Փաստ ինֆո

«Ցանկացած միության մեջ, ցանկացած տնտեսական հարաբերությունների մեջ որոշակի ժամանակ անհրաժեշտ է, որպեսզի եղած խնդիրները լուծվեն: Ես կարծում եմ, որ ոչ առաջինն ենք, ոչ վերջինն ենք: Նույնպիսի խնդիրներ ունեցել են նաև այլ միությունները, այլ տնտեսական տարածքներ: Կարծում եմ, որ այնուամենայնիվ համաձայնության կետեր կգտնվեն,և այդ անհաշտությունները կվերանան: Չեմ կարծում,որ դրանք շատ սկզբունքային են»,- այսօր լրագրողների հետ ճեպազրույցում ասաց ՀՀ էկոնոմիկայի նախարար Կարեն Ճշմարիտյանը` պատասխանելով այն հարցին, թե ի՞նչ է սպասվում Հայաստանին Եվրասիական տնտեսական միության կազմում՝ հաշվի առնելով այն, որ Բելառուսն ու Ղազախստանն արդեն տարաձայնություններ ունեն Ռուսաստանի հետ:

Լրագրողները նախարարին նաև հիշեցրեցին, որ Ռուսաստանը վերջերս ներեց Ուզբեկստանի պարտքը, և հետաքրքրվեցին, թե Հայաստանին ի՞նչ պարտք է ներել Ռուսաստանը:

«Գիտեք, պարտք ներել, որպես այդպիսին, դժվարանում եմ ասել: Իսկ թե Ռուսատանն այլ երկրներին ինչքա՞ն պարտք է ներում, դա իրենց սուվերեն իրավունք է»,- ասաց նախարարը:

Լրագրողներին հետաքրքրում էր նաև Կարեն Ճշմարիտյանի տեսակետը ՌԴ արտաքին գործերի նախարար Սերգեյ Լավրովի երեկվա հայտարարության առնչությամբ:

Էկոնոմիկայի նախարարը, սակայն, ասաց, որ ծանոթ չէ դրան: Սերգեյ Լավրովը հայտարարել է, որ ՄՄ անդամ երկրները կարող են որևէ առանձին անդամ երկրի դեմ արտաքին սանկցիաների դեպքում միասնական պատասխան գործողություն իրականացնել:

Լուսանկարը՝ Ֆոտոլուրի