Փաստ ինֆո

Այսօր ժողովուրդը կլսի այն ելույթները, որոնց համար եկել է. Ընդդիմադիր եռյակի հերթական հանրահավաքն այսօր մեկնարկեց այս խոստմամբ: Եռյակի առաջնորդների սպասված ելույթները, ինչպես և խոստացվել էր հնչեցին:

Հատկանշական է, որ առաջինը ելույթ ունեցավ ՀԱԿ առաջնորդը, իսկ վերջինը` ԲՀԿ նախագահ Գագիկ Ծառուկյանը, ընդ որում, թե Լևոն Տեր-Պետրոսյանը և թե’ Րաֆֆի Հովհաննիսյանն իրենց ելույթներում մի քանի անգամ շեշտեցին, որ հիմնական ասելիքն ու եռյակում կայացված որոշումներն իր ելույթում հայտնելու է Գագիկ Ծառուկյանը:

Իսկ ՀԱԿ առաջնորդ Լևոն Տեր-Պետրոսյանը մասնավորապես անդրադարձավ Հայաստանի անդամակցությանը ԵՏՄ-ին: «Տեսանելի ապագայում մեր երկիրը ապրելու եւ կենսագործելու է ԵՏՄ-ի շրջանակներում, հետեւաբար, տվյալ իրողության հետ կապված ցանկացած ջղաձգում այլեւս անիմաստ, ուշացած եւ վնասակար է»,- հայտարարեց առաջին նախագահը, հավելելով. «Նույն Արեւմուտքը ըմբռնումով է մոտենում Հայաստանի ընտրությանը, մինչդեռ այսօր մի բուռ մարդիկ մեր երկրում փորձում են հակառուսական տրամադրություններ հրահրել, առանց հասկանալու, որ Հայաստանում նման տրամադրությունների համար նպաստավոր հող չկա: Եթե լիներ, անցած տարվա սեպտեմբերից հետո թող փողոց դուրս գային»:

Անդրադառնալով եռյակի հետագա քայլերի ու մարտավարության թեմային, Լևոն Տեր-Պետրոսյանը հայտարարեց, որ «համաժողովրդական շարժման ղեկավարությունն» իր «գործողությունների ճանապարհային քարտեզն ու հստակ ժամանակացույցը» չի բացահայտելու, «քանի որ բռնապետության պայմաններում վճռական պայքարի դուրս եկած քաղաքական շարժումը չի կարող եւ իրավունք էլ չունի իր բոլոր քարտերը միանգամից բացել»:

«Ժառանգության» առաջնորդ Րաֆֆի Հովհաննիսյանը հակառակ Լևոն Տեր-Պետրոսյանի հայտարարեց. «Մենք դեմ ենք Եվրասիական տնտեսական միությանը Հայաստանի անդամակցությանը, եւ համարում ենք, որ Սերժ Սարգսյանը իր առ ոչինչ ստորագրությամբ Հայաստանը տանում է սխալ ուղղությամբ»: Րաֆֆի Հովհաննիսյանը դեմ արտահայտվեց նաև Եվրոպական միությանը միանալու գաղափարին` ընդունելի համարելով արտաքին աշխարհի հետ մեր շահերից ու իրավունքներից բխող համահավասար հարաբերությունները:

Ի դեպ, Րաֆֆի Հովհաննիսյանը տեղեկացրեց, որ այսօրվա հանրահավաքից հետո ազատամարտիկները պատտրաստակամություն են հայտնել Ազատության հրապարակում նստացույց սկսելու: Սակայն, այդ որոշման ընդունումը թողեց Գագիկ Ծառուկյանին: Իսկ նրանից հետո խոսափողին մոտեցած ԲՀԿ նախագահը հայտարարեց, որ նստացույց չի լինի, քանի որ դա անիմաստ է:

«Անհատական գործողությունները հաջողության չեն բերի, սկսել ենք, պիտի ավարտենք: Ես ուզում եմ ասել, որ ձեր կողքին եմ, մինչեւ խնդիրների լուծումը»,- ասաց Գագիկ Ծառուկյանը` տեղեկացնելով, որ այսօրվանից սկսած ողջ հանրապետությունում սկսվում է համաժողովրդական շարժման շտաբերի ստեղծումը` ժողովրդին արագ մոբիլիզացնելու համար: «Մենք շատ ժամանակ չունենք: Մենք պետք է փոխենք քաղաքական մենաշնորհը` խուսափելով մայդաններից, պետք է լուծենք ժողովրդի առջեւ ծառացած խնդիրները: Սա է այս իրավիճակից դուրս գալու գրագետ, օպտիմալ ճանապարհը: Եվ եթե իշխանությունները դեմ հանդես գան մեր առաջարկին, մենք երեք ուժերով փողոցում եւ հրապարակներում կանգնած կպարտադրենք իշխանափոխություն»,- ասաց նա:

Եռյակի հանրահավաքն, ըստ ձևավորված ավանդույթի ավարտվեց երթով` Ազատության հրապարակ–Մաշտոցի պողոտա–Ամիրյան փողոց–Հանրապետության հրապարակ–Նալբանդյան փողոց–Թումանյան փողոց–Ազատության հրապարակ երթուղով:

Երթի ավարտին Ազատության հրապարակում հանրահավաքի ավարտը հայտարարելով ՀԱԿ անդամ Լևոն Զուրաբյանը ասաց. «Այսօր բոլորը Գագիկ Ծառուկյանից սպասում էին իր վճռական խոսքը, և այդ խոսքը հնչեց: Դուք պիտի իմանաք մեր մտադրությունը: Մենք այս պրոցեսը չենք ձգձգելու, ոչ ոք դանդաղկոտություն ցույց չի տալու, երկրում ստեղծվել է այնպիսի կառավարման ճգնաժամ, որը այս իշխանությունները հաղթահարել չեն կարող, և որի հաղթահարման միակ ձևը ամբողջական իշխանափոխությունն է: Եվ մեր 3 ուժերի միասնական դիրքորոշումն այսօր Գագիկ Ծառուկյանը հայտարարեց: Այն է` կա’մ լինելու է սահուն իշխանափոխություն` ընտրական օրենսգրքի փոփոխությամբ, պետական ընտրական համակարգը մաքրելով ընտրակեղծիքներից և անմիջապես դրանից հետո արտահերթ ընտրություն ունենալով, կա’մ  ժողովրդի կամքը կպարտադրվի համաժողովրդական շարժման ճնշմամբ: Եվ պատահական չէր Ծառուկյանի այն խոսքը, որ եթե պետք լինի մյուս անգամ հնարավոր է մենք սկսենք համազգային շուրջօրյա նստացույց Ազատության հրապարակում»:

Իսկ թե երբ կկայանա հաջորդ հանրահավաքը Զուրաբյանը խոստացավ հայտնել եռակողմ խորհրդակցություններից հետո, բայց` «շատ կարճ ժամանակում»: