-ի գիշերը տեղի ունեցած բռնությունների հեղինակներին ու կատարողներին:

19:00  Հանրահավաքի մասնակիցներն ու կազմակերպիչները կոչ են անում ոստիկանությանը՝ լինել օրենքի սահմաններում:

18: 58  Արմեն Մկրտչյանը, ով նոր է դուրս եկել ոստիկանության Մասիսի բաժնից, Ազատության հրապարակում հայտարարեց, որ բերման ենթարկված 237 անձանցից շատերի նկատմամբ քրեական գործեր են հարուցվել  «խուլիգանության» հոդվածով:

18:56  Հանրահավաքի կազմակերպիչներն ու մասնակիցները կազմակերպվածության կոչ են անում: Շուտով կներկայացվի հանրահավաքի կազմկոմիտեն, որն էլ ղեկավարելու է հավաքի ընթացքը:

18:30  Ազատության հրապարակում հավաքված ցուցարարները որոշեցին երթով շարժվե դեպի Բաղրամյան պողոտա:

Երևանի Ազատության հրապարակում մեկնարկեց բողոքի նոր հանրահավաքը՝ ընդդեմ էլեկտրաէներգիայի սակագնի թանկացման:

Ազատության հրապարակը դարձյալ մարդաշատ է, ոստիկանները չեն խոչընդոտել քաղաքացիների մուտքը հրապարակ:

Հանրահավաքին ներկա են նաև մեծ թվով ոստիկաններ, նրանց թվում ՝ Երևանի փոխոստիկանապետ Վալերի Օսիպյանն ու այլ բարձրաստիճան ոստիկաններ: